नेवा: अनलाइन न्युज – ललेन्द्र शाक्य | २०७७ चैत्र १३, शुक्रबार १०:५१:२१

ब्राजिलय् कोरोना भाइरसया हुनिं सीपिनिगु ल्याः ३ लखं पुलेधुंकूगु बिहिवाः जानकारी ब्यूगु दु । अनया स्वास्थ्य अधिकारीपिन्सं ब्यूगु जानकारी कथं ब्राजिलय् कोरोनापाखें सीपिनिगु ल्याः ३ लख ६८५ म्ह थ्यंगु दु ।

ब्राजिलय् वंगु २४ घौ दुने ८९ हजार ९९२ म्हसिबें अप्वः कोरोना भाइरसया संक्रमित ल्वगि लुयावःगु नं उगु बुखँय् जानकारी ब्यूगु दु । ब्राजिलय् वंगु मंगलवाः कोरोना भाइरसया प्रकोपपाखें छन्हुं हे ३ हजार २५१ म्ह मनूत सीगु खः ।

थ्वसिबें न्ह्यः थ्वहे मार्चया २८ तारिखया दिं ब्राजिलय् कोरोना भाइरसपाखें २ हजार ८४१ म्ह मनूत सीगु खःसा उगु ल्याः हे छन्हुं दकले अप्वः मनूत सीगु जानकारी ब्यूगु दु ।

ब्राजिलय् लिपांगु दिनय् कोभिडया हुनिं सीपिनिगु ल्याः अप्वयाः वंगु अनया अधिकारीपिन्सं जानकारी ब्यूगु दु । ब्राजिल अमेरिका लिपा कोरोनापाखें सीपिनिगु ल्याःया आधारय् निगूगु दकले अप्वः लिच्वः लाःगु मुलुक खः ।

लिपांगुखुसि अन भाइरसया न्हूगु प्रजाति नं लुयावःगु व झन् तःधंगु ल्याखय् संक्रमित लुयावःगु बुखँय् जानकारी ब्यूगु दु ।

अनया अस्पतालय् अतिकं तःधंगु ल्याखय् संक्रमित दुसा लिपांगु दिनय् आइसीयूस दुपिं नागरिकया ल्याः नं आपालं जूगु धाःगु दु ।

Categorized in अन्तर्राष्ट्रिय