Mohanai 2078 KTM

बागमती प्रदेश सरकारं थकाल गाडी भागा, स्वनिगःया न्यूनतम भाडा १८ तका कायम

नेवा: अनलाइन न्युज – ललेन्द्र शाक्य | २०७८ आश्विन २१, बिहिबार १३:५३:२८

बागमती प्रदेश सरकारं सार्वजनिक गाडीया भाडा २३ प्रतिशतं थकाःगु दु ।

स्वनिगय् चलेजुइगु सार्वजनिक सवारीसाधनया न्यूनतम भाडा १८ तका कायम जूगु दु । तर, ट्याक्सीया भाडा धाःसा थकाःगु मदु ।

यातायात व्यवसायीं थ्व भाडा थकाःगु म्हो जूगु धासें असन्तुष्टि प्वंकूगु दु । इमिसं सरकारं भाडादर संशोधन मयाःसा थःपिन्सं हे भाडा थकयाः लागू यायेगु ख्याच्वः ब्यूगु दु ।

गुलि थकाल ?

सार्वजनिक गाडीया भाडा थकायेत माग यासें थ्वसिबें न्ह्यः यातायात व्यवसायीं प्रदर्शन याःगु खः । इमिसं मोहनी नखःया न्ह्यः गाडी चलेयानाः मब्यूबलय् यात्रुपिं मकाय् लाःगु खः ।

वधुंकाः बागमती प्रदेश सरकारया भौतिक पूर्वाधार विकास मन्त्रालयं कार्तिक १ गतेनिसें लागू जुइगु कथं २३ प्रतिशतं भाडा थकायेगु निर्णय याःगु खः । डिलक्स सुविधा दूगु गाडीं धाःसा थुकी नं थप २० प्रतिशत अप्वः भाडा कायेखनी ।

यात्रुपिन्सं १५ किलोतकया हलंज्वलंया भाडा पुलेम्वालीगु जूगु दु । तर १५ किलो सिबें अप्वः १० किलोतक हलंज्वलंया प्रतिकिलो न्यातका दांया दरं थप भाडा पुलेमालीगु निर्णय मन्त्रालयं याःगु दु ।

स्वनिगःया भाडा १८ निसें ३५ तकातक

स्वनिगःदुने संचालन जुइगु सार्वजनिक सवारीसाधनया हकय् धाःसा न्यूनतम १८ तकानिसें अधिकतम ३५ तकातक भाडा कायम याःगु दु ।

१८ तका भाडा ५ किलोमिटरतकया दुरीया नितिं खः । ५ किलोमिटरसिबें म्हो दुरीया यात्रा याःसां नं १८ तका हे पुलेमालीगु जूगु दु ।
१० किलोमिटरतकया दुरीइ यात्रा यायेबलय् २३ तका, १५ किलोमिटरतकया २७ तका, २० किलोमिटरतकया ३० तका व २० किलोमिटरसिबें अप्वः दुरीया नितिं ३५ तका भाडा पुलेमालीगु जूगु दु ।

यातायात व्यवसायीया असन्तुष्टि

भाडा बृद्धि म्हो जूगु धासें यातायात व्यवसायीपिन्सं धाःसा असन्तुष्टि प्वंकूगु दु । यातायात व्यवसायी महासंघया महासचिव सरोज सिटौलां विज्ञप्ति सार्वजनिक यानाः आःया भाडादर पुनरावलोकन मजूसा थःपिन्सं हे भाडा थकायेगु ख्याच्वः ब्यूगु दु ।

सिटौलाया कथं २०७८ सा नेपाल यातायात व्यवसायी राष्ट्रिय महासंघ व यातायात व्यवस्था विभागदथुइ वंगु बैशाखय् २८ प्रतिशत भाडा समायोजना यायेगु सहमति जूगु खः । उगु इलय् डिजलया मू १०४ तका प्रतिलिटर व पेट्रोलया मू १२१ तका प्रतिलिटर खः । आः डिलया मू ११३ तका व पेट्रोलया मू १२९ तका प्रतिलिटर थ्यनेधुंकूसां नं २३ प्रतिशतं भाडा समायोजन याःगु अवैज्ञानिक व अव्यवहारिक जूगु महासचिव सिटौलाया धापू खः ।

आःया भाडादर पुनरावलोकन मजूसा महासंघं थःपिन्सं हे फुक्क प्रदेशय् भाडा समायोजन यानाः लागु यायेगु ख्याच्वः ब्यूगु दु ।

Categorized in बजाः