city axpris 2

बिरज महर्जनया ‘नक्कलिम्ह मयजु’ नापं निपू म्युजिक भिडियो पिदन

नेवा: अनलाइन न्युज – विजयरत्न | २०८० माघ २१, आइतबार ११:२४:३४

ल्यायम्ह पुस्ताया म्येहालामि बिरज महर्जनं हालादीगु निपू म्येया म्युजिक भिडियो  शनिवाः पितब्वज्या जूगु दु ।

उगु म्युजिक भिडियो पितब्वज्या ज्याझ्वलय् गोदावरी नगरपालिकाया मेयर गजेन्द्र महर्जन मूपाहाँ कथं झाया उगु निपू म्युजिक भिडियो पितब्वज्या यानादीगु खः ।

पितब्वज्या जूगु मध्ये खस नेपाली भाषाया ‘तिमी आउने बाटोभरि’ व नेपालभाषाया ‘नक्कलिम्ह मयजु’ खः ।

भिडियो पितब्वज्या ज्याझ्वलय् मूपाहाँ महर्जनं गोदावरी नगरपालिकाया सांगितिक प्रतिभा  सम्बर्द्धन व सांगितिक व सांस्कृतिक ज्याझ्वः तालाकेत थः सदां न्ह्यचिले धकाः धयादिल ।

जितमेहर महर्जनया सभानायःसुइ जूगु उगु ज्याझ्वलय् बरिष्ठ सिने पत्रकारलिसें नेपालभाषा म्युजिक भिडियोया न्हापांम्ह निर्देशक विजयरत्न असंबरें निगुलिं भिडियोया विषयस समीक्षा यानादीगु खः ।

उगु ज्याझ्वलय् संगीतविज्ञ धनबहादुर गोपाली व संगीता प्रधान राना, संगीतह्यःमि गोपाल महर्जन लगायतं नुगःखँ तयादीगु खः ।

ज्याझ्वलय् रुषा महर्जनं लसकुस न्वचु तयादीगु खःसा पितब्वज्या जूगु म्युजिक भिडियोमध्ये नेपालभाषाया म्युजिक भिडियो निर्देशक रामकृष्ण खड्गी व खस  नेपाली भिडियो निर्देशक शायद कार्कीपिन्सं भिडियो निर्माण जूगु ईया अनुभव कनादिल ।

पितब्वज्या जूगु म्यूजिक भिडियोमध्ये ‘तिमी आउने बाटोभरि’या म्येच्वमि व लय् चिनामि बद्रि देसार, संगीत संयोजक जुगल डंगोल, छायाँकन प्रद्युम्न मिश्र, सम्पादन कृष्ण भण्डारीं यानादीगु खः । थुके अभिषेक जोशी व मिशेल घिमिरेया नापनापं कृष्णभक्त महर्जनं अभिनय यानादीगु दु ।

अथेहेतुं ‘नक्कलिम्ह मयजु’या निर्देशन रामकृष्ण खड्गी, म्येच्वमि सुरजबीर बज्राचार्य, संगीतकार जुगल डंगोल, छायाँकन रकि महर्जन, सम्पादन आर.आर पिन्सं यानादीगु थ्व म्येय् मनोज महर्जन व हसना महर्जन लगायतं अभिनय यानातःगु दु ।

Categorized in कला