nepal investment baink

भारतीय संकिपाया दकले थिकेम्ह भिलने जुल “केजीएफ” स्टार यश, १५० करोड भारु पारिश्रमिक

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व एकादसी (२०८० चैत्र ७) बुधवाः

“केजीएफ” व “केजीएफ २” अभिनेता यश आः खलनायक जुइत्यंगु दु ।

रणवीर कपुर व साई पल्लवी स्टारर संकिपा “रामायण”य् यश रावणया भूमिकाय् खनेदइगु भारतीय संचारमाध्यं जानकारी ब्यूगु दु ।

थुगु संकिपायात दंगल, छिछोरे थेंजाःगु हिट संकिपा दयेकूम्ह नितेश तिवारीं निर्देशन याःगु खः ।

यशं थ्व भूमिकाया नितिं १५० करोड भारु पारिश्रमिक काःगु दु । हिन्दी संकिपाया इतिहासय् खलनायकं काःगु थ्व पारिश्रमिक आःतकया दुनेया हे दकले उच्च खः ।

यश थुगु इलय् “केजीएफ ३” या छायांकनय् ब्यस्त जुयाच्वंगु दु । न्हापांगु “रामायण”पाखें बलिउड संकिपाया करिअर नं न्ह्याकेत्यंगु दु ।

यशं रणवीर सिंह, संजय दत्त, कमल हसन, विजय सेतुपति, इमरान हाश्मी व सैफ अली खानथें जाःपिं स्टारया रेकर्ड नं तोडेयाःगु दु ।

कमल हसन प्रभास, दीपिका पादुकोण व अमिताभ बच्चन स्टारर “कल्की २८९८ एडी” इ खलनायकया भूमिकाय् खनेदइगु जूगु दु । थ्व संकिपाया नितिं वं ३० करोड भारु काःगु दु ।

यश धुंकाः व दकले अप्वः कमेयाइम्ह खलनायकया धलखय् निगूगु थासय् दु । थ्व संकिपा ९ मे २०२४ स रिलिज जुइगु जूगु दु ।
साउथया मेम्ह चर्चित अभिनेता विजय नं सन् २०२३ या ब्लकबस्टर संकिपा ‘जवान’य् खलनायक कालीया भूमिकाय् निर्वाह याःगु खः । थ्व भूमिकाया नितिं वं २१ करोड भारु पारिश्रमिक काःगु खः ।

सन् २०१८ य् रिलिज जूगु संकिपा ‘पद्मावत’या नितिं रणवीर सिंहं खलनायकया भूमिका ल्यःगु खः, गुकिया नितिं वं १३ करोड भारु पारिश्रमिक काःगु खः ।

सैफं सन् २०२३ स रिलिज जूगु संकिपा ‘आदिपुरुष’य् रावणया भूमिका निर्वाह याःगु खः । थुकिया नितिं वं १० करोड पारिश्रमिक काःगु खः । इमरान हाश्मी लिपांगु खुसि सलमान खानया ‘टाइगर ३’य् खलनायकया भूमिकाय् खनेदूगु खः, गुकिया नितिं वयात १० करोड पारिश्रमिक ब्यूगु खः ।

संकिपा ‘एनिमल’य् बबी देओल मू खलनायक जूगु खः । संकिपाय् अबरारया भूमिकाय् वयात अतिकं ययेकूगु खः । उगु भूमिकाया नितिं वयात ४–५ करोड भारु पारिश्रमिक ब्यूगु खः, गुगु वं थ्वसिबें न्ह्यः छुं नं संकिपाया नितिं काःगु मदुनि ।

Categorized in कला