zero media family planning adv

बोर्डं माग यात नखःचखःया किपाः, उत्कृष्ट न्याम्हेसित नगद सिरपाः

नेवा: अनलाइन न्युज – ललेन्द्र शाक्य | २०७७ भाद्र ३१, बुधबार १३:२५:३२

नेपाल पर्यटन बोर्डं नियमित किपाः सिरिज कासा अन्तर्गत नखःचखःयात लक्षित यानाः कासा न्ह्याकीगु जूगु दु । नखःचखःया इलय् विगतया दिनय् थें आत्मियपिंलिसे ई बिइमफुसां नं सकारात्मक व सृजनशील अनुभूति बिइगु आज्जुं कासा ग्वसाः ग्वयागु जानकारी बोर्डं ब्यूगु दु ।

कासाय् वइगु मंसीर १० गतेतक कम्ती नं ७ पाः ब्यागलं ब्यागलं किपाः छ्वयाहयेमाःगु नियम पर्यटन बोर्डं दयेकूगु दु । बोर्डया किपाः अभियानया साइट फोटो नेपाल डट ट्राभल साइटय् वनाः किपाःत अपलोड यायेफइ । उत्कृष्ट न्याम्ह सहभागीपिन्त म्हतिं १० द्वः १० द्वः तका दां सिरपाः बिइगु बोर्डं जानकारी ब्यूगु दु ।

बोर्डया कार्यकारी प्रमुख डा. धनञ्जय रेग्मीं विगतया किसा कासाय् उत्साहजनक सहभागिता खनेदूगु धासें कासायात निरन्तरता बियागु धाःगु दु । बोर्डं थथे वःगु उत्कृष्ट किपाःयात सांस्कृतिक पर्यटन प्रवद्र्धनया रुपं छ्यलीगु जूगु जूगु दु ।

नेपाल पर्यटन बोर्डं प्यदँ न्ह्यःनिसें किपाःया माध्यमं देसया पर्यटन प्रवद्र्धन यायेगु आज्जुया लिसें नियमित ह्यास फोटो नेपाल किपाः प्रदर्शनी यानाः वयाच्वंगु खः । फोटो नेपाल फेब्रुअरी २०१६ स टोनी हेगनया किपाः प्रदर्शनीलिसें सुरु जूगु खः ।

थ्व अभियान विस्तार यासें फोटो नेपाल डट ट्राभल सुरु याःगु खः । आः थुगु साइटय् ११ हजारसिबें अप्वः दुजःपिनिगुृ २५ हजार किपाः संग्रहित जुइधुंकूगु दु ।

Categorized in कला