zero media family planning adv

भाषाथुवाः फणिन्द्ररत्न बज्राचार्यया च्वसां पिदंगु न्हापांगु म्ये पिदन

नेवा: अनलाइन न्युज – ललेन्द्र शाक्य | २०७७ चैत्र १९, बिहिबार १४:५३:१३

नेपालभाषा साहित्य ख्यलय् छगः धिसिलाःगु थां कथं धस्वाना च्वंम्ह साहित्यकार भाषाज्योति भाषाथुवाः फणिन्द्ररत्न बज्राचार्य या च्वसां पिदंगु ...जिमि यःम्ह यज्जु...म्येया थौं बिहिवाः छगू ज्याझ्वःया दथुइ पितब्वज्या जूगु दु ।

थुगु म्ये नांजाःम्ह शिक्षासेवी भाषासेवी नेपालभाषा परिषदया नायः प्रा. सुवर्ण शाक्यया मूपाहाँसुइ पितब्वज्या जूगु खः ।

म्ये पितब्वज्या ज्याझ्वलय् बिशेष पाहाँ कथं झायादीम्ह येँ महानगरपालिकाया उपमेयर हरिप्रभा खड्गी श्रेष्ठ, पाहाँ कथं झायादीपिं संकिपा पत्रकार विजयरत्न असंबरे व नांजाःम्ह संगीतकार राजु सिंह व म्येच्वमि बज्राचार्य व मूपाहाँ शाक्यं मंकाः कथं पितब्वज्या यानादीगु खः ।

न्ह्यलुवाः साहित्यकार फणिन्द्ररत्न बज्राचार्यया मदुम्ह जहान रत्नकेशरी बज्राचार्यया नामय् च्वयातगु थ्व म्येया लय् चिनामि अनिलरत्न तुलाधर खःसा थ्व म्ये लोकंह्वाःम्ह म्येहालामि प्रवेश मान शाक्यं हालादीगु खः।

नांजाःम्ह म्येच्वमि आनन्द बज्राचार्यं ग्वसाः ग्वयादीगु थ्व म्येया पितब्वज्या ज्याझ्वलय् ग्वसाःमि आनन्द बज्राचार्यं च्वयातःगु म्ये लोकंह्वाःम्ह म्येहालामि सरिता शाहीं हाला न्यंकादीगु खः ।

ज्याझ्वलय् नुगःखँ तयेगु झ्वलय् मूपाहाँ प्रा. सुवर्ण शाक्यं छपु म्ये जुइत शब्द, संगीत व स्वरया संगम ताःलायेमाः धकाः धासें थ्व म्ये थज्याःगु हे छगू दसु खः धकाः धयादिल ।

बिशेष पाहाँ उपमेयर श्रेष्ठं नेपालभाषायात संरक्षण व सम्बर्ध्दन यायेगु ज्याय् येँ महानगरपालिका न्ह्यचिला च्वनागु खँ कनादिल । अथेहे पाहाँ असंबरें पितब्वज्या जूगु म्ये तसकं नुगलय् थिइगु म्ये धकाः धासें म्येच्वंमि बज्राचार्यया मेमेगु म्ये छाय् पिहाँ मवल धकाः चिउताः तयादिलसा पाहाँ संगीतकार राजु सिंहं नेपालभाषा संगीत ख्यःया निंतिं थ्व म्ये छगू च्वछायेबहःगु म्ये जुया दंवःगु दु धकाः धयादिल ।

Categorized in कला