zero media family planning adv

भारतं लिहाँ व:पिं १३ म्ह नेपाःमि कोरोना संक्रमित

नेवा: अनलाइन न्युज – ललेन्द्र शाक्य | २०७७ चैत्र २७, शुक्रबार १०:३६:३४

बाँके जिल्लाय् कोरोना संक्रमित अप्वयाः वयाच्वंगु दु । बिहिवाः जक १३ म्ह थप जूगु दु । भारतं वःपिं व नेपालगञ्जया भेरी अस्पतालय् जाँच याःपिं १३ म्हेसिके कोरोना पुष्टि जूगु खः ।

भारतया गुजरातं वःपिं बाँके बैजनाथ गाउँपालिकाया २१ दँया मिजंयाके कोरोना खनेदूगु खः । नेपालगञ्ज नाकाय् तयातःगु हेल्थ डेक्सं मुम्बई, दिल्ली, गुजरात लिसेंया सहरं वःपिं नेपाःमिपिन्त विशेष निगरानीइ तयेगु यानाच्वंगु दु ।

भारतय् थ्यंमथ्यं १८ गू सहरय् हाकनं कोरोना संक्रमण खनेदूगु दु । उगु सहरपाखें वःपिं मनूपिन्त नेपालगञ्ज नाकाय् विशेष निगरानी तयेगु यानाच्वंगु दु । खेतीया सिजन सुरु जुइत्यंगुलिं भारतय् मौसमी ज्याया नितिं वंपिं नेपाःमिपिं लिहाँ वयेगु यानाच्वंगु दु ।

छुं छुं सहरं कोरोनाया ग्याःचिकुं नेपाःमिपिं छेँय् लिहाँ वयाच्वंगु दु । नेपाःमिया तःधंगु ल्याः वनीगु कालापहाड, सिमला, प्रगाय लिसेंया थासय् कोरोनाया कहर खनेमदूगु अनं लिहाँ वंपिं नेपाःमिपिन्सं धाःगु दु । नेपालगञ्ज नाकापाखें थुगु इलय् न्यासःम्हं मल्याक्क नेपाःमिपिं न्हिथं छेँय् लिहाँ वयाच्वंगु दु ।

नेपाल समाचारपत्र न्हिपौपाखें

Categorized in पत्रपत्रिका