swastha 3

भाषा आयोगप्रति नेपालभाषा एकेदमि सकारात्मक

नेवा: अनलाइन न्युज – ललेन्द्र शाक्य | २०७८ भाद्र २५, शुक्रबार ११:२२:०६

३ नम्बर बागमति प्रदेशय् सरकारी ज्याखँय् औपचारिक ल्याखं छ्यलाबुला यायेगु कथं नेपालभाषा पायछि धकाः भाषा आयोगपाखें आः नकितिनि जक नेपाल सरकारयात लःल्हाःगु सिफारिस प्रतिवेदनयात कयाः नेपालभाषा एकेदमिं अतिकं सकारात्मक धकाः च्वछासें आयोगया उगु प्रतिवेदनयात लसकुस याःगु दु ।

नेपालभाषा एकेदेमिया सदस्य सचिव मल्ल के सुन्दरं ल्हाःचिं तयाः सार्वजनिक याःगु विज्ञप्तिइ थुगु खँया जानकारी बियातःगु खः ।

नेपालभाषा एकेदमिं सार्वजनिक याःगु विज्ञप्तिइ धयातःगु दु, ‘संघीय लोकतान्त्रि गणतन्त्र कथं नेपाः देया संरचनाय् वःगु राजनीतिक ह्यूपाःया झ्वलय् उकथं भाषिक अधिकार सुनिश्चित यायेगु कुतः जुइमाः धकाः भाषा आयोगया जिम्मेवार पदाधिकारीपिं नापं औपचारिक ल्याखं च्वनाः थुगु नेपालभाषा एकेडमिपाखें थःगु आधिकारिक धारणा न्ह्यब्वयेगु व माःगु सहलह जूगु खँ थन लुमंकाच्वना । थुगु एकेडमिं न्ह्यब्वःगु थीथी सुझावत मध्ये नेपालभाषायात प्रादेशिक सरकारया ज्याखँय् आधिकारिक छ्यलाबुलाय् हयेमा धैगु नं छता मू खँ खत । भलसा काये राज्ययापाखें आयोगया थुगु सुझावयात याकनं ब्यवहारय् नालेत माःगु पलाः याकनं ल्ह्वनेगु ज्या जुइ ।’ 

नेवाः समुदायया मांभाय् नेपालभाषा थें देय्या मेमेगु समुदायपाखें छ्यलावयाच्वंगु थीथी भाय्यात नं थीथी प्रदेशया आधिकारिक ज्याय् नालेत भाषा आयोगपाखें याःगु सिफारियात कयाः थुगु एकेडमिपाखें आपालं लसता प्वंकागु जुल धकाः सार्वजनिक जूगु विज्ञप्तिइ न्ह्यथनातःगु दु ।

सार्वजनि जूगु उगु विज्ञप्तिइ दकलें लिपा धयातःगु दु, ‘विशेषतः नेपालभाषायात सरकारी ज्याखँय् छ्यलेगु सम्बन्धय् गुगुं नं सम्वन्धित निकाययात छुं नं कथंया ग्वहालि व सुझाव माःसा थुगु एकेडमियात लुमंकादीत नं इनाप यानागु जुल ।’

Categorized in नेवाः