nepal investment baink

भाषा निभाः प्रेमबहादुर कसाःयात लुमंकल

नेवा: अनलाइन न्युज | ने.सं. ११४४ बछलागा पारु (२०८१ जेष्ठ ११ गते) शुक्रवाः

येँया रत्न राज्यलक्ष्मी क्याम्पसं भाषा निभाः प्रेमबहादुर कसाःया गुणानुस्मरण यासें कसाःया १०७ क्वःगु बुदिं हंगु दु ।

नेपालय्  प्रजातन्त्रया पुनःबहालीइ  ज्वःमदुगु  योगदान बियादीगु लिसें भाषा, साहित्य, संस्कृति सम्पदाया संरक्षण सम्बर्द्धन यायेत थःगु जीवन पानादीगुयात लुमंकाः हंगु बुदिं हनेज्याया आज्जु बारेय् उगु ज्याझ्वलय् सुकुन्दा साहित्य पाःलाःया नायो प्रशान्त डंगोलं नेपालभाषा ख्यलय् द्वलंद्वः संघ संस्थात दुसां नं खाली बैठक भेलाय् जक सीमित जुयाच्वंगुयात कया ध्यानकर्षण यासें समाजसेवाय् न्ह्यचिलेत थःपिंसं न्हूगु मूस्याः च्याकाः ज्याझ्वः न्ह्याकागु खँ तसें लसकुस न्वचू तयादिल ।

उगु ज्याझ्वलय् ज्याझ्वःया पाहाँ लोककवि राजभाई जःकमिं भाषा निभाः व प्रेम बहादुर कंसाकार’ चिनाखँ वाचन यानादीगु खः ।

ज्याझ्वःया विशेष पाहाँ नेपालभाषाया साहित्यकारलिसें छय् भिंचा दिब्य ताम्राकारं भाषानिभाः प्रेम बहादुर कसाः गथें जुया महान् व्यक्तित्व जुल ? उकिया बारेय् ध्वाथुइकुसें भाषाः निभाः प्रेम बहादुर कसाः नं झीगु भाषा, साहित्यिक, सम्पदा, संस्कृति ख्यलय योगदान बिया उत्थान यानादिल, उगु लँपुइ झीसं पःला तयेगु हे बास्तविक रुपं बुदिं हनेज्या जुइगु धापू प्वंकादिल ।

नेपालभाषा स्यनामि मदनसेन बज्राचार्यं भाषा म्वासा जाति म्वाई थ्व बडो  होस् यायेमाःगु जाति म्वाना भाषा म्वाई मखु धकाः नुगः खँ प्वंकुसे भाषा निभाः प्रेमबहादुर कसाः भाषा, साहित्यिक, संस्कृति व सम्पदाया खँय् तसकं मोह दुम्ह छम्ह क्रान्तिकारी, राजनीतिक अले बहुआयामिक व्यक्तित्व जूगु चर्चा यानादिल ।

प्रेम बहादुर कसाःया बुदिं हना वयाच्वंगुलि ग्वसाः खलःयात लसकुस देछासे सुकुन्दा साहित्य पाःलाःया सकृय जुयादिइपिं  प्रशान्त डंगोल व रिदेन महर्जनं गुगु देन खः गुगु हालतय् नं मदिइमा न्ह्याबले न्ह्यज्यायेमा धकाः आशा यासें प्रेमबहादुर कसाःया योगदान नेपाल राज्यं जक मखु नेवाः तय्सं हे लोमंके धुंकल थौं तक नं वय्कःया बारेय् छुं हे ज्याझ्वः मजुगु खँय् दुखः प्वंकादिल ।

भाषा निभाः प्रेम बहादुर कसाः नं न्ह्यागु ज्या याःसा थःगु जीवनय् क्रान्तिकारी ज्या यानादीगु धकाः चर्चा यासें नेपालय् दकले न्हापां प्रदिप्त पुस्तकालय् वय्कलं चायेकूगु धयागु इतिहास दयेमाःसां नं वय्कःया नां मदुगु धयागु वय्कःप्रति बेवास्ता खः । राणाशासनया इलय् भारतय् च्वसा पासा पलिस्था यानादिल, सुया हे वास्ता मदु नेपालभाषा परिषदया छु अवस्था दु ?  प्रा.डा. चन्द्रमान बज्रार्चायं वय्कःया छेँजःपिंसं च्वसापासायात तालं ग्वःयातःगु दुगु धापू तसें हानं सकृय यायेगु खँय् ध्यानाकर्षण यानादिल ।

उगु ज्याझ्वःया कजिं लिसें सुकुन्दा साहित्य पाःलाःया छ्याञ्जे रिदेन महर्जनं रत्न राज्यलक्ष्मी क्याम्पसय् नेपालभाषा अभियान थःम्हं दकले न्हापां न्ह्याकागु झ्वलय् सकलसिनं सुकुन्दा साहित्य पाःलाः गठन यायेमा धकाः सुझाव बिइगु जुसानं थःम्ह दकले न्हापां नेवाः तय्त संगठीत यानाः नेवाः विद्यार्थी युनियन पलिस्था यानागु धयादिल ।

थःपिंसं अभियानया झ्वलय् अभियन्ता पासाःपिंसं आपालं संघर्ष यायेमाःगु खँ कसें क्याम्पसय् नेपालभाषा ब्वनामिपि अप्वयेकेमाःगु सवालय् सकलसिनं दायित्व बहन यायेमाःगु खँय् बहः बिसें नेवाःतय्त जुयाच्वंगु विभेदया सवालय् दनेमाःगु खँ कसें थीथी ज्याझ्वः इलय् ब्यलय् यायेगु नितिं सकल मांभाय् प्रति नुगः क्वसाःपिनिगु  ग्वाहालि दैगु आशा यासें थःपिंसं नेवाःतय्त छप्पं छधी यायेगु नितिलिसें जागरण हयेगु नितिं  ज्याझ्वः यानागु धकाः नुगः खँ प्वंकूसे ज्याझ्वः ताः लाकेत ग्वाहालि यानादिइपिं सकलसित सुभाय् बियादिल ।

एम. ए. न्हापांगु दँय् नेपालभाषा ब्वनामि पवित्र कंसाकारं भाषा निभाः प्रेम बहादुर कसाःया जीवनीया लिधंसाय्  म्ये हालादीगु ज्याझ्वःया सभापति नेपाली व नेपालभाषा विभागया प्रमुख बिष्णु ज्ञवालीं  भाषा व साहित्यिक ख्यलय्  योगदान बियादिइपिं ल्यूने लानाच्वंगु धापू तसें थौंकन्हय् राजनीतिक उत्तरदायित्व  विहिन जुगुलिइ मभिंपिं मनूतय राजनीतिइ हावी जुबले  महान् व्यक्तित्वत ल्यूने लाःगु  धकाः ज्याझ्वः क्वचायेकादिल ।

सुकुन्दा साहित्य पाःलाः नं प्रेमबहादुर कसाः लगायत थीथी महान् व्यक्तित्वःपिनिगिु बुदिं हनेज्याया आज्जु कथं सकल नेवाः खलः पुचः संघसंस्थां झी  दिग्गज विद्वानपिंसं भाषा, संस्कृति, सम्पदा उत्थानया नितिं बियादीगु योगदानयात कदर यासें संरक्षण प्रवर्द्धन यायेगु खँय् पलाः तयेत न्ह्यज्यायेगुलि बहः ब्यूगु खः ।

नेपाल भाषाया विद्वान विदुषीपिन्सं थःगु जीवन पानाः रचना यानादीगु  थीथी बहुमुल्य ग्रन्थ, थ्यासफु, ब्यंसफु सपूmत  व  दस्तावेजहरु पुनः प्रकाशन याकेगु लिसें सम्पदा संस्कृति दुने वयाच्वंगु  विकृतित बिसंगतित निर्मूल यायेत व हस्तान्तरण र पुस्तान्तरण यायेगु परम्परागत विधित न्ह्यचिलेत लिसें जागिर नयेगु व नकेगु  जक मखु  झीगु  संस्कृति संस्कार सम्पदा संरक्षण यायेत  फुक्को  संघसंस्थापिन्त ध्यानाकर्षण याकेगु खः धकाः ध्वाथुइकूगु दु ।

– रिदेन महर्जन

Categorized in नेवाः