kmc bidya

भाःतया हत्याय् कलाःम्हेसिगु ल्हाः !

नेवा: अनलाइन न्युज – ललेन्द्र शाक्य | २०७७ जेठ ५, सोमबार १४:५५:५९

विराटनगरया वासः व्यवसायी देवीप्रसाद दुलालया आइतवाः जूगु हत्याय् कलाःम्हेसिगु हे ल्हाः दूगु प्रहरीं निष्कर्ष पिकाःगु दु ।

सीम्ह लुयावयेधुंकाः अनुसन्धान न्ह्याकूगु प्रहरीं कलाःम्ह मीना श्रेष्ठ दुलालया हे योजनाय् हत्या जूगु निष्कर्ष पिकाःगु खः । अयसां थ्व विषय पत्रकार सम्मेलन यानाः जानकारी बिइगु धाःगु दु ।

हत्याय् दुथ्याःगु द्वपनय् प्रहरीं सीम्ह दुलालया कलाः मीनालिसें मेम्ह मिजं ब्रम्हदेव साहयात गिरफ्तार याःगु दु । गिरफ्तारीइ लाःम्ह साह दुलालं संचालन यानातःगु मां देवी पाथीभरा फर्माया पूूर्व कर्मचारी खः ।

विराटनगर महानगरपालिका १० मधुमारा च्वनाः वयाच्वंम्ह सुनसरी खनारया ३३ दँया दुलाल अचेत जूगु धासें शनिवाः चान्हय् थ्यंमथ्यं ३ ता इलय् कलाःम्ह मीना श्रेष्ठ दुलालं गोल्डेन अस्पताल हःगु खः । अस्पतालं चान्हय् हे सीधुंकूगु धाःगु खः ।

प्रहरी स्रोतया कथं साह व थः कलाः मीनाया अवैध स्वापूया बारे दुलां छुं दिं न्ह्यः सीकूगु खः । वधुंकाः इपिं दथुइ ल्वापु अप्वयाः वःगु खः । भाःतलिसे ल्वापु जुइगु अप्वयेधुंकाः कलाःम्ह मीनाया हे योजनाय् हत्या जूगु प्रहरीया प्रारम्भिक निष्कर्ष दु ।

मोरङया प्रहरी उपरीक्षक विश्व अधिकारीं कलाःम्हलिसें मेम्ह छम्ह मनूयात नियन्त्रणय् काःगु पुष्टि याःगु दु । गिरफ्तारीइ लाःम्ह मनू लहान छेँ जुयाः आः विराटनगरय् च्वनाः वयाच्वंम्ह खः ।

खिपतं ककुइ चिनाः हत्या !

शनिवाः चान्हय् दुलालया छेँय् वासः व्यवसायी हरिमोहन श्रेष्ठ व धनबहादुर काफ्ले थ्यंकूगु खः । निम्हं बहनी थ्यंमथ्यं ९ ता इलय् दुलालया छेँपाखें पिहाँ वंगु खः । पासापिं पिहाँ वनेधुंकाः दुलाल ब्यागलं खाताय् द्यंगु खः । कलाःम्ह मीना व ८ दँ दुम्ह काय् मेगु खाताय् द्यंगु खः ।

देनाच्वंगु इलय् दुलालया हत्या जूगु प्रहरीया निष्कर्ष दु । प्रहरीं हत्याय् छ्यःगु खिपः दुलाललया छेँ लिक्क झाःलय् लुइकूगु खः ।

दुलालया ककुइ खिपतं चिनाः वच्चूगु दाग व कपालय् तसकं घाः जूगु दु । कपाःया घाः धाःसा प्रतिकार यायेत्यंबलय् खाताय् हानाः जूगु प्रहरीं धाःगु दु ।

दुलालया कलाः मीनां धाःकथं चान्हय् २ः४१ ता इलय् दनाः स्वयाबलय् दुलाल अचेत अवस्थाय् लानाच्वंगु खः । भाःत अचेत जुइधुंकाः मीनां जलाखला व दुलालया पासापिन्त खबर यानाः चान्हय् थ्यंमथ्यं ३ ता इलय् एम्बुलेन्सय् तयाः गोल्डेन अस्पताल थ्यंकूगु खः ।

दुलालया छेँ सुनसरी खनार खः । तर थ्यंमथ्यं ६ दँ न्ह्यः दुलाल विराटनगरय् च्वनाः मां देवी पाथीभरा फर्मा संचालन यानाः वयाच्वंम्ह खः । दुलालं मीना श्रेष्ठलिसे मतिना ब्याहा (प्रेम विवाह) याःगु खः ।

Categorized in दुर्घटना-अपराध