1142 nhoo dan adv

ब्वनेकुथि यौन शिक्षा गुलि आवश्यक ?

२०७२ भाद्र २७, आइतबार १४:३६:५२

नेपाः गांया गां दुगु अशिक्षित वर्ग आपा दुगु देय् खःसा थनया सामाजिक व सांस्कृतिक संरचनाया कारणं नं थन यौनया विषयलय् खुलस्त जुया खँ ल्हाये फइगु अवस्था आःतक नं मदु । मस्तय् थःम्हं मस्यूगु खँत सयेके सिइके यायेगु थाय् मदु । अथे जूगुलिं मस्तय्त स्कूलय् हे यौन शिक्षा बिइमाः धइगु खँ वयाच्वंगु दु । 

यौन छगू प्राकृतिक नियम खः । थ्व सकसिया नितिं हे आवश्यक खँ खः । तर नं थुकिया विषयलय् ज्ञांया म्होतिं थीथी कथंया समस्या ब्वलने फु । अथे जूगुलिं यौनजन्य समस्यापाखें बचय् जुइगु नितिं यौन शिक्षा आवश्य जू धाइपिनिगु पुचः नं थन मदुगु मखु ।

सरकारं कक्षा ८ निसें यौनशिक्षा बिइगु छुं कुतः याःगु खःसां उकी यौनयात शरीर विज्ञानया छगू ब्वया रुपय् जक कयातःगु दु । मस्तय्गु नुगलय् बुयावःगु यौन जिज्ञासा, शरीरय् वयाच्वंगु ह्यूपाः, इमित वयेफूगु यौनजन्य समस्याया समाधान गुकथं यायेगु धइगु थौं हाथ्याया रुपय् वयाच्वंगु दु । 

उकें हे उमिसं मस्यूगु कारणं अज्ञानतावश मखुगु लँपु ज्वनिगु नं उतिकं हे सम्भावना दु । थुज्वःगु अवस्थाय् स्कूलं निसें हे यौन शिक्षा तयेगु खँ जोडतोडं जुयाच्वंगु दु । 

नेपाःथें ज्याःगु यौनया खँ ल्हायेत तकं प्रतिबन्ध थें जुयाच्वंगु समाजय् स्कूलय् हे यौनशिक्षा तयेगु खँ छगू चुनौतिया रुपय वयाच्वंगु दु । नेपाःया शहरी क्षेत्रया लागि यौनशिक्षा सामान्य आवश्कताया रुपय् खनेदुसां नं गामय् धाःसा थुकिं मेकथं हे लिच्वः लाकिगु ग्याःचिकु नं दयाच्वंगु दु । 

गुलिखे मनूतसें ला स्कूलय् यौनशिक्षा तयाबिल धाःसा थुकिं यानाः नेपाःसा सामाजिक संरचनाय् हे घाः लाइ धइगु बिचाः तयेगु याः । गुलिखे मनूतसें धाःसा मचाबलय्निसें हे उमिगु ध्यान यौनपाखे सालेगु यात धाःसा थुकिं यानाः अनैतिक यौन सम्बन्ध तयेगुलिइ ग्वाहालि जुइगु तकं धायेगु याः । उथें थन एड्स रोग व कण्डमया विज्ञापनय् यौन सम्बन्ध तःसां ज्यू तर कण्डमया प्रयोग अनिवार्य यायेमाः धयातःगुलिं नं थुज्वःगु सम्बन्ध तयेगु प्रवृत्ति अप्वयाच्वंगु दु ।

स्कूलय् यौन शिक्षा बिइगु धइगु हे विकृतिया विज्ञापन यायेगु खः धाइपिं नं दु । उज्वःपिन्सं मस्तय्त यौन शिक्षा बिइगु स्वयाः नं उमित बांलाःगु जीवन शैलीया बारे ज्ञान बिइमाः धइगु धापू तयेगु याः । 

तर आपा बुद्धिजीविपिनिगु धारणा धाःसा स्कूलय् यौन शिक्षा बिइमाः धइगु दु । उमिसं स्कूलया मस्तय्त यौन शिक्षा बिइगु यात प्रतिबन्ध तयेमज्यू तर उमित बिइगु शिक्षाया सामाग्री धाःसा सन्तुलित जुइमाःगु धापू तयेगु याः । 

नेपालय् म्होचा इलय् हे यौन सम्पर्क तयेगु बानीया विकास जुयाच्वंगु दु धाःसा म्होचा उमेरय् हे मां जुइगु प्रवृत्ति नं दयातुं च्वंगु दु । उथें हे एचआइभी÷एड्स थें ज्याःगु ग्यानापुगु ल्वय्या बिगबिगि नं दयाच्वंगु दु । 

थुज्वःगु अवस्थाय् मस्तय्त इलय् हे थुकिया बारे बांलाक्क ज्ञान मबिइगु खः धइगु जूसा उपिं उज्वःगु लँपुइ नं वनेगु गुकिया अन्त्य धइगु तसकं दुःखद् जक हे जुइ । 

थीथी यौन रोग बारे सचेत यायेगु लागि व उमिगु शरीरय् वयाच्वंगु स्वाभाविक ह्यूपाः छु–छु खः व अस्वाभाविक ह्यूपाः गुकथंया जुइ, सुरक्षित यौनसम्पर्क धइगु छु खः, असुरक्षित सम्पर्क जुल धाःसा गुज्वःगु लिच्वः वयेफु धइगु खँ बांलाक थुइकेगु लागि नं स्कूलय् बांलाक यौन शिक्षा बिइमाःगु खनेदयावःगु दु ।