नेवा: अनलाइन न्युज – ललेन्द्र शाक्य | २०७७ आश्विन ६, मंगलबार १५:१०:४०

असोज २३ व २४ गते ग्राण्ड फिनाले

बुद्ध शान्त पार्क अनलाईनपाखें न्ह्यानाच्वंगु बुद्ध भजन म्ये कासाया लिपांगु चरण ग्राण्ड फिनाले ज्याझ्वलय् मूपाहाँ कथं झायादीत नेपाल सरकारया शहरी विकास राज्यमन्त्री रामवीर मानन्धरयात अनलाईनया नायःपाखें ब्वनापौ लःल्हाःगु दु ।

थ्वहे वइगु असोजया २३ व २४ गते न्हिनसिया १ ता इलंनिसें न्ह्याइगु उगु ग्राण्ड फिनाले ज्याझ्वलय् कासामिपिन्त प्रत्यक्ष म्ये हायेकाः निर्णायकपाखें न्हाप, ल्यू व लियांल्यू ल्यज्या क्वचायेकेगु जानकारी ग्वसाः खलकं ब्यूगु दु ।

ग्वसाः खलकं ब्यूगु जानकारी कथं असोज २३ गते नेपालभाषाया लिच्वः व २४ गते खस नेपाली भाषाया लिच्वः सार्वजनिक याइगु जूगु दु ।

असोज २३ गते उगु बुद्ध भजन म्ये कासाय् उत्कृष्ट १० त्याकेत ताःलाःपिं कासामिपिन्त दसिपौ लःल्हाइगु ज्याझ्वःलिसें यूट्युबय् दकले अप्वः भ्यूअर्स कायेत ताःलाःपिं निम्ह व दकले अप्वः एसएमएस कायेत ताःलाःपिं निम्हेसित नं दसिपौ लःल्हायेगु ज्याझ्वः दूगु जानकारी ग्वसाः खलकं ब्यूगु दु ।

अथेहे, असोज २४ गते खस नेपाली भाषाया कासामिपिन्त प्रत्यक्ष म्ये हायेकाः निर्णायकपाखें न्हाप, ल्यू व लियांल्यू ल्यज्या यानाः सार्वजनिक यायेगु ज्याझ्वः दूगु जानकारी ग्वसाः खलकं ब्यूगु दु ।

उगु ज्याझ्वलय् नं उत्कृष्ट १० त्याकेत ताःलाःपिं खस नेपाली भाषा बुद्ध भजन हालादीपिं कासामिपिन्त दसिपौ लःल्हायेगु लिसें यूट्युबय् दकले अप्वः भ्यूअर्स कायेत ताःलाःपिं निम्ह व दकले अप्वः एसएमएस कायेत ताःलाःपिं निम्हेसित दसिपौ लःल्हायेगु ज्याझ्वः दूगु जानकारी ग्वसाः खलः बुद्ध शान्त पार्क अनलाईनं जानकारी ब्यूगु दु ।

Categorized in कला