Header Nepal rastra bank Adv

भरतपुरय् प्रचण्ड भेटघाटय्, मौन अवधिइ मतदाता प्रभावित याःगु एमालेया द्वपं

नेवा: अनलाइन न्युज – ललेन्द्र शाक्य | २०७९ बैशाख २९, बिहिबार १६:१०:०६

नेकपा माओवादी केन्द्रया नायः पुष्पकमल दाहाल प्रचण्ड व संघीय सरकारया मन्त्रीपिन्सं निन्हु न्ह्यःनिसें चितवनय् च्वनाः मतदाता लिच्वः लाकूगु धासें नेकपा एमालें आपत्ति प्वंकूगु दु ।

बुधवाः चितवन थ्यंकूम्ह प्रचण्ड, श्रम रोजगार व सामाजिक सुरक्षामन्त्री किसान श्रेष्ठ, महिला बालबालिका मन्त्री उमा रेग्मी, राज्यमन्त्री उमेश श्रेष्ठं मौन अवधिइ निर्वाचन आचारसंहिता तकं च्यूताः मतःसे सरकारी गाडीया दुरुपयोग यासें छेँय् छेँय् थ्यंकाः मतदाता प्रभावित याःगु एमालें जानकारी ब्यूगु दु ।

भरतपुरया मतदाता तकं जुयाच्वंम्ह नेकपा माओवादी केन्नद्रया नायः प्रचण्डं भरतपुर १० य् च्वंगु रेनुु दाहालया छेँय् भेटघाट यानाच्वंगु दु । बुधवाः न्हिनय् ४ ता इलय् भरतपुर थ्यंकूम्ह प्रचण्डं बिहिवाः सुथय् माडीइ होटल प्याराडाइजय् उम्मेदवार व स्थानीय नेतापिन्त नापलायेगु ज्या याःगु खः ।

बागमती प्रदेशया मन्त्रीपिं घनश्याम दाहाल, मिलनबाबु श्रेष्ठ, बलराम पौडेल व कृष्ण खनाल नं भरतपुरय् हे दु ।

चितवनया भरतपुर महानगरपालिकाया मेयरय् मू प्रतिस्पर्धीइ नेकपा एमालेया विजय सुवेदीव नेकपा माओवादी केन्द्रपाखें रेनु दाहाल जूगु  दु ।

नेकपा एमालें मन्त्री किसान श्रेष्ठ व राज्यमन्त्री उमेश श्रेष्ठं मतदाता प्रभावित यायेत आर्थिक चलखेल याःगु सुचं वःगु धासें छानविन यायेत माग याःगु दु ।

जिल्ला नायः रामप्रसाद न्यौपानें सार्वजनिक याःगु विज्ञप्तिइ धयातःगु दु, ‘मन्त्री किसान श्रेष्ठ व उमेश श्रेष्ठं भरतपुर महानगरपालिकादुने आर्थिक चलखेल याःगु धैगु सुचं वःगुलिं आवश्यक छानविन यानाः उगु ज्या तुरुन्त पनेत नेकपा एमाले चितवन जोडदार माग यानाच्वना ।’

राज्यया उच्च तहलय् दुपिं व्यक्ति हे मौन अवधिइ  मतदाता प्रभाविवत यायेत्यंबलय् निर्वाचन निष्पक्ष जुइगुलि गम्भीर शंका ब्वलंगुु एमालें धाःगु दु ।

जिल्ला नायः न्यौपानें धाःगु दु, ‘आचारसंहिता गम्भीर उल्लंघन याःगु नेकपा माओवादी केन्द्र व नेपाली कांग्रेसया भरतपुर महानगरपालिका व माडी नगरपालिकाया उम्मेदवारपिनिगु उम्मेदवारी रद्द यायेगु प्रक्रिया तकं न्ह्यःने यंकेत निर्वाचन आयोगया ध्यानाकर्षण यानाच्वना ।’

नेकपा माओवादी केन्द्रया जिल्ला कजि रामचन्द्र अधिकारीं प्रचण्ड व मन्त्रीपिं चितवनया हे मतदाता जूगुलिं मतदान यायेत वःगु धाःगु दु । वं धाःगु दु, ‘छम्ह नेता वइबलय् नेता कार्यकर्तां नापमलाइ ला ? छम्ह नेता वइबलय् अन दुपिं मन्त्रीपिं भेटघाट हे याये मज्यू ला ? जनतायात जक प्रभावित मयायेगु खः । नेता ला नाप हे लाइ नि ।’

एमालें प्रचण्ड व संघीय सरकारया मन्त्रीपिं किसान श्रेष्ठ व उमा रेग्मी व राज्यमन्त्री उमेश श्रेष्ठयात आचारसंहिता उल्लंघन याःगुलिं कारवाही यायेत माग यासें चितवन ज्याकुथिइ उजुरी नं ब्यूगु दु ।

Categorized in राजनीति