nepal investment baink

बागमती प्रदेश मुख्यमन्त्री जम्मरकट्टेलयात कांग्रेसं विश्वासया मत मबिइगु

नेवा: अनलाइन न्युज | ने.सं. ११४४ चिल्लागा खस्थि (२०८० चैत्र १८ गते) आइतवाः

नेपाली कांग्रेसया बागमती प्रदेश संसदीय दलं मुख्यमन्त्री शालिकराम जम्मरकट्टेलयात विश्वासया मत मबिइगु जूगु दु ।

थौं आइतवाः च्वंगु कांग्रेस बागमती संसदीय दलया बैठकं विपक्षय् मतदान यायेगु निर्णय याःगु खः ।

बैठकय् फुक्क सांसदपिन्त तटस्थ मच्वनेत व विश्वासया मतया विपक्षय् मतदान यायेत निर्देशन ब्यूगु खः ।

मुख्यमन्त्री जम्मरकट्टेलं प्रदेशसभापाखें कन्हय् सोमवाः विश्वासया मत कायेत्यंगु दु ।

वंगु २०७९ स क्वचाःगु आम निर्वाचनलिपा दयेकूगु बागमती प्रदेश सरकारय् जम्मरकट्टेलं स्वक्वःगुखुसि विश्वासया मत कायेत्यंगु खः ।

लिपांगु खुसि सत्ता समीकरणय् वःगु हिउपाःया लिच्वः प्रदेशय् नं खनेदूगु खः । केन्द्र सरकारपाखें पिहाँ वनेधुंकाः कांग्रेसं बागमती प्रदेशय् नं समर्थन लितकाःगु खः ।

११० म्ह दुजःया बागमती प्रदेशसभाय् जम्मरकट्टेलयात विश्वासया मतया पक्षय् ५६ म्ह सांसदया समर्थन आवश्यक जू ।

बागमती सरकारय् सहभागी दलत नेकपा एमालेया २७, माओवादीया २१, एकीकृत समाजवादीया ७ व हाम्रो नेपाली पार्टीया २ सिट यानाः ५७ सित दु ।

छुं नाटकीय उलटफेर मजूगु खण्डय् मुख्यमन्त्री जम्मरकट्टेलं विश्वासया मत काइगु निश्चित दु ।

बागमती प्रदेशय् आः कांग्रेस, राष्ट्रिय प्रजातन्त्र पार्टी व नेपाल मजदुर किसान पार्टी प्रतिपक्षय् दु ।

कांग्रेसया ३७, राप्रपाया १३ व नेमकिपाया ३ सांसद विश्वासया मतया विपक्षय् दु ।

Categorized in राजनीति