ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

भारतय् ‘कालो ढुसी’या संक्रमणं ४,३०० म्हसिबें अप्वः मनूत सित

नेवा: अनलाइन न्युज – ललेन्द्र शाक्य | २०७८ श्रावण ६, बुधबार १६:४७:११

भारतय् म्युकरमाइकोसिस (कालो ढुसी)या संक्रमणया हुनिं ४,३०० म्हसिबें अप्वः मनूत सीगु दु । लिपांगु इलय् भारतय् ‘कालो ढुसी’या संक्रमितया ल्याखय् आपालं वृद्धि जुइधुंकाः थुकिं सीपिनिगु ल्याः नं अप्वःगु खः ।

भारतया स्वास्थ्यमन्त्री मन्सुख मन्दाभियाया कथं आःतक भारतय् ‘कालो ढुसी’या ४५,३७४ म्ह संक्रमित लुयावःगु दु । इपिंमध्ये थ्यंमथ्यं बच्छि मनूत थुकया वासः याकाच्वंगु दु ।

‘कालो ढुसी’या संक्रमण न्हाय, मिखा व गुबलें गुबलें मस्तिष्कय् नं लाइ । ‘कालो ढुसी’या संक्रमण खनेदूगुलि आपालं कोरोनापाखें लनेधुंकूपिं मनूत दु । कोरोनाया वासः यायेगु झ्वलय् स्टेरोइडया छ्यलाबुला याःपिं व मधुमेहया समस्या दुपिं मनूत दकले अप्वः जोखिमय् लाःगु चिकित्सकपिन्सं धाःगु दु ।

चिकित्सकपिनिगु कथं कोरोना लंगु १२ निसें १८ न्हुइ ‘कालो ढुसी’या संक्रमण खनेदूगु लुयावःगु दु । भारतया महाराष्ट्र, गुजरात, तामिलनाडु व राजस्थानय् ‘कालो ढुसी’या दकले अप्वः संक्रमित लुयावःगु दु । महाराष्ट्र व गुजरातय् जक संक्रमितया ल्याः १,७८५ म्ह दु ।

भारतया बैंग्लोरया डा. रघुराज हेग्डं लिपांगु इलय् तःधंगु ल्याखय् थुकिया ल्वगिपिं वयाच्वंगु व थुकिं सीपिनिगु ल्याः नं आपालं जूगु धाःगु दु ।

चिकित्सकपिनिगु कथं सुं सुं ल्वगिया अस्पताल हयेन्ह्यः हे सीगु दु । लिसें सुं सुं मनूतय्के धाःसा वासः यायेधुंकाः छेँ लिहाँ वनेधुंकाः हाकनं थ्व ‘कालो ढुसी’या संक्रमणया समस्या खनेदूगु दु ।

Categorized in अन्तर्राष्ट्रिय