Header Nepal rastra bank Adv

भारतय् छन्हुं हे डेढ लखसिबें अप्वः कोरोना संक्रमित थप

नेवा: अनलाइन न्युज – ललेन्द्र शाक्य | २०७८ पौष २५, आइतबार १५:३५:५०

जलाखला देय् भारतय् स्वंगूगु लहर सुरु जुइखतं कोभिड १९ या संक्रमित आकाझाकां अप्वःगु दु ।

भारतय् लिपांगु २४ घौ दुने १ लख ५९ हजार ६३२ म्ह न्हूपिं संक्रमित थप जूगु भारतीय संचार माध्यमं जानकारी ब्यूगु दु । अथेहे, उगु ई दुने ४० हजार ८६३ म्ह संक्रमणमुक्त जूगु दुसा ३२७ म्ह सीगु दु ।

अथेहे, आइतवाःतक कोभिड १९ या न्हूगु ओमिक्रोन भेरियन्टपाखें संक्रमित जूपिनिगु ल्याः ३ हजार ६२३ म्ह थ्यंगु दु । आःतक २७ गू राज्य दुने थ्व भेरियन्ट ब्वलनेधुंकूगु दु ।

महाराष्ट्रय् ओमिक्रोनया संक्रमित दकले अप्वः दु । अन थ्व भेरियन्टया संक्रमितया ल्याः १ हजार ९ म्ह थ्यंगु दु । निगूगु थासय् दूगु दिल्लीइ ५१३ म्हेसिके आःतक ओमिक्रोन भेरियन्ट पुष्टि जूगु दु ।

आः भारतय् सक्रिय संक्रमितया ल्याः ५ लख ९० हजार ६११ म्ह दु । संक्रमितया ल्याः आकाझाकां थाहाँ वयेधुंकाः भारतया आपालं राज्यय् कडाइ याःगु दु । दिल्ली व कर्नाटकय् वालय् निन्हु शनिवाः व आइतवाः कर्फ्यू लागू याःगु दुसा आइतवाःनिसें तमिलनाडुइ नं आइतवाः पूर्ण कर्फ्यू तःगु दु ।

थ्वहे झ्वलय्, आईआईटी कानपुरया प्राध्यापक मनिन्द्र अग्रवालं थ्वहे महिनाया मध्यतकया दुने दिल्ली व मुम्बई थेंजाःगु मू शहरय् कोभिड संक्रमितया ल्याः ह्वात्त हे अप्वइगु धाःगु दु । स्वंगूगु लहरय् न्हिथं संक्रमितया ल्याः निगूगु लहरया सिबें थ्यंमथ्यं दोब्बर अर्थात् ८ लखतक थ्यंगु वया अनुमान दु ।

Categorized in अन्तर्राष्ट्रिय