coved ad

बेस्ट फिफा अवार्ड स्वम्हेसिगु नां सार्वजनिक : मेस्सी, लेवान्डोस्की व सालाह दथुइ धेंधेंबल्ला

नेवा: अनलाइन न्युज – ललेन्द्र शाक्य | २०७८ पौष २४, शनिबार ११:३५:१६

विश्व फुटबलया सर्वोच्च निकाय फिफां बिइगु दी बेस्ट फिफा अवार्डया मनोनयन सार्वजनिक जूगु दु । फिफां शुक्रवाः बेस्ट फिफा अवार्ड अन्तर्गत उत्कृष्ट कासामि, उत्कृष्ट प्रशिक्षक लिसेंया थीथी विधाय् लिपांगु स्वंगूगु थासय् लायेत ताःलाःपिं कासामि व प्रशिक्षकया धलः सार्वजनिक याःगु खः ।

बेस्ट अवार्ड मिजंपाखें लिपांगु स्वम्हय् २०२० या विजेता रोबर्ट लेवान्डोस्कीलिसें लिओनल मेस्सी व मोहम्मद सालाह दु ।

अथेहे, बेस्ट अवार्डया नितिं मिसापाखे साम केर, जेनिफर हेर्मोसो व एलेकिसया पुटेलास लाःगु दु ।

दँया मिजं प्रशिक्षकया लिपांगु मनोनयनय् पेप ग्वार्डीवाला, रोबर्टो मान्सिनी व थोमस टुचेल लाःगु दु । मिसा प्रशिक्षकपाखे लुइस कोर्टेस, एम्मा हाएस व सरिना विग्मान लाःगु दु ।

दँया गोलकिपर अवार्डया नितिं जियानलुजी डोनारुम्मा, म्यानुएल नुएर व इडुवार्ड मेन्डी लाःगु दु ।

अथेहे, दँया उत्कृष्ट गोल पुस्कास अवार्डया नितिं एरिक लोमेला, प्याट्रिक सिक व मेहदी तारेमी शीर्ष स्वंगूगु थासय् दु ।

फिफां फुक्क अवार्डया विजेताया नां थ्वहे जनवरी १७ स घोषणा याइगु जूगु दु ।

फिफां दुजः राष्ट्रया कप्तान, प्रशिक्षक, कासा पत्रकार व समर्थकया भोटया आधारय् फिफा दँ कासामि घोषणा यायेगु यानाः वयाच्वंगु दु ।

Categorized in कासा