zero media family planning adv

बिस्काः जात्रा भव्य व सभ्य रुपं न्यायेकेत इनाप : थिमिया मेयर श्रेष्ठ

नेवा: अनलाइन न्युज – ललेन्द्र शाक्य | २०७७ चैत्र २४, मंगलबार ०९:५०:३८

ख्वपया हलिंन्यंकं लोकंह्वाःगु बिस्काः जात्रा भव्य व सभ्य रुपं न्यायेकेत मध्यपुर थिमि नगरपालिकाया मेयर मदनसुन्दर श्रेष्ठं इनाप याःगु दु ।

मेयर श्रेष्ठं धाःगु दु, ‘आः मध्यपुर थिमि नगरपालिका व ख्वप नगरपालिका बिस्काः जात्राया लिक्क दु । मध्यपुर थिमि नगरपालिकाया हलिंया हे छगू जक दूगु मेय् प्वाः खनेगु जात्रा व तःजिक न्यायेकीगु सिन्हः जात्रा गौरवपूर्ण जुयाच्वंगु दु । थुगुखुसी बिस्काः जात्रायात कोभिड १९ या दथुइ न्यायेके त्यनागु दु । उकिं सतर्कता व सचेतना कथं जात्रायात भव्य व सभ्य रुपं सुथांलाक्क न्ह्याकेत इनाप यानाच्वना ।’

बिस्काः जात्राय् म्वाःमदुगु होडिङ बोर्ड, फ्लेक्स तयेत निरुत्साहित यानागु दु व उकिं फ्लेक्स बोर्ड तयाः अनावश्यक रुपं प्रचार प्रसारया व्यवसाय मयायेत तकं इनाप यानाच्वना धकाः थिमिया मेयर श्रेष्ठं इनाप याःगु दु ।

मेयर श्रेष्ठं जात्राय् थःथवय् जक अबिर तयेत व स्वकुमिपिन्त मतयेत नं इनाप याःगु दु । लिसें जात्राय् फुक्कस्यां स्पोर्टस् लाकां व कापःया लाकां न्ह्यानाः सहभागी जुइत नं मेयर श्रेष्ठं इनाप याःगु दु ।

थुखे ख्वप जिल्लास्तरीय कोभिड १९ व्यवस्थापन केन्द्र (डिसिसिएमसि)या आइतवाः च्वंगु बैठकं ख्वपय् बिस्काः जात्राय् रोक तयेगु निर्णय याःगु खः ।

वंगु दँ कोभिड १९ या हुनिं जात्राय् रोक तःगु खः तर थुगु दँ धाःसा स्थानीयपिन्सं छुं नं हालतय् थःपिनिगु जात्रा न्यायेकातुं त्वःतेगु धयाः वयाच्वंगु दु ।

Categorized in स्थानिय-समाज