zero media family planning adv

बुंगद्यःया रथजात्रा नं यायेगु निर्णय

नेवा: अनलाइन न्युज – ललेन्द्र शाक्य | २०७७ चैत्र २६, बिहिबार १६:०१:३०

वर्षा व सहकालया द्यःया रुपं मानेयानातःम्ह बुंगद्यः (रातो मच्छिन्द्रनाथ)या रथजात्रा माःगु स्वास्थ्य मापदण्ड पालना यानाः जात्रा न्यायेकीगु जूगु दु ।

गुथि संस्थान ज्याकुथि यलया ग्वसालय् जिल्ला प्रशासन ज्याकुथिइ बुधवाः च्वंगु सर्वपक्षीइ बैठकं कोरोना महामारयिा अप्वःगु जोखिमयात ध्यानय् तयाः २०७८ सालया बुंगद्यःया जात्रा न्ह्याकेगु निर्णय जूगु यलया सहायक प्रमुख जिल्ला अधिकारी ललितकुमार बस्नेतं जानकारी ब्यूगु दु ।

रथजात्रायात मर्यादित, अनुशासित, शान्तिपूर्ण रुपं क्वचायेकेगु नितिं सरोकारवाला फुक्कसिगु दथुइ तःजिक सहलह यानाः बुंगद्यःया जात्रा न्ह्याकेगु निर्णय जूगु बस्नेतं धाःगु दु ।

सरोकारवालां स्थानीय धर्म संस्कृतिकया मू पर्वया रुपं न्ह्याकाः वयाच्वंगु बुंगद्यःया रथजात्रायात कोरोना संक्रमण ब्वलंके मबिइगु नितिं सामाजिक दूरी, मास्क, स्यानिटाइजर लिसेंया स्वास्थ्य मापदण्ड पालना यायेगु व याकेगु निर्णय जूगु वं धाःगु दु ।

रथजात्रा न्ह्याकेगु झ्वलय् अप्वः भीडभाड मजुइकेगु व्यवस्था मिलेयायेत फुक्कस्यां थःथःगुपाखें यायेमाःगु फुक्क ज्या प्राथमिकताया लिसें इलय् हे यायेगु व याकेगु व्यवस्था मिलेयायेगु निर्णय जूगु नं बस्नेतं धाःगु दु ।

Categorized in स्थानिय-समाज