nepal investment baink

भाद्र मसान्त तक ताःहाकःगु दुरीया यातायात व आन्तरिक हवाई उडान बन्द

नेवा: अनलाइन न्युज – ललेन्द्र शाक्य | २०७७ भाद्र १५, सोमबार ०९:२८:५५

सरकारं अन्तर जिल्ला व ताःहाकःगु दुरीया यातायात व आन्तरिक हवाई उडान भाद्र मसान्त तक बन्द याइगु जूगु दु ।

मन्त्रिपरिषदया आइतवाः सनिलय् च्वंगु बैठकं थौं भाद्र १५ गते सोमवाः तकया नितिं याःगु स्थगनयात भाद्र मसान्त तक ताःहाकः याःगु छम्ह मन्त्रीं धाःगु दु ।

थ्वसिबें न्ह्यः अन्तर जिल्ला यातायात व हवाई उडान भाद्र १ गतेनिसें खुल्ला यायेगु निर्णय जूगु खः । तर, कोरोना संक्रमण अप्वयेधुंकाः भाद्र १५ गतेतक स्थगित याःगु खः । उकिया निन्हु न्ह्यः च्वंगु मन्त्रिपरिषदया बैठकं अन्तर जिल्ला यातायात व आन्तरिक हवाई उडान धाःसा भाद्र मसान्त तक बन्द यायेगु निर्णय याःगु खः ।

अथेहे, विद्यालय व कलेज लिसेंया शैक्षिक संस्थात नं भाद्र मसान्त तक मचायेकेगु निर्णय जूगु छम्ह मन्त्रीं धाःगु दु ।

अन्तर्राष्ट्रिय हवाई उडान धाःसा सर्तलिसें भाद्र १६ गतेनिसें न्ह्याकेत अनुमति ब्यूगु दु । सरकारं थ्वसिबें न्ह्यः न्हिथं ५०० म्ह जक हयेके बिइगु निर्णय याःगु खः । आइतवाःया बैठकय् परराष्ट्रमन्त्री प्रदीप ज्ञवाली, पर्यटनमन्त्री योगेश भट्टराई व श्रममन्त्री रामेश्वर रायं थुकियात अप्वयेकेमाःगु धारणा तःगु व उकी सैद्धान्तिक सहमति ब्यूगु दु ।

छम्ह मन्त्रीं ब्यूगु जानकारी कथं आः छुं नं कम्पनीं पीसीआर टेष्ट, होटल क्वारेन्टिन लिसेंया फुक्क खर्च ब्यहोरे यायेगु कथं नेपाःमि कामदारपिन्त नेपाः छ्वयाहये चाहेजूसां ५०० या कोटासिबें पिने नं हयेके बिइगु जुइ ।

लिसें विदेशी कामदार कायेगु निर्णय याःगु मुलुकया नितिं श्रम स्वीकृति खुल्ला यायेगु निर्णय तकं जूगु दु । मन्त्रिपरिषद् बैठकं ल्हासा व हंगकंगया नितिं महावाणिज्य दूत तकं नियुक्त याःगु दु ।

Categorized in राजनीति