prabhu baink new

बागलुंगय् १४ म्ह सीम्ह लुल, प्यम्हेसिगु सनाखत

नेवा: अनलाइन न्युज – ललेन्द्र शाक्य | २०७७ भाद्र १९, शुक्रबार १२:१४:१३

बुधवाः बहनीया खुसिबाः व चलखं बागलुंगया ढोरपाटन नगरपालिका ९ बोबांगय् सीपिंमध्ये प्यम्हेसिगु सीम्ह सनाखत जूगु दु ।

सनाखत जूपिं ढोरपाटन ९ या २६ दँया केशमाया बिक, ४५ दँया विरे विक, २२ दँया जीवन विक व ११ दँया डल्ले विक जूगु प्रहरीं जानकारी ब्यूगु दु । इमिगु सीम्ह बुर्तिवांगय् च्वंगु प्राथमिक स्वास्थ्य केन्द्रय् तयातःगु दु । पहिचान जूपिनिगु पोष्टमार्टमया ज्या थौ हे जुइगु जानकारी प्रहरीं ब्यूगु दु ।

१० म्ह सीपिनिगु आःतक नं सनाखत जुइमफूगु प्रहरी नायव उपरीक्षक राजेन्द्र रेग्मीं धाःगु दु ।

बुधवाः बहनी वःगु खुसिबाः व चलखं बस्तीइ क्षति याःगु खः । सुं मनूत बिस्युं वनाः ज्यान बचेयाःगु खःसा गुलिं मनूत बिस्युं वनेगु झ्वलय् खुसिं चुइकाः यंकूगु खः । चुइकाः यंकूपिं मध्ये गुलिंसिगु अधिकारी चौर, बुर्तिवांग व बडिगाड गाउँपालिकातक सीम्ह लुयावःगु दु ।

गुलिंसिगु सीम्ह क्षतविक्षत अवस्थाय् लुयावःगुलिं म्हसीके मफुगु उद्धारय् खटेजूपिं प्रहरी निरीक्षक प्रकाशसिंह भण्डारीं धाःगु दु ।

बेपत्ता जूपिनिगु मालेगु ज्या जुयाच्वंगु दु । थौं शुक्रवाः सुथनिसें हे मालेगु ज्या जूगु दु । स्थानीयपिन्सं ३५ म्ह बेपत्ता जूगु धाःगु दु । गुलिंसिगु छेँय् पाहाँपिं नं वयाच्वंगुलिं बेपत्ता जूपिनिगु ल्याः गुलि खः धायेमफुनि ।

चलखं फलेघर व सुपुर्दुंगया दर्जन सिबें अप्वः छेँ चुइकाः यंकूगु दुसा वडा ल्याः ८ तक थ्यंबलय् ४० खा छेँ चुइकाः यंकूगु दु । आपालं छेँया भग्नावशेष तकं खनेमदु ।

बस्ती दूगु थासय् आः खुसि बाः न्ह्यानाच्वंगु दु । ढोरपाटन वनेगु लँपुया देउरालीपाखें कुतुंवःगु चलखं भुजी खुसि बन्द जुयाः ताल जूगु व वधुंकाः खुसिबाः वःबलय् तःधंगु क्षति जूगु स्थानीयपिन्सं धाःगु दु ।

Categorized in दुर्घटना-अपराध