ad prabhu

बैतडीया खोड्पेय् बस दुर्घटना : ९ म्ह सित

नेवा: अनलाइन न्युज – ललेन्द्र शाक्य | २०७७ कार्तिक २८, शुक्रबार १२:३२:३८

बैतडीया पाटन नगरपालिका ८ खोड्पेय् बस दुर्घटना जुयाः ९ म्ह मनूत सीगु दु ।

जिल्ला प्रहरी ज्याकुथि बैतडीया कथं दार्चुलाया गन्नापाखें महेन्द्रनगर वयाच्वंगु ना५ख ५१४१ ल्याःया बस बिहिवाः चान्हय् थ्यंमथ्यं १०ः३० ता ईपाखे खोड्पे बजार लिक्क दुर्घटना जूगु खः ।

दुर्घटनाय् लानाः ८ म्हेसिगु घटनास्थलय् हे व छम्हेसिगु वासः यायेगु झ्वलय् डडेल्धुरा अस्पतालय् सीगु खः ।

एसएसपी मुकेशकुमार सिंहया कथं सीपिंमये छम्ह प्रहरी जवान रणबहादुर चन्दया सनाखत जूगु दु । बैतडी छेँ दुम्ह चन्द दांगया हापुरे इलाका प्रहरी ज्याकुथिइ ज्या यानाच्वंम्ह खः । वया म्हसीका पौया आधारय् म्हसीकूगु एसएसपी सिंहं धाःगु दु ।

दुर्घटनाय् ३४ म्ह घाःपाः जूगु खः । घाःपाः जूपिनिगु डडेल्धुरा अस्पतालय् वासः जुयाच्वंगु दु । घाःपाः जूपिंमध्ये ७ म्हेसिगु अवस्था तच्वः जुयाच्वंगु एसएसपी सिंहं जानकारी ब्यूगु दु । इमित थप वासः यायेगु नितिं सेती प्रादेशिक अस्पताल धनगढी रिफर याःगु दु ।

बस बिहिवाः सनिलया ५ ता ईपाखे दार्चुलाया गन्नापाखें महेन्द्रनगरपाखे वंगु खः । लँपु पक्की जूसां नं घुम्ती लँपुइ चालकं सन्तुलन गुमेयाःगुलिं दुर्घटना जूगु अनुमान प्रहरीं याःगु दु । बस सतकं थ्यंमथ्यं ५ सय मिटर क्वय् कुतुंवंगु खः ।

Categorized in दुर्घटना-अपराध