नेवा: अनलाइन न्युज – ललेन्द्र शाक्य | २०७८ भाद्र १६, बुधबार १७:२१:५१

नेपाः व भारतदथुइ जुइगु निगू अन्तर्राष्ट्रिय मैत्रीपूर्ण फुटबल कासाय् स्वकूमिपिन्त दुकायेगु निर्णय याःगु दु । कासाया न्हापांगु दिं बुधवाः पत्रकार सम्मेलनय् अखिल नेपाल फुटबल संघ (एन्फा)या नायः कर्माििछरिङ शेर्पां स्वकूमिपिन्त दुकायेगु नितिं प्रशासन व कोभिड १९ संकट व्यवस्थापन केन्द्र सीसीएमसीपाखें अनुमति कायेधुनागु जानकारी ब्यूगु दु ।

शेर्पां बुधवाः जक स्वकूमिपिं दुकायेगु नितिं अनुमति पौ कयागु व थ्यंमथ्यं ५ हजार १०० म्ह स्वकूमिपिं दुकायेगु योजना दूगु जानकारी ब्यूगु दु ।

शेर्पां धाःगु दु, ‘स्वकूमिपिं दुकायेगु नितिं सीसीएमसीपाखें अनुमति लिसेंया पौ वःगु दु । ५ हजार १ सयम्ह स्वकूमिपिन्त दुकायेगु योजना दु । कोभिड १९ विरुद्धया निगुलिं डोज खोप कायेधुंकूपिं वा पीसीआर नेगेटिभ रिपोर्ट दुपिं स्वकूमिपिन्त जक दुकायेगु जुइ ।’

शेर्पां रंगशाला दुहाँ वयेगु नितिं न्यागुलिं गेट खुल्ला जुइगु नं जानकारी ब्यूगु दु ।

शेर्पां सरकार व फिफा एएफसीं क्वःछ्यूगु फुक्क मापदण्ड पूवंकाः जक कासा संचालन यायेगु धाःगु दु । कासा स्वयेगु नितिं अनलाइनपाखें टिकट न्यायेफइगु नं शेर्पां जानकारी ब्यूगु दु ।

पत्रकार सम्मेलनय् एन्फाया न्वकू व मैत्रीपूर्ण अन्तर्राष्ट्रिय कासाया कजि उपेन्द्रमान सिंहं आयोजनाया फुक्क तयारी पूवनेधुंकूगु धाःगु दु । सिंहं धाःगु दु, ‘जिमिसं फुक्क कथंया सुरक्षा सावधानीया नितिं तयारी पूवंकेधुनागु दु । जिमिसं सरकारं क्वःछ्यूगु फुक्क स्वास्थ्य आचारसंहिताया पूर्ण पालना यायेगु जुइ ।’

साफ च्याम्पियनसिपया तयारीइ दूगु नेपाः व भारतदथुइ बिहिवाः व आइतवाः यानाः निगू मैत्रीपूर्ण कासा जुइत्यंगु दु । कासा येँया त्रिपुरेश्वरय् च्वंगु दशरथ रंगशालाय् सनिलया ५ः३० ता इलय् सुरु जुइ ।

साफ च्याम्पियनसिप अक्टोबर १ निसें १६ तारिखतक माल्दिभ्सय् जुइत्यंगु दु ।

Categorized in कासा