Header Nepal rastra bank Adv

भारतया नांजाःम्ह म्येहालामि केके मन्त, प्रधानमन्त्री मोदीपाखें दुःख प्वंकल

नेवा: अनलाइन न्युज – ललेन्द्र शाक्य | २०७९ जेठ १८, बुधबार ११:०४:१८

भारतया नांजाःम्ह म्येहालामि केके (कृष्णकुमार कुन्नथ) ५३ दँया उमेरय् मंगलवाः बहनी मन्त । कोलकोत्ताय् लाइभ कन्सर्टय् ब्वति कायेधुंकाः केके मदुगु भारतीय संचारमाध्यमं जानकारी ब्यूगु दु ।

कन्सर्टय् ब्वति कायेधुंकाः होटलय् थ्यंकूम्ह केकेया स्वास्थ्य स्यनेधुंकाः तत्काल हे वयात कोलकोता मेडिकल रिसर्च इन्ष्टिच्युटय् यंकूगु खः । अस्पतालय् यंकूबलय् केके मदयेधुंकूगु खः ।

अस्पतालय् थ्यंकूम्ह पश्चिम बंगालया ऊर्जामन्त्री अरुप विश्वासया कथं चिकित्सकं हृदयघातपाखें केके मदूगु जुइफूगु प्रारम्भिक जानकारी ब्यूगु दु ।

कोलकोत्ताय् च्वंगु गुरुदास कलेजया ज्याझ्वलय् ब्वति कायेत केके अन थ्यंकूगु खः । बलिउडलिसें तामिल, तेलेगु, कन्नड, मराठी, बांग्ला व गुजराती फिल्मय् तकं केकें म्ये हालेधुंकूगु दु ।
मदये न्ह्यः केके नं कोलकोताय् जूगु कन्सर्टया किपाः व भिडियो सेयर याःगु दु ।

भारतीय प्रधानमन्त्री नरेन्द्र मोदीं केके मदुगुलिं दुःख प्वंकूगु दु ।

केकेया म्येय् फुक्क उमेर समूहया मनूत स्वानाच्वंगु धासें मोदीं म्येपाखें केके फुक्कसिगु नुगलय् च्वनाच्वनी धासें ट्वीट याःगु दु । भारतीय राष्ट्रपपति रामनाथ कोविनदं नं केके मदुगुलिं शोक प्वंकूगु दु ।

हिन्दी, तामिललिसें च्यागू भाषाय् म्ये हालेधुंकूम्ह केके फिल्म ‘माचिस’य् दुथ्याःगु ‘छोड आए हम’पाखें बलिउड डेब्यु याःगु खः । हम दिल दे चुके सनम, तडप तडपपाखें केकें लिफः स्वयेम्वाल ।

एल्बम ‘पल’पाखें केकें सांगितिक करियर न्ह्याकूगु खः । बजरंगी भाइजानया म्ये तु जो मिला, ओम शान्ति ओमया अजब सी, वो लम्हेया क्या मुझे प्यार है, रेडीया हमको प्यार हुवा, पल एल्बमया पल, काइट्सया दिल क्यों ए मेरा, भूल भूलैयाया लबों को, द ट्रेनया बिते लम्हे, हम दिल दे चुके सनमया तडप तडप, दसको दस बहाने लिसेंया केकेया लोकंह्वाःगु म्ये खः ।

Categorized in अन्तर्राष्ट्रिय