nepal investment baink

भाषासेवी देवदासयात लुमंकाः लुमन्ति ज्याझ्वः याइगु

नेवा: अनलाइन न्युज – ललेन्द्र शाक्य | ने.सं. ११४४ चिल्लागा सप्तमी (२०८० चैत्र १९ गते) सोमवाः

नेपाल संवत न्हूदँ राष्ट्रिय समारोह समितिया दुजःलिसें भाषासेवी देवदास मानन्धरयात लुमंकाः लुमन्ति ज्याझ्वः याइगु जूगु दु ।

भाजु मानन्धरं नेपालभाषा ख्यलय् तःता कथंया ज्या यानादीगुलिं वय्कःयात लुमंकाः थथे लुमन्ति ज्याझ्वः यायेगु निर्णय न्हूदँ समारोह समितिया मुँज्यां याःगु दु ।

म्हिगः आइतवाः समारोह समितिया मुँज्यां थथे मानन्धरया लुमन्तिइ वय्कलं भाषा ख्यलय् यानादीगु थीथी कथंया योगदानयात कयाः जनस्तरय् हयेगु नितिं थुकथंया ज्याझ्वः यायेगु क्वःछ्यूगु खँ समारोह समितिया नायः प्रा.डा. नरेशमान बज्राचार्यं जानकारी बियादीगु दु ।

नायः बज्राचार्यं बियादीगु जानकारी कथं थुगु ज्याझ्वः यायेगु नितिं समितिया दुजःपिं विष्णु चित्रकार, ज्योति शाक्य, उमेश स्थापित, शरद कसाः दुथ्याःगु उपसमिति नीस्वंगु दु । उगु उपसमितिं याकनं हे थुगु ज्याझ्वः यायेगु तयारी न्ह्याकूगु दु ।

अथेहे, नायः बज्राचार्यं बियादीगु जानकारी कथं शौनक रञ्जितकारया न्ह्यलुवाःसुइ स्पाइरालोजिक्स संस्था दयेकूगु नेपाल संवतया एप्स जनस्तरय् प्रचारप्रसार यायेगु नितिं ज्याझ्वः यायेगु व अथेहे, नेपाल सरकारं नेपाल संवतयात सरकारीस्तरय् छ्यलाबुलाय् हयाच्वंगु सरकारी निकायया धलः दयेकेगु, नेपाल संवतया आन्दोलनयात अभिलेखीकरण यायेगुलिसें थीथी ज्या न्ह्याकेगु निर्णय याःगु दु ।

Categorized in नेवाः