Header Nepal rastra bank Adv

बिहारय् विषाक्त अयलाः त्वनाः कम्ती नं च्याम्ह श्रमिक सित

नेवा: अनलाइन न्युज – ललेन्द्र शाक्य | २०७८ माघ ३, सोमबार १४:०२:३०

भारतय् विषाक्त अयलाः त्वनाः कम्ती नं च्याम्ह मनूत सीगु दु । भारतया विहारया नालन्दा जिल्लाय् विषाक्त अयलाः त्वनाः च्याम्ह मनूत सीगु खः ।

शनिवाः प्रहरीं नालन्दाय् अवैध अयलाः त्वनाः च्याम्ह मनूत सीगु पुष्टि याःगु खः । सीपिं छोटी पलरी व पहार टल्लीया बासिन्दा जूगु प्रहरीया धापू दु । शुक्रवाः ज्या यानाः छेँ लिहाँ वयेधुंकाः नापं च्वनाः अयलाः त्वंपिं श्रमिकपिं सीगु खः ।

नालन्दाया प्रहरी अधिकारी अशोककुमारं अयलाः त्वनाः च्याम्ह मनूत सीगु पुष्टि याःगु खः । विषाक्त अयलाः त्वनाः मेपिं मनूत तच्वकं विरामी जूगु हुनिं सीपिनिगु ल्याः अप्वयेफूगु अशोककुमारया धापू दु ।

अशोककुमारं धाःगु दु, ‘निम्हेसित अस्पताल भर्ना याःगु दु व इमिगु अवस्था तच्वः जुयाच्वंगु दु तर विरामी जूपिनिगु ल्याः थ्वसिबें अप्वः जुइफु ।’

विहारय् सन् २०१६ या अप्रिलनिसें अयलाःयात प्रतिबन्ध तःगु दु । तर शुक्रवाः जूगु घटना वंगु ६ महिनाया इलय् जूगु न्हयक्वःगु खः । उगु ई दुने विषाक्त अयलाः त्वनाः ४० म्हसिबें अप्वः मनूत सीधुंकूगु दु ।

मुख्यमन्त्रीया राजीनामा माग

थ्वहे दथुइ, मुख्यमन्त्री नितिश कुमारया गृहजिल्ला नालन्दाय् घरेलु अयलाः त्वनाः मनूत सीधुंकाः विपक्षी दलं नितिश कुमारया राजीनामा माग यःगु भारतीय समाचार माध्यमं जानकारी ब्यूगु दु ।

विहारया विपक्षी दल आरजेडीं विषाक्त अयलाः त्वनाः मनूत मदिक्क सिनाच्वंगु धासें मुख्यमन्त्री नितिश कुमारं पदपाखें राजीनामा बिइमाःगु धाःगु दु ।

आरजेडीया प्रवक्त शक्ति सिंह यादवं धाःगु दु, ‘लिपांगु ई विहारय् विषाक्त अयलाः त्वनाः जूगु मृत्युलिपा नं नितिश कुमारया मिखा चाःगु मदुनि । विहारय् अयलाःयात तःगु प्रतिबन्ध पूर्ण रुपं असफल जूगु दु व नितिश कुमारं नैतिकताया आधारय् राजीनामा बिइमाः ।’

Categorized in अन्तर्राष्ट्रिय