नेवा: अनलाइन न्युज | नेपाल संवत ११४४ दिल्लाथ्व तृतीया (२०८१ असार २४ गते) सोमवाः

मंगलमान शाक्य

दुण्ड बहादुर बज्राचार्यजुं नेपालभाषां भाय् हिला पिथंगु दीघ निकाय (५७०+८६ पौ), मज्झिम निकाय,(९२४+१२२ पौ) व संयुक्त निकाय (११९२+९० पौ) पिदंगु हे झा,  थौं सिबें स्वीदँ न्ह्यः जिं दकले न्हापां बुद्ध धर्मया तपंगु पिथना खना । उबले काचाक्क मति लुलः थपाय् पंगु सफू ब्वनेगु गुबले ? थम्हतुं लिसः बिया गुबले ब्वने उबले हे सफू न्याय् । दुण्ड बहादुरजु यूवक बौद्ध मण्डल या संस्थापक अध्यक्ष व नांजाम्ह उपासक मदुम्ह पवित्र बहादुरया किजा, यलया नाँदंम्ह लुँकःमि अले सफलम्ह बँजाः मदुम्ह पूर्ण बहादुरया काय् धका जिं स्य्ू । उबले वय्कया न्हापांगु बुद्ध वचन अनुवाद मिलिन्द प्रश्न जिके दःसां न पुवंक ब्वने मफयाच्वंगु । 

झिसं बुद्ध वचन धका भिक्षु व अनागारिकापिं पाखें न्यना वयाच्वनागु खँ, बाखं, सूत्र, उद्गार फुक्क धयाथें सुत्त पिटक खः । थुके दुने दशौं हजार गाथात दु, सलंसः ताहाः चिहाः सूत्रत व बाखंत दु । बासःदँ (२००१–२०४९) बिका मदुपिं भन्तेपिं अमृतानन्द व अनिरुद्ध पिंसं धम्मपदया फुक्क गाथाया अट्ठकथा पिथने धुंकुगु दुसा मेगु अट्ठकथा पिदंगु धैगु बि.स.२०६८ स दुण्ड बहादुरजुया खुगु ब्वः छकलं पिदंगु जातक बाखंत खः । 

बुद्ध संबत् २५२१  (बि.स.२०३४) स जि यलया यशोधरा बौद्ध ब्वनाकुथिइ परियत्ति शिक्षा छगु तगिमय् ब्वना । जाँचय् जि पास जूगु जक मखु स्वनिनगलय् उबले परियत्ति शिक्षा छगु तगिमय् ब्वना च्वंपिंनिगु पुचलय् जि लियांल्यु (बोर्ड तृतीय) लात । सुमंगल बिहारय् जित यक्व बौद्ध सफूत नापं छपा वह उनया फ्रेम नं सिरपाः दत । भिक्षुपिं बुद्धघोष, महानाम, सुदर्शन, कालुदायी पिं नाप आपालं गृहस्थी व विद्यार्थी पिं दुगु उगु सभाय् जित निक्खमपारमिं गुरुमाँ (थौंकन्हे ९८ दँ दत) नं सिरपाः ब्युगु खः । २०२० साल बैशाख ५ गते भिक्षु बुद्धघोष व धर्मरत्न शाक्य त्रिशुलीपिं जाना न्ह्याकुगु थुगु परियत्ति शिक्षा या जि न छम्ह बिद्यार्थी जुइ खन । 

निक्खमपारमिं गुरुमाँ जि बूगु हे त्वा नःबहि या म्ह्याय्मचा । निक्खमपारमिं गुरुमाँ नं थःगु आशामाया जिवन जि बूगु हे सालय् त्वता अनागारिका जुल । जि बःचा धिकःजुयावःबले गुरुमाँ यात आशामाया निनी धा धां पंचशील, अष्टशील ब्वने फत । गुरुमाँया हे हपालं परियत्ति शिक्षा ब्वने फत । छकः अष्टशीलया खँ कना च्वंबले उबले नकतिनि जक वःगु प्रविधि भिडियोलय् गौतम गोविन्दा नाँ या हिन्दि प्याखँ स्वयागु व प्याखँया छम्ह प्याखँ म्व या नाँ सत्रुघ्न सिन्हा या नाँ कयाबले गुरुमाँ नं सत्रु या नाँ काय्मज्यु, सत्रु धाय् मज्यु धका धाःगु जित आः थें हे च्वनि । गुरुमाँ न उबले  जित वाः वाः पतिं त्वालय् बुद्ध पूजा याय्गु इलय् ब्यलय् बिहारय् वना भन्ते गुरुमाँ पाखें बुद्ध धर्म  देशना न्यनेगु व भति भति ध्यान च्वनेगु बानी स्यना बिल । ध्यान या मन्त्र बिया जित उबले धाःगु खः – न्ह्याबलें होश ति, न्ह्यागु यासां होशतया च्वं ! तर थ्व परियत्ति गतिविधि जिं स्वदँ अप्वः न्ह्याके मफु । छता हुनि उबले पंञालोक भन्ते छेँ थ्यंक वया जित सदांया नितिं प्रवजित याय्त धाःवबले जिमि अबुजुं तँ चाया म्वा धया छोत । परियत्ति शिक्षाय् सिरपाः कयागु सालय् हे जि ब्वनाच्वनागु सरकारी ब्वनाकुथिइ जि स्वंगु तगिमय् फेल जुल । अले अबुजु पाखे. ब्व व कसाः नय् माल– स्कूलय् फेल जुइगु वह उनया फे्रम ज्यालगे मजू !

उबले नेपालभाषां जिं खनागु ब्वनागु तपंगु सफू धैगु हे अमृतानन्द भन्तेनं कथंहंक पिथना विज्यागु बुद्धकालीन चरित्रत खः । सफूत अप्वःयाना चिचिपं व सुत्त पिटक दुनेया थी थी निकायया छु छुं सूत्रत व ब्याख्यात जक दुथ्यागु ।

थ्व हे इलय् अर्थात २०३५ सालय् जिं भराय् पंगु बौद्ध ग्रन्थ या दर्शन प्राप्त जुल । पण्डित निष्ठानन्द बज्राचार्यजुं संस्कृत भाषं नेवाः भाषय् हिकातःगु ललितबिस्तर ( मुक्कं पौ ६६० +५० +४+६) या युवक बौद्ध मण्डल यल पाखें पुनः प्रकाशन जूगु खः । सफू तपं व तःधंगुलिं न्येतका मू तुगु थुगु सफू पिथतेन न्ह्यःहे मण्डल पाखें चन्दा कयातःगु खः । जिमिगु हे त्वा या मीन बहादुर शाक्य (स्वर्गीय) उबले मण्डलया नायःव सफूया सम्पादक न जुगुलिं जिमि अबुजुं न न्येतका न्ह्यः हे चन्दा बियातःगु । २०३५ सालया बुद्ध जयन्ति खुन्हु थुगु सफू भिक्षुपिं ज्ञानपूर्णिक व शीलभद्रपिं च्वना बिज्यानाच्वंगु यल पटकोया मणिमण्डप बिहार गुगु मण्डलया ज्याकुथि नं खः अन बिमोचन जुल । थ्व ज्याझ्वलय् दकले न्हापां जिं भmी कवि केशरी चित्तधर हृदय यात खना । ताहाकःगु दा–ही, सफा तुयु उनया लँ सुरुवा द्यने गा, धुसिमलूगु म्हं ज्वनाच्वंगु तुतां खनेवं ल्वममनिगु चित्ताकर्शक भmी कवि केशरीजुया व्यक्तित्व ंिज खना । अबुजुं उबले जित धाल – स्व बाबु नेपाःया तःधंम्ह कवि, मेमेगु भाय् सःसां नेवाः भाषं जक च्वइम्ह, यक्वः च्वय् फुम्ह तःधंम्ह विद्धान ! न्ह्यव चन्दा बियातःपिन्त ज्याझ्वलय्  सफू इना बिइगु जुगुलिं ब्वनापौ न दत व अबुजु थ्यंगु खः । जि ला अबुजु नाप लिना वनाम्ह । ललितबिस्तर थुकथं जिगु न्हापांगु पासा बौद्ध ग्रन्थ जुल यद्यपि लिपातक्क जिं ललितबिस्तर क्वचाय्क ब्वने मफु थुके दुने दुगु माणिकमान चित्रकार या च्यापा एतिहासिक किपाः दुने जक थःत लिकुंका । 

ललितबिस्तर ब्वने मफुसां २०३६ साल पाखे जित चूलावल, भगवान बुद्धया न्हापा न्हापा या जन्म बारे या अवदान बाखं न्यनेगु । पण्डित बैद्य आशाकाजी बज्राचार्यजुं लछि यंक बहनी कनिगु , जि छन्हु हे तुते मयासें न्हि न्हि न्यँ वनेगु । आशाकाजी गुरुजु या बाखँ कनिगु पह थुलि न्ह्याइपुस्से च्वं कि लाय्बय् लायातःगु दक्व सुकु मनूत पाखें जा ः बाखं न्य न्यँ मनूत हरर न्हिला हइ, गुरुजुया सः जक ताय्दय्क मनूत छहासः ताय्मदेक सुम्क जुइ । छन्हुला छु जुल उबले नापं च्वंगु अशोक सिनेमा हलय् सिन्दूर प्याखँ चले जुयाच्वंगु । प्याखँ स्वय् सिधेका लिहाँवपिं दंग जुया बाखँ न्यना च्वंपिं खना दना दना हे इमिसं नं बाखँ न्यन, नबहि या लाय्ब छकुतिं मनूत म्व म्व उबले, नखःचखःया हूलमूल थें । 

Categorized in बिचा: