ad prabhu

भारतय् देनाच्वंपिं १६ म्ह मजदुरपिं रेलं क्यलाः सित

नेवा: अनलाइन न्युज – ललेन्द्र शाक्य | २०७७ बैशाख २६, शुक्रबार १७:५३:५०

भारतया महाराष्ट्र प्रान्तय् च्वंगु औरंगाबादय् रेलं क्यलाः कम्ती नं १६ म्ह मनूत सीगु दुसा ५ म्ह मनूत घाःपाः जूगु दु ।

भारतया रेलमन्त्री पियुष गोलया कथं थःगु हे छेँय् वनाच्वंपिं मजदुरपिं बहनी रेलया लिगय् देनाच्वंगु खः । सुथय् स्थानीय ईकथं ५ः३० ता इलय् थुगु दुर्घटना जूगु धाःगु दु ।

भारतीय प्रधानमन्त्री नरेन्द्र मोदीं घटनायात कयाः दुःख प्वंकूसें रेलमन्त्रीयात माःगु फुक्क ग्वाहालिया नितिं निर्देशन ब्यूगु धाःगु दु ।

औरंगाबादया एसपी मोक्षदा पाटिलया कथं फुक्क मजदुरपिं, औरंगावाद लिक्क च्वंगु जालनाया छगू स्टिल कारखनाय् ज्या याइपिं खः । इपिं भुसावल धैगु थासय् वनाच्वंगु खः । इमित औरंगाबादं रेल दइ धकाः न्यंकूगु खः । बहनी जुइधुंकाः इपिं रेलया लिगय् हे द्यंगु खः । रेल वःबलय् इपिं न्ह्यः वयेकाच्वंगु हुनिं इपिं बिस्युं वनेमखन ।

भारतय् कोरोना भाइरस कोभिड १९ नियन्त्रणया नितिं मे १७ तक लकडाउन घोषणा याःगु दु । उकिं थीथी राज्यय् वनाः ज्या याइपिं मजदुरपिं ताःहाकःगु लँपु न्यासिवनाः थःगु छेँय् लिहाँ वनेगु यानाच्वंगु खः ।

रेलमन्त्री गोयलया कथं चालकं मजदुरपिं लिगय् देनाच्वंगु खनेधुंकाः रेल दिकेगु कुतः याःगु खः । तर, वं मजदुरपिन्त बचेयाये मफुत । सीपिं फुक्क मध्यप्रदेशया नागरिक जूगु धाःगु दु ।

Categorized in अन्तर्राष्ट्रिय