coved ad

बौद्ध विद्धान प्रा. सुवर्ण शाक्यया ‘व्यवहारय् बुद्धया खँनापया जः’ चिनाखँ मुना सफू पितब्वज्या

नेवा: अनलाइन न्युज – ललेन्द्र शाक्य | २०७८ कार्तिक १७, बुधबार १५:१९:११

बौद्ध विद्धान प्रा. सुवर्ण शाक्यया च्वसां पिज्वःगु ‘व्यवहारय् बुद्धया खँनाप जः’ चिनाखँ सफू पितब्वज्या जूगु दु ।

नेपाल संवत ११४२ न्हूदया लसताय् भिंतुना कालबिल ज्याझ्वःया नापनापं थुगु सफू उलेज्या जूगु खः ।

नेपाल संवत न्हूदँ राष्ट्रिय समारोह समिति ११४२ या नायः निरञ्जनरत्न शाक्यया मूपाहाँसुइ न्ह्याःगु उगु ज्याझ्वलय् मूपाहाँ शाक्यं हे उगु सफू पितब्वज्या यानादीगु खः ।

ज्याझ्वः ग्वसाः खलः ओलम्पस क्लबया नायः नेवाः न्ह्यलुवाः पवित्र बज्राचार्यया सभानायःसुइ न्ह्याःगु खःसा ज्याझ्वलय् ओलम्पस क्लबया उपाध्यक्षलिसें सफू च्वमि प्रा. सुवर्ण शाक्यया किजा ज्योति शाक्यं लसकुस यानादीगु खः ।

ज्याझ्वलय् पाहाँ कथं नेवाः न्ह्यलुवाः साहित्यकार मल्ल के. सुन्दरलिसें पवित्र बज्राचार्य ,साहित्यका विमलप्रभा बज्राचार्य व मेमेपिं पाहाँ कथं उपस्थित जुयादीगु खः । अथेहे, ज्याझ्वलय् प्रदेश ३ या सांसदलिसें पूर्व मुख्यमन्त्री अष्टलक्ष्मी शाक्यलिसें थीथी विशिष्ट व्यक्तित्वपिं विशेष पाहाँ कथं उपस्थित जुयादीगु खः ।

बौद्ध विद्धान प्रा. शाक्यं च्वयादीगु ३८ पु चिनाखँ दुथ्याःगु पितब्वज्या जूगु चिनाखँ सफू ‘व्यवहारय् बुद्धया खँनापया जः’यात कयाः पाहाँ मल्ल के. सुन्दरं सफूया विषयस समालोचना यानादीगु खः ।

समालोचना यायेगु झ्वलय् सुन्दरं पितब्वज्या जूगु सफू बौद्धदर्शन, धर्म, बुद्ध नेपाल नालावयाच्वंपिं नेपाःमिपिनिगु दथुइ दयेमाःगु एकात्मक समन्वयया उपज जूगु नुगःखँ तयादिल ।

अथेहे, साहित्यकार विमलप्रभा बज्राचार्यं नं पिदंगु उगु सफूया विषयस बःचाधंक समीक्षा यानादीगु खः ।

ज्याझ्वलय् मूपाहाँ नेपाल संवत न्हूदँ राष्ट्रिय समारोह समिति ११४२ या नायःलिसें साहित्यकार म्येच्वमि निरञ्जन रत्न शाक्यं सफू च्वमि प्रा. सुवर्ण शाक्ययात सुभाय् देछासें थःगु नुगःखँ तयादीगु खः ।

येँया २३ वडाया ओमबहाःया ओलम्पस क्लबं ग्वसाः ग्वःगु उगु ज्याझ्वः थौं ने.सं. ११४२ कौलागा त्रयोदसी (कार्तिक १७ गते) बुधवाः येँया २३ वडाय् च्वंगु हे ओलम्पस ख्यः नःबही दुने जूगु खः ।

ज्याझ्वलय् २३ वडाया वडा नायःलिसें ग्वसाः खलः ओलम्पस क्लबया दुजः मचाराजा महर्जनं सुभाय् न्वचू बियादीगु खः ।

(थन क्लीक यानाः भिडियो स्वयादिसँ)

Categorized in नेवाः