2565 buddha Jayanti ADV

बौद्ध घटनाय् डिएनए परीक्षण यायेगु तयारी

नेवा: अनलाइन न्युज – ललेन्द्र शाक्य | २०७८ जेठ २५, मंगलबार १४:४४:२५

बौद्धया टाउन प्लानिङय् प्लाष्टिकया बोरा दुने लुयावःगु तुति मिजं वा मिसा सुयागु खः धैगु सीमदुनि । लिंग म्हसीकेगु नितिं प्रहरीं डिएनए परीक्षण याकेगु तयारी याःगु दु ।

प्रहरी वृत्त बौद्धया डिएसपी नविन कार्कीं धाःगु दु, ‘तुति जक लुयावःगुलिं मिसा वा मिजं छुटेयायेत नं थाकुल, डिएनए परीक्षण यायेगु तयारी दु ।’ मंगलवाः सुथय् ७ ता इलय् मनूया तुति लुयावयेधुंकाः प्रहरी पुचः घटनास्थलय् थ्यंकूगु खः ।

येँ प्रहरी प्रमुख एसएसपी अशोक सिंहया कथं घटना गम्भीर प्रकृतिया जूगुलिं त्रिवि शिक्षण अस्पताल, महाराजगञ्जपाखें फरेन्सिक विज्ञया पुचः नं सःतूगु खः । टोलीं नं डिएनए परीक्षण यायेमाःगु सुझाब ब्यूगु दु ।

एसएसपी सिंहं धाःगु दु, ‘तुति मिं नयातःगु अवस्थाय् जूगुलिं नं लिंग छुटेयायेत थाकूगु खः । उमेर समूह धाःसा क्वँय्या परीक्ष्ँणपाखें सीदइ धैगु आशाय् दु ।’

मिसिङ केस पुइकूसें प्रहरी

फरेन्सिक डाक्टरपिन्सं तुति कम्ती नं निवाः न्ह्यःया जुइफूगु अनुमान याःगु दु । इमिसं तुति ल्यायम्हया जूगु नं धाःगु दु । वहे आधारय् प्रहरीं तंपिं मनूतय्गु फाइलत पुइकेगु सुरु याःगु दु ।

घटनाबारे सिइकेधुंकाः थःथितिपिं दुपिं मनूत थः हे नं प्रहरीया सम्पर्कय् वनेगु यानाहःगु दु । येँया एसएसपी सिंहं धाःगु दु, ‘तंगु केशत नं स्वयाच्वनागु दु, आःतक छुं नं सुराक ल्हाःतय् लाःगु मदुनि ।’

प्रहरी म्यानुअल्ली सीम्हया मेमेगु भाग मालेगु ज्याय् ब्वां जूगु दु । अनुसन्धानय् दुथ्याःम्ह छम्ह अधिकृतं धाःगु दु, ‘शंकित क्षेत्रय् खोजतलास नं जारी यानागु दु ।’ सीम्हया छ्यं लुयावःगु जूसा, प्रहरीयात सनाखत यायेत सहज जुइगु खः । अनुसन्धानं नं गति काइगु खः । तर, सीम्हया कुचा जक लुयावःबलय् प्रहरी अनुसन्धानय् जटिलता वःगु दु ।

वंगु दँ याःगु लकडाउनया इलय् नं ख्वपय् छ्यं मदुम्ह मिसाया सीम्ह लुयावःगु खः । आःतक सीम्हया सनाखत जुइफूगु मदुनि ।

Categorized in दुर्घटना-अपराध