city axpris 2

बेलायत रोजगारीइ वनेत अन्तर्वार्ताया नितिं ७१ म्ह नर्स ल्यल

नेवा: अनलाइन न्युज – ललेन्द्र शाक्य | २०८० मङ्सिर १२, मंगलबार ११:३६:४२

बेलायतय् रोजगारीया नितिं ७१ म्ह नेपाली नर्स अन्तर्वार्ताया नितिं ल्यज्या जूगु दु ।

नेपाल सरकार वैदेशिक रोजगार विभागं अनलाइन फाराम भरेयाःपिंमध्ये अन्तर्वार्ताया नितिं ७१ म्ह नर्सपिन्त ल्यज्या यानाः नां सार्वजनिक याःगु खः । गुकी १० म्ह नेवाः नर्सपिं दुथ्याःगु दु ।

अन्तर्वार्तालिपा बेलायत वनीपिनिगु लिपांगु नां सार्वजनिक याइगु जूगु दु । प्रारम्भिक धलखय् नां पिहाँ वःपिं नर्सपिन्त अन्तर्वार्ताया नितिं डिसेम्बर ४ निसें ७ तारिखतक सःतूगु दु ।

बेलायतया स्वास्थ्य क्षेत्रय् नेपाली नर्सपिन्त पदस्थापन यायेगु कथं नेपाल व बेलायत सरकारदथुइ वंगु भाद्र महिनाय् सम्झौता जूगु खः ।

नेपाल व बेलायत सरकारदथुइ निगूपक्षीय श्रम सम्झौता कार्यान्वयन सम्बन्धी कार्ययोजना मन्त्रिपरिषद्पाखें स्वीकृत जुइधुंकाः श्रम मन्त्रालयं न्हापांगु चरणय् १०० म्ह नर्सिङ स्टाफ बेलायत छ्वयेगु प्रक्रिया न्ह्यःने यंकूगु खः । वकथं १०० म्ह नर्सया नितिं अनलाइन आवेदन आह्वान याःगुलि ७१ म्ह नर्स जक अन्तर्वार्ताया नितिं ल्यज्या जूगु खः ।

Categorized in लजगाः