zero media family planning adv

बैशाख ७ गतेनिसें येँय् जनबहाः द्यःया रथजात्रा न्ह्याइगु

नेवा: अनलाइन न्युज – ललेन्द्र शाक्य | २०७७ चैत्र २२, आइतबार ११:२६:२१

थ्वहे वइगु २०७८ बैशाख ७ गते तःजिक जनबहाः द्यःया रथजात्रा न्यायेकीगु जूगु दु । 

थौ आइतवाः सुथय् येँया प्रदीप्त पुस्तकालयस च्वंगु सहलह मुँज्या जनबहाः द्यःया रथजात्रा न्यायेकेगु क्वःछ्यूगु खः ।

जनबहाः द्यः रथजात्रा व्यवस्थापन समितिया नायःलिसें येँ महानगरपालिका २५ वडाया वडा नायः नीलकाजी शाक्यया सभापतित्वय् च्वंगु सहलह मुँज्याय् जात्रा व्यवस्थापन समितिया छ्याञ्जे सुजीव बज्राचार्यं वंगु दँय् कोरोना भाइरस संक्रमणया हुनि रथजात्रा स्थगित जूगु धासें थुगु दँय् गुगु नं परिस्थितिया सामना यानाः जनबहाः द्यःया रथजात्रा तःजिक न्यायेकेगु धकाः तःगु खँयात थीथी संघसंस्था व खलः पुचलं पारित याःगु खः ।

सहलह मुँज्याय् गुथि संस्थानया प्रमुख हरि सुवेदीया नं उपस्थिति दूगु खः । गुथि संस्थानं जनबहाः द्यःया रथजात्रा न्यायेकेगु नितिं समितिया निर्देशन कथं तयारी यायेगु जानकारी संस्थानया प्रमुख सुवेदीं जानकारी ब्यूगु दु । 

उगु सहलह मुँज्यां छन्हु निन्हु दुने औपचारिक रुपं जनबहाः द्यः रथजात्रा ११४१ व्यवस्थापन समितिया उपसमिति नीस्वनाः सार्वजनिक रुपं घोषणा यायेगु ज्याm्झ्वः नं तःगु दु ।

जनबहाः द्यःया रथजात्रा येँय् प्यन्हुतक न्ह्याइगु जात्रा खःसा थुगु जात्रा जुइवं स्वनिगःया थीथी लागाय् रथजात्रा न्ह्याकेगु याइ ।

Categorized in स्थानिय-समाज