nepal investment baink

भारतय् कोरोना संक्रमितया ल्याः २० लखं मयात

नेवा: अनलाइन न्युज – ललेन्द्र शाक्य | २०७७ श्रावण २३, शुक्रबार १४:०५:०७

भारतय् कोभिड १९ कोरोना भाइरस संक्रमितया ल्याः थौं शुक्रवाःतक २० लखं मयायेधुंकूगु दु ।

वंगु २४ घौ दुने भारतया ६२ हजार ५३८ म्हेसिके कोरोना भाइरस पोजेटिभ खनेदयेधुंकाः मुक्कं संक्रमितया ल्याः २० लख २७ हजार ७५ म्ह थ्यंगु अनया केन्द्रीय स्वास्थ्य व परिवार कल्याण मन्त्रालयं जानकारी ब्यूगु दु ।

सरकारी अधिकारीया कथं भारतय् कोरोना भाइरस संक्रमितमध्ये १३ लख ७८ हजार २१५ म्ह मनुखं वासः यानाः लंकाः छेँय् लिहाँ वनेधुंकूगु दु । भारतय् म्हिगः बिहिवाःतकया दुने कोरोना भाइरस वासः यानाः लनेगु क्रम ६७.३० प्रतिशतं अप्वःगु सीदूगु दु ।

भारतय् कोरोना संक्रमितमध्ये ४१ हजार ५८५ म्ह मनूत सीधुंकूगु दु । वासः यानाः लंपिनिगु ल्याः धाःसा बृद्धि जूगु खनेदूगु दु ।

आः भारतय् ६ लख ७ हजार २४४ म्ह कोरोना भाइरस संक्रमित अवस्थाय् लानाच्वंगु धाःगु दु । भारतया महाराष्ट्र राज्यय् दकले अप्वः कोरोना भाइरस संक्रमित दु । कोरोना भाइरस प्रभावित भारतया निगूगु राज्य तमिलनाडु व स्वंगूगुलि न्हूदिल्ली लानाच्वंगु दु ।

Categorized in अन्तर्राष्ट्रिय