nepal life 2076 3 18

बुद्धकालीन नेपालभाषाया संकिपा ‘घोषक’या प्रिमियर शो

नेवा: अनलाइन न्युज – ललेन्द्र शाक्य | २०७८ आश्विन १०, आइतबार १४:२५:१८

नेपालभाषाया ऐतिहासिक बुद्धकालीन संकिपाः घोषकया प्रिमियर शो शनिवाः बालाजुइ च्वंगु अष्टनारायण हलय् क्वचाल । थुगु संकिपा चिराग फिल्म्सया ब्यानरय् निर्माण जूगु खः ।

संकिपा ‘घोषक’ प्रिमियर न्ह्यः प्याखनय् दुथ्याःपिं कलाकारलिसें प्राविधिकपिंत औपचारिक ज्याझ्वः यानाः हनेज्या याःगु खः । उगु ज्याझ्वः संकिपा ‘घोषक’या  छम्ह निर्माता रोशन बज्राचार्यया सभापतित्वय् न्ह्याःगु खःसा येँ महानगरपालिकाया मेयर विद्यासुन्दर शाक्य मूपाहां व विशेष पाहां कथं येँ महानगरपालिकाया उपमेयर हरिप्रभा खड्गी श्रेष्ठ झायादीगु खः । अथेहे, पाहाँ कथं भन्ते निग्रोध महास्थवीर बिज्याःगु खः । मेम्ह पाहाँ कथं येँ महानगरपालिका १८ वडाया नायः न्हुछेकाजी महर्जनया उपस्थिीति दुगु खः ।

ज्याझ्वलय् भन्ते निग्रोघ महास्थवीरं घोषकया प्रसंग कुलादिसें बुद्धधर्मया प्रचारया निंतिं विहार निर्माण यानादीम्ह ब्यक्तित्व मध्ये छम्ह घोषक नं खः धाःसें कौसम्बी नगरय् घोसिताराम विहार निर्माण यानातःगु ऐतिहासिक खँ खः धकाः कुलादिल ।

विशेषपाहाँ येँ महानगरपालिकाया उपमेयर हरिप्रभा खड्गी श्रेष्ठं स्थानीय सरकार आः सक्रिय जुयाच्वंगु अवस्थाय् नेपालभासाया उत्थानया निंतिं स्थानीय तहलय् नेपालभासां अध्यापन याकाच्वनागु खँ कुलादिसें नेपालभासाया संकिपा प्रदर्शन जूगु खँय् लसता प्वंकादिल ।

प्याखँया पटकथा च्वमि दर्शनवीर शाक्यं बाखंच्वमि मदुम्ह धर्मरत्न शाक्ययात लुमंकुसें च्वमि शाक्यया कल्पनशीलतायात च्वछानादील । लिसें थौंया समस्या धैगु हे नेपालभासाया संकिपाः क्येनेत हलया समस्या जुयाच्वंगुलिं मुपाहां विद्यासुन्दर शाक्ययात नेपालभासाया संकिपा क्यनेगु निंतिं स्थानीय सरकार पाखें हलया प्रवन्ध छगू यानादीत इनाप यानादिल ।

मूपाहां विद्या सुन्दर शाक्यं झीसं बुद्धधर्मया प्याखँ निर्माण यायेगु इलय् नेपालभासां जक मखुसे गैर नेवाःभासं नं डबयानां नं पिकायेमाः धकाः सुझाव बियादील । छाय्धाःसां बौद्ध धइपिं नेवाःत जक मखु गैर नेवाःत नं आपालं हे दु धयादिसें नेपालीभासं डबयायेगु निंतिं येँ महानगरपालिकां ग्वहालि यायेत नं तयार दुगु खँ कनादिल । लिसें नेपालभासाया संकिपा क्यनेत हलया सवालय् आ निर्माण जुयाच्वंगु मंकाःखलःया भवनय् नेपालभासाया ज्याझ्वः यायेगु निंतिं बिस्कं हल निर्माण यानाच्वनागु नं खँ कुनादिल।

येँ महानगरपालिकाया १८ वडाया नायः न्हुच्छेकाजीं झीसं स्तरीय प्याखँ निर्माण यानावनेमाः धकाः बःबिया दिल ।

ज्याझ्वलय् घोषकया मेम्ह निमार्ता प्रेमा शाक्यं लसकुस यानादीगु खःसा निर्देशक अमृतचन्द्र श्रेष्ठं सकल कलाकारपिंत सुभाय् देछाःसें प्याखँया कलाकार पल्पसा डंगोलयात भिं उसाँयया कामना यानादीगु खः। अथेहे सभापति रोशन बज्राचार्यं सकसितं सुभाय् देछाःसें वःगु सुझाव मनन याना वनेगु प्रतिवद्धता प्वंकादील ।

ज्याझ्वलय् मदुम्ह च्वमि धर्मरत्न शाक्यया नामय् छगू मिनेटया मौनधारण नं याःगु खः ।

Categorized in कला