prabhu baink new

बुंगःद्यः रथय् बिज्याकल (किपा नापं)

नेवा: अनलाइन न्युज – Rakesh Maharjan | २०७७ श्रावण १०, शनिबार १७:१५:३५

येँ – वर्षा व सहकालया द्यः बुंगःद्यःयात थौं रथय् बिज्याकूगु दु ।

बुंगःद्यःया गुथिनाप स्वापू दुम्ह ज्योतिषी दैवज्ञ कीर्तिमनदन जोशीं थौं नागपंचमीया दिं लाकाः न्हिनसिया १२ः१५ निसें १२ः२५ तकया ईयात बांलाःगु साइत ठहर याःगु खःसां १२ः५२ ताः इलय् जक द्यः रथय् बिज्याकूगु खः ।

बुंगःद्यःयात तःबहालं विधिपूर्वक पिकयाः गुर्जुपल्टनया सलामी बीकूगु खः । ३१ म्ह पानेजु (पुजारी संघ)या सचिव विनोद वज्राचार्यनापं नेमराज शाक्य व मोहन शाक्यं द्यः कुबिउगु खः । द्यः रथय् बिज्याके न्ह्यवः द्यः क्वबुइपिं पुजारीपिं नीसी यानाः शुद्ध जुयाः च्वनेमाः ।    

बुंगःद्यःयात रथारोहण याकेन्ह्यः तःबहाःया दबली भजनमण्डलीया पुचलं मृदङ्ग भजन र्कीतन पाठ यायेमाःगु परम्परा दुगु भाष्करप्रसाद अमात्यं धयादीगु दु । अमात्यं धयादिल, “बुंगःद्यःयात पुल्चोकं गाःबहालतक यंकेबलय् व अनं मेमेगु थासय् यंकेबलय् नं मृदङ्ग भजन पाठ यायेमाः ।’ बुंगःद्यःयात हरिहर वा महाद्यःकथं पुज्यानाः मृदङ्ग पाठ यायेमाःगु खँ अमात्यं धयादीगु दु ।

द्यः रथय् बिज्याकेत यंकेबले छम्ह पानेजुं ॐ च्वयातःगु पूजाभः, छम्हेज्यां मुस्याः छम्हेस्यां द्यःया झल्लरी कुसा ज्वनेमाःसा काहा बाजा पुयाः यंकूगु खः । द्यः रथय् बिज्याकेगु थौं भिंगु व लिपांगु साइत खः । थ्व साइतय् द्यः रथय् बिमज्याकू्रसा मेगु साइत मदुगु व द्यःयात गुला लिपा बुंगय् लितयंकेमज्यूगु, असोज २ निसें मलमास लाःगुलिं उबले रथारोहण व रथजात्रा नितां यायेमज्यूगु ज्योतिषी जोशीं धयादीगु दु ।

थौं यलया थीथी खलःपुचः, ज्यापु समाज यल, स्थानीय गुथी संस्थान व यल महानगरपालिकाया पहलय् रथारोहण क्वचाःगु खः ।

 

किपा : पुष्प महर्जन, अमन महर्जन

 

 

 

 

 

 

Categorized in नेवाः