zero media family planning adv

बेनीको बजार...या म्येहालामि श्रेष्ठ मन्त

नेवा: अनलाइन न्युज – ललेन्द्र शाक्य | २०७७ चैत्र १३, शुक्रबार १४:०२:२५

म्याग्दीया सदरमुकाम बेनीयात राष्ट्रिय, अन्तर्राष्ट्रिय रुपं म्हसीकेत ताःलाःगु फुक्कसिगु म्हतुइ थाःगु ...बेनीको बजार जता मायाँ उतै छ नजर..., किरेमिरे जालेरुमाल...बोलया म्येया सर्जक व गायक टीकाबहादुर श्रेष्ठ मन्त ।

जन्म जूगु थाय् म्याग्दीपाखें बसाइँ सरेजुयाः रुपन्देहीइ बसोबास यानाः वयाच्वंम्ह श्रेष्ठ ७५ दँया उमेरय् म्हिगः बिहिवाः बुटवल अस्पतालय् मदुगु खः ।

...बेनीको बजार जता मायाँ उतै छ नजर...बोलया म्ये श्रेष्ठं २०३१ सालय् रेडियो नेपालय् रेकडृ यायेधुंकाः हलिंन्यंकंया नेपाःमिपिनिगु दथुइ अतिकं लोकंह्वाःगु खः ।

मदुम्ह श्रेष्ठया जहान मन छन्त्याल व म्येच्वमि श्रेष्ठया सः दुथ्याःगु थुगु म्ये आःतक नं चर्चाय् वयाच्वंगु दु । थ्वहे म्येया आधारय् हे बेनी बजारयात मायालुया सहर धकाः तकं म्हस्यू ।

ताःईतक जँलास्य (मिर्गौला) ल्वचं समस्याय् लानाच्वंम्ह गायक श्रेष्ठं निरन्तररुपं डायलासिस यानाः वयाच्वंगु खः । श्रेष्ठ मदुगुलिं लोकसंगीत क्षेत्रय् अपूरणीय क्षति जूगु थुगु क्षेत्रय् पलाः तयाच्वंपिन्सं धाःगु दु ।

जँलास्य सम्बन्धी समस्याय् लानाच्वंसां तक. श्रेष्ठ सांगितिक क्षेत्रलिसे लिक्क च्वनाः वयाच्वंगु खः । तबला, हार्मोनियम लिसेंया आपालं बाजा थाइम्ह श्रेष्ठ लिपांगु छगू दशक थुखे धाःसा गुमनामथें हे जूगु खः ।

वि.सं. २०१९ साल फागुन ७ गते प्रजातन्त्र दिवसया दिं येँया राष्ट्रिय नाचघरय् न्हापांगुखुसि श्रेष्ठं ...बेनीको बजार जता मायाँ उतै छ नजर...बोलया म्ये हाःगु खः । उगु ज्याझ्वलय् नेपाःया १४ गू अंचलपाखें वःपिं कलाकारपिन्त ल्यूने लाकाः श्रेष्ठ त्यपुंया थुगु हे म्ये न्हाप लाःगु म्याग्दीया अग्रज कलाकार अबिरकुमार श्रेष्ठं धाःगु दु । वधुंकाः वहे म्ये २०३१ सालय् रेडियो नेपालय् रेकर्ड याःगु खः ।

Categorized in कला