1142 nhoo dan adv

बिच्छीया बिष क्यान्सरया वासः

नेवा: अनलाइन न्युज | २०७३ पौष २९, शुक्रबार ११:४१:२७

छम्ह शल्यचिकित्सकया निंतिं मनूया संवेदनशील ब्वया अपरेशन यायेगु धइगु तसकं थाकुगु ज्या खः व न्ह्यपुया संवेदनशीलता दकल अप्वः जुइ । तर आः याकनं हे डाक्टरपिसं न्ह्यपुया क्यान्सरग्रस्त कोशिकात म्हसीकाः उज्वःगु कोशिकायात बांलाक्क चीके फइगु जुइत्यंगु दु व थुगु ज्याया निंतिं डाक्टरतय्त छगू ग्यानापुगु विषं ग्वाहालि बीगु धाःगु दु ।
न्ह्यपुया क्यान्सरया उपचार तसकं जटिल जुइ व उकिया निंतिं थाकुगु अपरेशन छगू जक विधि दु । गुकिया निंतिं अनुभवी व तसकं जःगु ल्हाः माः व उकिया लिसें आवश्यकता जुइ  गुकिं फुक्क क्यान्सर कोशिकात म्हसीका चीके फु ।
अमेरिकाया सिएटलय् च्वंगु फ्रेण्ड हचिंसन क्यान्सर रिसर्च सेन्टरय् मचाक्यान्सरया डाक्टर जिम ओल्सन थ्व थाकुगु ज्यालिसे ताः इलंनिसें ल्वानावयाच्वंगु दु । वय्कलं आः छगू न्हूगु प्रविधिया विकाश याःगु दु गुगु न्ह्यपुया क्यान्सरया वासलय् यक्व ग्वाहालि जुइ व थुकिया श्रेय वनी बिच्छीया विषयात ।
जिम ओल्सनया कथं बिच्छीया बिषं तयार याःगु वासःया नां खः, ट्युमर पेन्ट ।
उगु वासः क्यान्सर जूगु कोशिकाय् शल्यक्रिया याये छन्हु न्ह्यः  इन्जेक्सनपाखें बिइ । थ्व वासः बिइवं क्यान्सरयात क्वथिना छ्वइ । थुकिं चिकित्सकयात क्यान्सर जूगु कोशिका व स्वस्थ कोशिका म्हसीकेत अःपुइ ।
तसकं विषालु व खतरनाक प्रजातिया डेथ स्टकर विच्छीया विष पाखें उगु रङ्गवाला वासः तयार याःगु खः ।
ओल्सनयाकथं हि व न्ह्यपुया दथुइ दइगु जैविक सीमाया हुनिं गुगुं वासःयात न्ह्यपुइतक थ्यंकेत थाकुइ । थ्वहे ख“यात ध्यानय् तयाः वय्कःयाके बिच्छीया विषयात छ्यलेगु बिचाः वल ।
थ्व विधिया छ्यलां न्ह्यपुया क्यान्सरया निदान सुरुवाती इलय् हे यायेफइगु व क्यान्सर म्हसीकेगु निंतिं माःगु निद“या ई बचत जुइगु  ओल्सनया दाबी दु ।
ओल्सनं थ्व वासःया छुंइ सफल परिक्षण याःगु दु । अमेरिकी नसा व वासः प्रशासनं मनूयात तकं थ्व वासःया यायेगु अनुमति बिइ धुंकूगु दु ।
ओल्सनं क्यान्सरया वासः यायेत मेमेगु थीथी आधुनिक विधितय्गु आविष्कार यायेगु ज्या तकं यानाच्वनादीगु बीबीसीं धाःगु दु ।
शोधकर्ता ओल्सनं थःगु शोध परियोजनाया नां भायोलेट तयादीगु दु । भायोलेट छम्ह क्यान्सर ल्वगि ल्याय्म्हया नां खः, गुम्ह क्यान्सरया हे हुनिं मदुगु खः । वं थः सी न्ह्यः थःगु न्ह्यपु क्यान्सरया हे बारे अनुसन्धान यायेत दान ब्यूगु खः ।