zero media family planning adv

बागमती

- लोककवि राजभाइ जकःमि

बागमतीया ख्वाः खन्यवं थौं                                   
मन हे लूलू ख्वइगु                                                
सिरिसिरि फय् मखु कलकल लः मखु
धःजक हे बाः वइगु ।

उबलय् उबलय् न्ह्यात्थाय् स्वःसां
बागमती झःझः धाः
लः नं यच्चुस्य फय् नं सिच्चुस्य
सकस्यां मन मुसुमुसु काः
दुम्ब्वः काकां खुसि म्ये हाहां
हुनुनुनु हुनुनुनु थ्वइगु
बागमतीया ख्वाः खन्यवं थौं
मन हे लू लू ख्वइगु ।



द्यः नां काकां मनूत न्हापां
तीर्थपतिंं ख्वाः स्यू वै
झंगःपंक्षी चिरबिर हाहां
न्ह्यैपुक प्याखं ल्हू वै
बागमतीया उबलेया ख्वाः
गबलेजक स्वय् दइगु
बागमतीया ख्वाः खन्यवं थौं
मन हे लू लू ख्वइगु ।

बागमती खुसि मखु अभिशाप
धरतीया वरदान
बूसां माःगु थ्व सीसां माःगु थ्व
संस्कृतिया मू ज्यान
देयक्वधुछिं हे नस्वाः वय्क
अनेतने स्वां ह्वइगु
बागमतीया ख्वाः खन्यवं थौं
मन हे लू लू ख्वइगु ।

फिसः तनावन स्वां—सि गनावन
स्वय् हे घच्चाइ पुल थौं
धःजक न्ह्याइगु फोहर वाइगु
खुसि साःगाः हे जुल थौं
गन वन गन तन बालि बुँ उलिमछि
लुँ वः ज्वाँयज्वाँय् सइगु
बागमतीया ख्वाः खन्यवं थौं                  
मन हे लू लू ख्वइगु ।

स्वःस्वःथाय् हे मनू मनूजक
बागमती म्हमस्यूपिं
खः थ्व असभ्य मनू हे खः न्हां
बागमती स्यंकूपिंं
न्याँ नं मखनाः ब्यां नं मखनाः
क्वः व इमाजक ब्वइगु
बागमतीया ख्वाः खन्यवं थौं
मन हे लू लू ख्वइगु ।

खुसि हे ल्हाकाः मोटर ब्वाकाः
उन्नति जुल गय् धायगु ?
तजिलजि न्हंकाः थःहे तंकाः
फुसुलु जुयाः गुलि म्वायगु ?
न्ह्याः वन्य धाधां अय् नेपाःमि छ
ल्यांल्यां जक छाय् वइगु ?
बागमतीया ख्वाः खन्यवं थौं
मन हे लू लू ख्वइगु ।

बागमतीया मर्म मथूपिं
गय् झी सःस्यू धायगु ?
हिसि दुगु देयया मनू धकाः झी
गुकथं गौरव तायगु ?
मनुखं खुसि थः जीवन तायकाः
गबले न्ह्याः वन्य फइगु
बागमतीया ख्वाः खन्यवं थौं
मन हे लू लू ख्वइगु ।



वा झी दन्य वा बागमतीया
दुघाः लुमंकाः दन्य वा
ल्हाः तुति च्वयकाः खुसि हिसि दयकाः
नेपाःमि जुयाः क्यन्य वा
खुसिजक मखु न्हायकं नं खः थ्व
देयया ख्वाः खन्य दइगु
बागमतीया ख्वाः खन्यवं थौं
मन हे लू लू ख्वइगु ।