kmc bidya

बागमती प्रदेश नामांकन विरुद्ध सांसद प्रेमबहादुर तामाङं छु न्वःवात ? (छक्वः स्वये हे माःगु भिडियो)

नेवा: अनलाइन न्युज – ललेन्द्र शाक्य | २०७६ पौष २९, मंगलबार १२:०९:२५

३ नम्बर प्रदेशसभाय् पार्टीगत रुपं तत्कालीन नयाँशक्ति पार्टीपाखें त्याःम्ह सांसद प्रेमबहादुर तामाङं पुस २७ गते बागमती प्रदेश नामांकनयात कयाः मतदान जुइन्ह्यः प्रदेशसभाय् आदिवासी जनजाति आन्दोलन, पहिचानया आन्दोलनयात कयाः अतिकं मार्मिक विचाः प्वंकादीगु दु । वय्कः थ्वया न्ह्यः तत्कालीन माओवादी पार्टीं न्ह्याकूगु जनयुद्धय् आबद्ध व्यक्ति खःसा २०६४ सालया संविधानसभाया चुनावय् रसुवा जिल्लां निर्वाचित जूम्ह खः । थौंकन्हय् वय्कः पार्टीगत रुपं तत्कालीन नयाँशक्ति लिपा स्वतन्त्र कथं राजनीति ख्यलय् आबद्ध जुयाच्वंगु दु ।

राजधानी व नामांकनया मतदानय् तटस्थ च्वनादीम्ह तामाङं नेवाः ताम्सालिङ प्रदेश थःपिन्सं दर्ता यायेगु कुतः याःसां नं उगु दर्ताया नितिं ११० म्ह सांसद दूगु व उकी नं बामपन्थी सांसदपिं बहुमत दूगु थासं छम्ह प्रस्तावक व छम्ह समर्थक मदयाः दर्ता तकं यायेमखंगु खँ कनादीगु दु ।

प्रदेशसभाय् सांसद तामाङं बियादीगु भाषणय् कम्युनिष्टपिन्सं आत्मनिर्णयसहतिया अधिकार व पहिचान स्थापित यायेगु मुद्दा न्ह्यःने हयाः थःपिंथें जाःपिं आपालं ल्यायम्हपिं थुगु मुद्दा स्थापित यायेगु नितिं सहिद जुल, थःगु जीवन बलिदान यात, तर थौं वयाः यथार्थ छु खः ? थ्व संसदय् क्यंगु दु धासें नेतातसें जनतायात स्वाहाने त्वाथः दयेकूगु बिचाः कडारुपं तयादीगु दु ।

सांसद तामाङं प्रदेशसभाय् बियादीगु थुगु न्वचू पहिचानया आन्दोलनय् यथार्थ व तच्वकं स्याच्चूगु विचाः जूगुलिं थन वय्कःया भाषण न्ह्यब्वयाच्वना ।

(थन क्लीक यानाः भिडियो स्वयादिसँ)

Categorized in राजनीति