kmc bidya

बालुवाटार जग्गा प्रकरणया सुलाच्वंम्ह कलाकार

नेवा: अनलाइन न्युज | २०७६ फाल्गुण १३, मंगलबार १६:३४:४१

बालुवाटारया जग्गा प्रकरण थुगु दँया दकले तःधंगु इस्यू जुल । उच्च नेतापिं स्वानाच्वंगुलिं नं थुकिं तरंग ब्वलंकीगु स्वाभाविक खः । अख्तियारं मुद्दा दायर यायेधुंकूगु व सीआईबीया अनुसन्धानया हे झ्वलय् दूगु थुगु प्रकरण गुकथं पिहाँ वल धैगु धाःसा यक्वसित जानकारी मदूगु जुइफु ।

गृहमन्त्रालयं पूर्व सचिव शारदा प्रसाद त्रितालया नेतृत्वय् छानबिन समिति दयेकाः पिने हःगु यक्वसिगु धापू दु । तर, खास थ्व प्रकरणय् छगू विवादास्पद वकिलया भूमिका दु । गुम्हेस्यां राणा परिवारया ४ रोपनी जग्गा तकं नयाब्यूगु खः ।

उम्ह वकिल खः युवराज कोइराला । वकिल कोइराला न्हापा राणा परिवारया हे वकिल खः । मन्त्रिपरिषदं याःगु निर्णयया गलत ब्याख्या यानाः अधिग्रहण जूगु जग्गा जफत याःगु धकाः राणा परिवारया नामय् जग्गा हयेगुलि वकिल कोइरालाया तःधंगु भूमिका दूगु खः । कोइराला राणा परिवारया कानूनी सल्लाहकार तकं खः । वहे ज्याया स्याबासी कथं वकिल कोइरालां ललिता निवास क्याम्पया ४ रोपनी जग्गा तकं थःगु ल्हातय् लाकूगु खः । लिपा राणा परिवारलिसे कोइरालाया खँ मिलेमजुल ।

अधिवक्ता रामकुमार सुवेदीं थीथी निकायस सेटिङ मिलेयायेगु पलाः न्ह्याकल । वधुंकाः व राणा परिवारपाखें तापात । उकिया हे प्रतिशोधय् कोइरालां उगु जग्गा प्रकरणया विषयस गृहमन्त्रालयस उजुरी तयाः छानबिन याकेब्यूगु खः ।

वकिल कोइराला खासयानाः व्यक्तिं मिचेयाःगु सार्वजनिक जग्गा मालेगु व उकी बार्गेनिङ याइम्ह व्यक्ति जूगुलिं सीआईबीया अनुसन्धानय् सीदूगु दु ।

ख्वपय् थुज्वःगु हे ज्याय् वयात दच्छि कैद व ५० हजार तका जरिवानाया फैसला तकं जूगु दु ।

सरकारी कागजपत्र कीर्ते मुद्दाय् वयात वंगु असारय् जक ख्वप जिल्ला अदालतं दोषी ठहर याःगु खः । मुद्दा ल्याः ०७२–सिआर–०२६ स कोइराला व देवराज केसीयात कैद सजायया फैसला जूगु दु ।

आः अजूचायापूगु खँ छु दु धाःस वहे कोइरालायात उगु इलय् केपी ओली सरकारं महत्वं जाःगु जिम्मेवारी ब्यूगु खः । बालुवाटार जग्गा प्रकरण लिपा मेमेगु थुज्वःगु हे प्रकरण मालेत भूमिसुधार मन्त्रालयं ‘सरकारी, सामाजिक, गुथि जग्गा सम्बन्धी जाँचबुझ आयोग’ नीस्वंगु खः ।

निला न्ह्यः आयोगया म्याद थप जुल । वहे झ्वलय् वहे कोइरालायात आयोगया कानूनी सल्लाहकार तकं नियुक्त याःगु दु । विवादास्पद व्यक्तियात हे कानूनी सल्लाहकार नियुक्त जुइधुंकाः अनुसन्धानय् आवद्ध प्रहरी अधिकारी तकं अजूचाःगु दु ।

(दृष्टि साप्ताहिकपाखें)

Categorized in पत्रपत्रिका