prabhu baink new

ब्राजिलयात त्याकल भारतं, कोरोना प्रभावित दोस्रो मुलुक जुल भारत

नेवा: अनलाइन न्युज – ललेन्द्र शाक्य | २०७७ भाद्र २२, सोमबार १३:००:४१

कोरोना भाइरस कोभिड १९ पाखें संक्रमित जूपिं मनूतय्गु ल्याःया आधारय् भारत हलिंया निगू दकले अप्वः प्रभावित मुलुक जूगु दु । संक्रमित ल्याःया आधारय् ब्राजिलयात ल्यूने लाकाः भारत निगूगु थासय् थाहाँ वंगु खः ।

भारतया स्वास्थ्य मन्त्रालयया कथं आःतक भारतय् कोरोना भाइरसया हुनिं संक्रमित जूपिनिगु ल्याः ४२ लख ४ हजा ६१४ म्ह थ्यंगु दु । लिपांगु २४ घौ दुने जक भारतय् कोरोना भाइरसया ९० हजार ८०२ म्ह न्हूपिं संक्रमित थप जूगु दु । ब्राजिलया स्वास्थ्य मन्त्रालयया कथं आःतक ब्राजिलय् कोरोना भाइरसया ४१ लख ४० हजार पुलेधुंकूगु दु ।

भारतय् कोरोना भाइरसया हुनिं सीपिनिगु ल्याः नं ७१ हजार ६४२ थ्यंगु दु । लिपांगु २४ घौ दुने जक भारतय् कोरोना भाइरसया हुनिं १ हजार १६ म्ह मनूत सीगु दु ।

सीपिनगु ल्याःया आधारय् धाःसा भारत स्वंगूगु थासय् लानाच्वंगु दु । ब्राजिलय् आःतक कोरोना भाइरसया हुनिं १ लख २६ हजार ६५० म्ह मनूत सीधुंकूगु दु ।

आःतक भारतय् कोरोना भाइरसया ३२ लख ५० हजारसिबें अप्वः संक्रमित वासः यानाः लंकाः डिस्चार्ज जुइधुंकूगु दु । भारतय् आः ८ लख ८२ हजारसिबें अप्वः संक्रमित वासः यानाच्वंगु दु ।

Categorized in अन्तर्राष्ट्रिय