prabhu baink new

बुंगद्यःयात रथय् बिज्याकीगु दिं वइगु १० गते

नेवा: अनलाइन न्युज – विजयरत्न | २०७७ श्रावण ८, बिहिबार २०:४२:५७

सहकालया द्यःया प्रतिक कथं प्राचीनकालनिसें आराध्य द्यःया रुपं पूजा यानाः वयाच्वंम्ह बुंगद्यः (रातो मच्छिन्द्रनाथ)या रथजात्राया नितिं रथारोहण तःक्वःमछि तय जुजुं स्थगित यासें वयाच्वंगु व लिपांगु इलय् वइगु श्रावण १० गते तय याःगु खःसा व नं स्थगित याःगु सुचं जारी जूगुलिं लिपांगुखुसि श्रावण १० गते हे रथय् बिज्याकेगु सम्बन्धित गुथ्याः व सरोकारवालापिन्सं विस्तृत सहलह लिपा निर्णय याःगु दु ।

रथारोहणया नितिं तयारी जूगु अवस्थाय् श्रावण ७ गते गुथि संस्थानया पाखें आःयात स्थगित यायेत सुचं जारी खःसा वधुंकाः नेवाः समुदयाया गुथ्याःपिं दथुइ ब्यापक सहलह लिपा श्रावण ८ गते बिहिवाःया दिनय् जनस्तरपाखें उगु निर्णय याःगु खः ।

बिहिवाः हे बुंगद्यःया पाञ्जुपिनिगु नेतृत्वय् बुंगद्यःया ज्योतिष खलःया प्रतिनिधि, बाराही गुथिया प्रतिनिधि लिसेलिसें सरोकारवाला गुथ्याः व थीथी व्यक्तिपिं जिल्ला प्रशासन ज्याकुथिइ डेलिगेशन वंगु खः । उगु झ्वलय् सिडिओ नं समुदायया खँय् थःम्ह नं साथ बिइगु धायेधुंकाः यल महानगरपालिका ज्याकुथिइ गुथ्याः व सरोकारवालापिं थ्यंकूगु खः ।

यल महानगरपालिकाया मेयर चिरिबाबु महर्जन, ज्यापु समाजया नायः चन्द्र महर्जन, ज्योतिष खलःया दैवज्ञ जोतिष कीर्तिमर्दन जोशी, कपिल गुरुजु, बाराही गुथिया दिलकुमार बाराही लिसेंया न्यागू दर्जनसिबें अप्वः सहभागी जूगु खः ।

उगु झ्वलय् आः श्रावण १० गते हे रथारोहण यायेगु छगू मतं निर्णय याःगु खः ।

कन्हय् ९ गते शुक्रवाःया दिनय् जात्रा गथे गुकथं यायेगु धैगु व्यवस्थापनया सवालयात कयाः जिल्ला प्रशासन ज्याकुथिइ जानकारी व सहलह ब्याकेत सम्बन्धित व्यक्तिपिं वनीगु जूगु दु ।

थ्वसिबें न्ह्यः नं बैशाख १२ गते व असार २४ गते नं रथारोहणया नितिं साइत बिइधुंकूगु अवस्थाय् लकडाउनया हुनिं स्थगित याःगु खःसा आः वइगु शनिवाः श्रावाण १० गते धाःसा रथारोहण यायेगु निश्चित जूगु दु । थ्वहे आशयया निर्णय गुथि संस्थानं श्रावण ६ गते पौ जारी याःगु खःसा ७ गते हाकनं रथारोहण स्थगित याःगु सुचं जारी याःगु खः ।

Categorized in नेवाः