नेवा: अनलाइन न्युज – ललेन्द्र शाक्य | २०७८ मङ्सिर ९, बिहिबार १३:११:५९

प्रहरीया केन्द्रीय अनुसन्धान ब्यूरों बैंकिङ कसूर मुद्दाया फरार प्रतिवादीयात ज्वंगु दु ।

गिरफ्तारीइ लाःम्ह येँ महानगरपालिका १० छेँ दुम्ह यल जिल्ला थसि (सिद्धिपुर) च्वनाः वयाच्वंम्ह ५१ दँया दुर्गा शाही सापकोटा खः ।

उच्च अदालत यलं सापकोटाविरुद्ध मंसीर १६ गते बैंकिङ कसूर मुद्दाय् ७ न्हु कैद व १३ लख ६५ हजार तका दां जरिवाना जुइगु फैसला न्यंकूगु खः ।

अदालतया फैसलालिपा फरार जुयाच्वंम्ह सापकोटायात यलया थसिइ सुलाच्वंगु अवस्थाय् केन्द्रीय अनुसन्धान ब्यूरोया पुचलं बुधवाः नियन्त्रणय् काःगु खः ।

थःगु खाताय् माक्व दां मदुसां नं सापकोटां २०७५ साल कार्तिक ६ गते रकम भुक्तानीया नितिं हिमालय बैंक लिमिटेडया चेक च्वयाब्यूगु खः ।

गिरफ्तारीइ लाःम्ह सापकोटायात फैसला कार्यान्वयनया नितिं बुधवाः येँ जिल्ला अदालतय् पेश याःगु ब्यूरों जानकारी ब्यूगु दु ।

Categorized in दुर्घटना-अपराध