zero media family planning adv

भारतय् हनुमानयात जेलय् तल !

२०७३ आश्विन ६, बिहिबार ११:१८:३०

साक्षात भगवानयात हे जेलय् सुनां तये फइ ? धैगु तायेकाच्वनादियागु खःसा अवश्य थ्व खँ ब्वनादिसँ । भारतया विहारय् च्वंगु मधुवनी जिल्लाय् भगवान हुनमानयात जेल तःगु दु ।

मधुवनीया नवटोली गामय् भगवान हनुमानयात प्रहरीं ज्वनाः यंकाः कैद याःगु दु । खँ जग्गा जमिन सम्बन्धी विवादया खः । तर थुकिया सजायँ हनुमानं भोगे यायेमाल ।

नवटोली गामय् छगू समाधिस्थलया जमिनया विषययात कयाः विवाद ब्वलंगु खः । निगू जातिया मनूतदथुइ जमिन कब्जा याःगु विषयस विवाद जुयाः छगू समुदायया मनूतसें चांचां उगु विवादित जग्गाय् देगःया निर्माण यानाः हनुमानया मूर्ति पलिस्था याःगु खः ।

थथे देगः व हनुमानया मूर्ति पलिस्था यायेधुंकाः मेगु समुदायया मनूतसें सुथय् अजूचायापूगु कथं सुथय् उगु विवादित जग्गाय् देगः व हनुमानया मूर्ति खन । इमिसं असन्तुष्ट प्वंकल व प्रहरीइ उजुरु बिल । प्रहरी घटनास्थलय् थ्यंकाः देगलय् तयातःगु हनुमानया मूर्ति ल्ययेथनाः यंकल ।

हनुमानया मूर्तियात प्रहरीं मधुवनी नगर प्रहरीचौकीइ हे तयातःगु दु । विचरा निगू जातिया थःथवय् ल्वापुइ भगवान हनुमान प्रहरीया ल्हाःतं ज्वनाः यंका प्रहरी चौकीइया खोरय् च्वनेमाःगु दु ।