nepal investment baink

भाःतम्हं नेपालं मिसा छ्वइगु, कलाःम्हं कतारय् न्यागू लखं मिइगु !

नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व चतुर्थी (२०८१ असार २६ गते) बुधवाः

वैदेशिक रोजगारीया नितिं धासें भाःतम्हं नेपाःपाखें मिसा कतारय् छ्वइगु व कतारय् कलाःम्हं मिइगु यानाच्वंगु सीदूगु दु ।

मानव बेचबिखन अनुसन्धान ब्युरोया पुचलं सिन्धुपाल्चोकया जुगल गाउँपालिका ३ या ३२ दँया ङेमा लामायात ज्वनाः अनुसन्धान याःबलय् उगु विषय सीदूगु खः ।

ब्युरोया एसपी व प्रवक्ता गौतम मिश्रया कथं कतार छ्वयेगु नितिं नक्कली भ्वँतकं दयेकेगु यानाच्वंगु सीदूगु दु । ङेमां थः कलाः नं कुवेतय् दूगु व बांलाःगु ज्या व मासिक ५० हजार तका दां आम्दानी जुइगु धासें प्रलोभनय् लाकाः कतारय् मिसा छ्वयेगु यानाच्वंगु दाबी ब्युरों याःगु दु ।

थ्वहे शैलीइ छम्ह मिसायात वर्किङ भिसाय् क्लिनया ज्या धासें ५ कार्तिक २०८० स ९५ हजार तका दां कयाः ङेमां कतार छ्वःगु सीदूगु दु । कतारया हे एअरपोर्टय् ङेमाया कलाः नं उम्ह मिसायात रिसिभ यानाः कुवेती नागरिकया छेँय् ५ लख तका दामं म्यूगु सीदूगु मिश्रं धाःगु दु ।

वधुंकाः कुवेती नागरिकं बन्धक यानाः घरेलु कामदारया रुपं तयेगु पारिश्रमिक तकं मबिइगु व यौन शोषण याइगु यानाच्वंगु सीदूगु ब्युरों जानकारी ब्यूगु दु । स्वला लिपा उम्ह मिसा बिस्युं वयाः कुवेतय् च्वंगु नेपाली दूतावास थ्यंकूगु खः ।

तर, एजेन्ट अफिसं छेँपाखें थः यत्थें बिस्युं वःगु धासें प्रहरीइ उजुरी दर्ता याःगु खः । प्रहरीइ उजुरी लायेधुंकाः उम्ह मिसा स्वन्हु थुनाय् च्वनाः ५७ हजार नेपाली दां पुलाः थुनामुक्त जूगु खः ।

थुनामुक्त जुइधुंकाः दूतावासं दयेकाब्यूगु ट्राभल डकुमेन्टपाखें उम्ह मिसा २९ माघ २०८० स नेपाः थ्यंकूगु खः । वधुंकाः ब्यूगु जाहेरीया आधारय् ङेमा लामायात ज्वनाः मानव बेचबिखनया द्वपनय् न्यान्हुया म्याद कयाः अनुसन्धान न्ह्यःने यंकूगु दु ।

Categorized in दुर्घटना-अपराध