kmc bidya

भारतं खुयाहःगु १ करोड दांलिसें स्वम्ह ज्वन

नेवा: अनलाइन न्युज | २०७६ पौष २९, मंगलबार १६:०७:५४

भारतं खुयाहःगु १ करोड दांलिसें प्रहरीं कैलालीइ स्वम्हेसित ज्वंगु दु । भारतया दिल्लीपाखें खुयाहःगु ६५ लख भारतीय दां (१ रोड ४ लख नेपाली दां) लिसें प्रहरीं इमित ज्वंगु खः ।

जिल्ला प्रहरी ज्याकुथि कैलालीं बाजुराया बुढीगंगा नगरपालिका १, डुंग्रीया २९ दँया जहरसिं थापा, वहे थासय् च्वंम्ह २८ दँया मनाकुमारी खड्का –थापा) व कैलालीया गौरीगंगा नगरपालिका २ या ३२ दँया बिन्दाकुमारी थापा (रावल)यात दांलिसें ज्वंगु खः ।

बाजुराया जहरसिंह थापा व मनाकुमारी खड्का थापां भारतं दां खुयाहःगु व कैलाली गौरीगंगाया बिन्दाकुमारी थापा (रावल) खुयाहःगु दां थःगु छेँय् सुचुकातःगु द्वपनय् ज्वंगु प्रहरीं धाःगु दु ।

भारतया दिल्ली निवासी विश्वेश्व अग्रवालया ज्याकुथिपाखें तिसा व नगद चोरी जूगु भारतीय राजदूतावासं जानकारी बिइधुंकाः कैलाली प्रहरीं इमिगु मालेगु ज्या न्ह्याकूगु खः ।

प्रहरीं कैलालीया गौरीगंगा २ स बिन्दाकुमारीया कच्ची छेँया कोथा दुने देनेगु खाता तःलय् गाः म्हुयाः टिनया बाकसदुने प्लास्टिक व कापतं चिनाः ल्हाकाः बँ छिलातःगु अवस्थाय् ६५ लख भारतीय दां लिसें बरामद याःगु खः ।

दिल्लीया अग्रवालं लुँया तिसालिसें १ करोड ४ लख तका भारतीय दां खुयायंकूगु द्वपं ब्यूगु दु । प्रहरीं धाःसा आःतक ६५ लख भारतीय दां जक बरामद याःगु दु । जिल्ला प्रहरी ज्याकुथि कैलालीया प्रवक्ता प्रहरी नायव उपरीक्षक दक्षकुमार बस्नेतं धाःगु दु, “खुयायंकूगु तिसा व मेमेगु दां जिमिस. मालाच्वनागु दु ।” इमिसं मंसीर ४ गते भारतं दां खुयाहःगु प्रहरीं जानकारी ब्यूगु दु ।

Categorized in दुर्घटना-अपराध