2565 buddha Jayanti ADV

भर्च्युअलपाखें दकले न्हापांगुखुसि भीम तुलाधरया ‘दोष...’ म्यूजिक भिडियो सार्वजनिक (भिडियो)

नेवा: अनलाइन न्युज – ललेन्द्र शाक्य | २०७८ जेठ १८, मंगलबार १४:४६:२४

देसय् कोरोना भाइरस महामारीया हुनिं यानाः निषेधाज्ञाया ई जुयाच्वंगु दु । निषेधाज्ञाया ईयात छ्यलेगु नितिं थीथी खलः पुचः लिसें व्यक्तिपिन्सं जूम एपलिसें थीथी एपपाखें भर्च्युअल मिटिङ्ग, अनलाइन क्लास लिसेलिसें थीथी ज्याझ्वःत न्ह्याकाः वयाच्वंगु दु । 

थ्वहे झ्वलय् थौं मंगलवाः सुथय् थथेहे जूम एपपाखें नांजाःम्ह पपस्टार भीम तुलाधरया ‘दोष...’ बोलया म्येया म्यूजिक भिडियो भर्च्युअलपाखें सार्वजनिक जूगु दु । थथे भर्च्युअलपाखें म्यूजिक भिडियो सार्वजनिक ज्याझ्वलय् ब्वति कयादीं सकलसिनं हे भच्र्युअलपाखें म्यूजिक भिडियो सार्वजनिक जूगु दकले न्हापांगुखुसि भीम तुलाधरया ‘दोष...’ म्येया म्यूजिक भिडियो खः धकाः धाःगु दु ।

म्यूजिक भिडियो सार्वजनिक ज्याझ्वलय् अमेरिकाय् च्वनाः वयाच्वनादीम्ह बरिष्ठ संगीतकःमि पप किङ्ग ओमविक्रम विष्ट मूपाहाँ कथं उपस्थित जुयादीगु खःसा वय्कलं हे भीम तुलाधरया ‘दोष...’ म्ये सार्वजनिक जूगु उद्घोष यानाः उलेज्या यानादीगु खः । 

संचारकःमि बिराजकाजी राजोपाध्यायं न्ह्याकादीगु उगु म्यूजिक भिडियो सार्वजनिक ज्याझ्वलय् संगीत ख्यःलिसे सम्बन्धित आपालं व्यक्तित्वपिन्सं ब्वति काःगु खःसा भीम तुलाधर, भीम तुलाधरया सार्वजनिक जूगु म्येप्रति लिसेलिसें थःथःगु व्यक्तिगत नुगःखः तयादीगु खः । 

ज्याझ्वलय् नांजाःपिं सांगितिक स्टारपिं जेम्स प्रधान, संजय श्रेष्ठ, बबिन प्रधानलिसें ‘दोष...’ म्येय् सेक्सोफोन बाजा पुयादीम्ह बरिष्ठ संगीतकःमि शुभबहादुर लिसेलिसें आपालं संगीतकःमिपिनिगु उपस्थिति दूगु खः ।

आः पपस्टार भीम तुलाधरया ‘दोष...’ म्ये भीम तुलाधरया हे युट्युब च्यानलय् अपलोड जुइधुंकूगु दु ।

(थन क्लीक यानाः भीम तुलाधरया ‘दोष...’ म्यूजिक भिडियो स्वयादिसँ)

४० या दशकय् अतिकं लोकंह्वाःगु ‘दि इन्फ्ल्युन्स ब्याण्ड’या मू गायक भीम तुलाधरया ‘भनिदेऊ मायालु...’ लिपा २०४६/०४७ सालपाखे ‘जिजीविषा’ म्येचाः पिदंगु खः । थुगु म्येचाः अतिकं लोकंह्वाःगु खः । थ्वहे म्येचाः दुने दुथ्याःगु छपू म्ये ‘दोष म कस्लाई दिऊँ, यो भाग्यलाई दिऊँ या तिमीलाई...’ म्ये नं अतिकं लोकंह्वाःगु खःसा आः थ्वहे म्येया म्यूजिक भिडियो सार्वजनिक जुइगु जूगु दु । 

भेट्रान पपस्टार भीम तुलाधरं जानकारी बियादी कथं थुगु म्ये रिमेक कथं न्हूगु बाखंया आधारय् व न्हू ढंगया स्क्रीप्टया आधारय् म्यूजिक भिडियोया रुपं पिदंगु दु । 

न्हापा बि.सं.२०४६/०४७ पाखे ‘जिजीविषा’ म्येचाः दुने पिदनेत्यंगु म्यूजिक भिडियोया म्ये ‘दोष’ भुपालमान सिंहं संगीत संयोजन यानातःगु खःसा आः रिमेक कथं भुपेन्द्र बज्राचार्यया संगीत संयोजनय् पपस्टार तुलाधरं हालादीगु खः ।

थ्व म्ये ‘दोष...’या विषयस भीम तुलाधरं धयादी, ‘जिजीविषा म्येचाः पिथनेधुंकाः उगु इलय् थ्व म्ये अतिकं लोकंह्वाःगु व आपालं आपाः संगीतह्यःमिपिन्सं ययेकूगु म्ये खः, थ्व म्ये जिं स्वयं थःत नं अतिकं यःगु म्ये खः । उकिं आःया न्हूपुस्ताया ट्रेन्ड कथंया संगीत संयोजनय् हाकनं थःगु सलं रिकर्ड यानागु खः ।’

निरन्तर रुपं संगीत ख्यलय् पलाः न्ह्याकाः वयाच्वनादीम्ह पपस्टार भीम तुलाधरं आःतकया दुने दर्जनौं याकः म्येचाः पिथनाः बजारय् हयेधुंकूगु दुसा वय्कःया ‘सपनीमा’ व ‘जीजिविषा’ म्येचाः अतिकं लोकंह्वाःगु म्येचाः खः । अथेहे, तुलाधरया नेपालभाषाया म्येचाः ‘भीम तुलाधरया जः’ म्येचाः नं अतिकं लोकंह्वाःगु म्येचाः खः ।

मंगलवाः सुथय् सार्वजनिक जूगु म्यूजिक भिडियो म्ये ‘दोष’ म्येया म्येच्वमि कविन्द्रमान शाक्य व ओमहरी श्रेष्ठ खःसा लय् स्वयं गायक भीम तुलाधरं चिनादीगु खः । 

अथेहे, म्यूजिक भिडियोया परिकल्पना व निर्देशन रवि सायमिं यानादीगु दुसा भवानी शिलाकारं क्यामेरा पर्सनया भाला कुबियादीगु दु ।

थ्वहे झ्वलय् म्यूजिक भिडियोया सम्पादन व पिथना वाइल्ड बुल्स प्रोडक्सनया दुसा म्यूजिक भिडियोय् निरोज शाक्य व डान्सिङ्ग क्वीन आराध्यालक्ष्मी खड्गीं जीवन्त अभिनय यानादीगु दुसा स्वयं आराध्या लक्ष्मी खड्गीं हे भिडियोया कोरियोग्राफी यानादीगु दु ।

Categorized in कला