nepal investment baink

ब्राजिलया पूर्व फुटबलर रोबिन्होयात बलात्कार द्वपनय् गुदँ जेल सजायँ

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व त्रयोदसी (२०८० चैत्र ९ गते) शुक्रवाः

ब्राजिलया पूर्व फुटबलर रोबिन्होयात बलात्कार अभियोगय् ब्राजिलया अदालतं गुदँया जेल सजायँ न्यंकूगु दु ।

सन् २०१३ स २२ दँया अल्बानियाई मिसायात इटलीइ सामूहिक बलात्कार याःगु अभियोगय् वयात अदालतं दोषी ठहर याःगु खः ।
थ्वसिबें न्ह्यः सन् २०१७ स इटलीया अदालतं नं वयात दोषी ठहर यासें गुदँया हे जेल सजायँ न्यंकूगु खः । उगु इलय् व एसी मिलानया नितिं म्हितीम्ह खः ।

इटलीया अदालतं सजायँ न्यंके न्ह्यः हे व ब्राजिल लिहाँ वनेधुंकूगु खः । वधुंकाः इटलीं ब्राजिलयात रोबिन्हो विरुद्ध एक्सन कायेत धाःगु खः ।

स्काई न्यूजया रिपोर्ट कथं इटलीया इनाप लिपा ब्राजिलया छगू अदालतं वयात गुदँया जेल सजायँ न्यंकूगु खः । वं ब्राजिलय् हे जेल सजायँ फयेमाःगु फैसला अदालतं याःगु स्काई न्यूजय् न्ह्यथनातःगु दु ।

रोबिन्होयात जेल सजायँ जुइगु कि मजुइगु धैगु विषयस ब्राजिलया सुपेरियर कोर्ट अफ जस्टिसया न्यायाधीशदथुइ मत विभाजन जूगु खः । मुक्कं झिगू भोटमध्ये जेल सजायँ जुइमाः धैगु पक्षय् च्यागू भोट व विपक्षय् निगू भोट लाःगु खः ।

रोबिन्होया वकिल जोस एडुआर्डो एल्कमिनं थ्व फैसलाविरुद्ध सर्वोच्च अदालतय् पुनरावेदन यायेगु धाःगु दु ।

रोबिन्हों ब्राजिलपाखें सच्छिक्वः अन्तर्राष्ट्रिय कासा म्हितूगु दु । व प्यदँतक रियल मड्रिडय् दुबलय् रियलं निक्वःतक ला लिगा च्याम्पियनसिपया उपाधि त्याकूगु खः । वधुंकाः सन् २००८ स ३२.५ मिलियन युरोय् व म्यानचेस्टर सिटीइ वंगु खः ।

Categorized in कासा