nepal life 2076 3 18

बाखं ‘अपार्टमेन्ट’

नारद वज्राचार्य

“हलो” फोनया गं सः वयेवं वं फोन ल्ह्वन । फोन गेटय् च्वंम्ह हेड गार्डं याना हःगु जुयाच्वन— शव बाहन थ्यंकः वःगु सुचं बीत ।

हुं..... वं ताःहाकःगु झसुकाः तल । लिसें फोन दिका बिल ।

फोन याये मलाःनि थ्यंकः वये धुंकल । गुलि याकनं थ्यंकः वःगु थ्व शव बाहन नं — वं मनय् खँ वायेकल । लिसें झिंन्यात जाःगु अपार्टमेन्टया च्यातँय् च्वंगु झ्यालं क्वय् मिखा ब्वल ।

खः खनी । शव बाहन अपार्टमेन्टया क्वसं मू लुखा न्ह्यःने दिकेत ब्याक यानाः मिलय् यानाच्वन ।

 

“सरी”

घौ निघौ न्ह्यः मांयात जाँचय् याये धुंकाः डाक्टरं थथे धकाः हे अफसोच प्वंकूगु खः ।

आः हे नं म्हगस थें जुयाच्वंगु दु वयात । अझं पत्याः याये थाकुयाच्वंगु दु । उकें त्वलय् त्वलय्चायाच्वंगु दु व ।

जिन्दगीइ थथे नं जू वः खनी । व मां लिसे खँ ल्हाना हे च्वंगु खः । खँया बिषय साधारण हे खः । गुगुं टेन्सन काये माःगु ख हे मखु । खँ न्ह्यैपुक्क हे जुयाच्वंगु खः । न्हिलाः न्हिलाः हे खँ जुयाच्वंगु खः । खँ ल्हाल्हां हे मांया बोली अथें अथें यालां प्यालां जुयावन । खँ त्यामजिया वन । खँ ल्हानाच्वंगु म्हुतु बेक्वया वन । म्हुतुसिया सिथं सिथं लाः प्यालां वल । छु जूगु खः वं थुइके हे मफुनि । मिखा थथस्वयाः भ्वय् भ्वय् कन ।

“मां मां ”— वं मांयात त्याप्प ज्वनाः गेला गेला यात । अनसं लासाय् ग्वःतुका बिल । ग्वतुलेवं मामं म्ह छकः तिल्ल प्यंकल । नवायेगुला न्हाचः हे त्वःफिके धुंकूगु जुल ।

“का मखुथें जुल । डाक्टर सःता दिसँ डाक्टर ....”— भाःतया सलं उखे क्वथां पिब्वां वःम्ह कलाम्हं मांयात मखुथें जूगु अनुमान यात ।

“अजि....अजि... ”— छय्म्ह नं ख्वल । वं नं उघ्रिमय् डाक्टरयात फोन यात । डाक्टर नं थ्वहे ब्लकय् च्वंम्ह जूगुलिं मिखा फुति याये मलाकं थ्यंकः वल ।

तर, डाक्टर वयेगु हे जक जुल ।

मां धाःसा न्हाचः हे वने धुंकल खनी ....... । सुम्क । बिदा बाजि हे मकासे ।
   

थः नं छुं जुइमाःगु । थम्हं नं छुं याना क्यनेमाःगु चुनौति वैत मां पाखें प्राप्त जूगु खः । गुकें यानाः वं एस. एल. सी. सिधयेवं गां त्वःतेमाल । मांया हे म्हगस मखा । वं कडा मेहनत यानाः आखः ब्वन । वया प्रत्येक पासय् मांया ख्वालय् न्हिलाया चमक गाढा जुजुं वन ।

ब्वने गाकल । वया आखःया पास हे अजाःगु जुयाबिल । गामय् च्वनाः मजिइगु । शहरय् च्वनाः ज्या याये माःगु अर्थात् वं थःत शहरय् कैद मयासें मगात ।
धायेमाल धाःसा थ्व नं मांया म्हगसया छगू अंश हे खः ।

शहर । महानगर हे खत । भति भति मेहनेतं गाःगु हे मखु । चां न्हिं ज्या ज्या । ज्याय् हे थःत तक्यना यंकेमाल ।

वं गुलि गुलि मेहनतं ज्या यात । ज्यां गुलि गुलि थहां वने फत । मांया न्हिलाया चमक वया ख्वालय् उलि उलि हे थिना वल । मांयात विश्वास जुल, वया काय्नं अवश्य वया म्हगस पू वंकी । खः अवश्य पू वंकी । थुके शंका हे मदु । मामं मचाबलय् हे वयाके वचन काःगु दु । वं मांयात मचाबलय् वचन ब्यूगु दु । थम्हं मांयात बियागु वचन वं मन्त्र थें लुमंका तःगु दु । अले उकेयात हे वं थःगु जीवनया लक्ष भाःपियाः न्ह्यज्याः वनाच्वंगु दु । व वचनं यानाः हे वया मां नापलायेगु धयागु हे दँ बदँय् छकः निकः जक जू वन । व नं ततःधंगु नखः बलय् । अले छकः निकः मजिमगाःगु ज्या वइ बलय् । मखु धयागु खःसा मां न्ह्याबलें गामय् । व न्ह्याबलें शहरय् ।
शहरय् च्वँच्वं वं सीका काल वया मामं जिन्दगीइ सुख ला छु सुखया किचःतकं खंगु मदु । थ्व वया मान्यता मखु । शहरं क्यंगु जिन्दगीया यथार्थ खः छाय्धाःसा दक्व सुविधा शहरय् द्वँ चिनाच्वंगु दु । सुखयात माःगु सकतां सकतां बस्तु शहरय् मुनाच्वंगु दु । शहरय् थ्यनीगु सछिब्वय् झिब्व नं गामय् थ्यंगु मदु । सक्कलि व भिंगु सकतां सहरय् थाइगु । गामय् थ्यनीगु उथें च्वंगु बस्तु नं गुबलें सक्कलि मजुइगु । शहरय् च्वंपिसं गामय् च्वनीपिं मनूतय्त मनू हे ल्याखय् मतइगु ।

शहरय् शहर जायेक सतक दु÷सतकय् ब्वाँय् वनेत गाडि दु÷अथेहे आखः दक्व शहरय् दु÷वासः धाक्व शहरय् दु÷ब्वयेत शहरय् हवाइजहाज दु÷च्वनेत धयाधयाथें जाःगु बंगला दु÷झिलिमिलि मत शहरय् दु÷ध्यबा सैगु धाक्व सिमा शहरय् दु÷पुनेत,नयेत,जुइत माःमाःगु संसारभरया हलंज्वलं शहरय् दु ।

अझ धायेगु खःसा शहर शहरय् दु । गामय् गां नं मदु । फिसः फिसः जक दु । गन दुःख दु । दुःख हे दुःख । सिटामोल छचाः जक मालधाःसा नं घौ निघौ थहां कुहां जुइमाः । खुसिइ तां मदु । म्हय् ज्यू मदयेक तुइन ज्वनाः इरुथिरु यायेमाः । गांया दुःख लुमनीबलय् शहरया दुःख स्वर्गय् हिलावं । उकें मांयात नं शहरय् ब्वना हयाः सुखं तयातयेगु वया न्हापां निसेंया चाहना खः । मन्तुना खः ।

वया थ्व मन्तुना थाति लानाच्वंगु नं दँ दं हे दयेधुंकल । यक्व दँ । थगुने ला जि हे मजिल मामं म्हा म्हाः धाःसां वं बलं हे मांयात शहरय् ब्वना हल ।
   

वया अबु मदुगु खुदँ छु न्हय्दँ हे मयाये धुंकल । वया अबु मदयाः नं न्यादँ खुदँ हे मां गामय् च्वंच्वन । अन हे वं थःत आनन्द लुइकाच्वन । याउँका च्वन । वं हे खालिगु मिखाय् शहरया म्हगस खंके बिल । आः थः धाःसा शहरय् वयेगु, च्वनेगु नां हे मकाः । धायेतला वं उबलय् हे धाःगु खः मांयात — बाः नं मन्त । मां याकःचा गामय् च्वंच्वने म्वाःल । नु शहरय् ।

मस्यु छु खंकूगु दु मामं — गामय् । मां शहरय् च्वं वने मानय् मजू ।

— म्वाःल बाबु, शहरय् इल्ल ब्वानाच्वनीगु मोतर, मोतरसाइकलं पलाः छपलाः हे छी ज्यूगु मखु । लँ छपु त्वा ल्हायेत हे म्हय् जिउ मदु । तसकं थाकु । इकुसे च्वं । थन अजाःगु ग्यानापूगु छुं मदु । जितः थन हे याउँ ।

न्ह्याक्व करयाःसा नं मामं गां त्वःते म्हा हे म्हायेकल ।

थथे खःसां मां शहरय् व हे मवःम्ह धाःसा मखु । स्वकः प्यकः शहरय् वःगु नं दु । वइ बलय् ला बला शहरय् च्वना हे वंगु दु । उबलय् वया छेँ मदुनि । निकू क्वथाया डेरा । डेराय् मछिं मछिं च्वनेमाःगुलिं नं जुइफु मांया शहरय् वये उलि मन्ह्याःगु ।

थुथाय् काय्या बनेज्या बांलात । भौम्हेसिया नं धयाथें ज्या चू लात । महानगर हे मखा । बनेज्यां थःगु लँपु कायेवं थहांवनेत छुं थाकूगु हे मखुत । ह्वासा ह्वासां हे अमि बंैंक ब्यालेन्स जाया वल ।

येँय् । जग्गा न्यानाः छेँ दनेगु धयागु अःपुगु खँ मखु । ठेकेदारतय् भर हे मदु । थम्हं हे मिखाफुति मयासे स्वयाच्वने फुसा जिल । मखु धयागु खःसा छँे दनेगु ध्यबा जग तयेबलय् फुकाबी ।

दतं फुतं निम्हतिपू । थःगु ज्या याये हे माल । लाःगु सुयां मखु । उकें जग्गा न्या, नक्सा पास या, अप्पा फि मुंकः जु आदि भंmझत यानाजुइगु पलेसा छगू अपार्टमेन्ट हे कायेगु ज्यू थें ताया वल । भतिचा सेक्यूरितिया हिसावं नं थ्वहे ज्यूगु थें खने दत । शान्त वातावरण । निम्हतिपू ज्याय् वनी बलय् छेँय् पिवाः नं म्वाःल । क्वथा तालं ग्वया वंसा गात । लिसें लः व मतया सुबिधां यानाः नं मन उप्वः थुखे हे क्वसाल । छुं जुयाः कन्हे गाडि छगः कायेफत धाःसां पार्किंगतकया च्यूताः कयाच्वने म्वाःलीगुलिं नं निम्हतिपूया सल्लाह थुखेहे उप्वः धेचुल ।

बस् । छगू अपार्टमेन्ट थःगु नामय् याना काल ।

खजा अपार्टमेन्टय् सिफ्ट जुइत नं वं मांयात सःतूगु खः । उबलय् मांया लिमलात । लिपा लिपा नं छेँ छकःला स्वःवा धकाः तःकः तःकः हे सःते धुंकल । तर मां हे मखा । दक्व गृहस्थी थम्हं हे सम्हालय् यानाच्वंम्ह मामं गुबलें फुर्सद पिकाये फुगु हे मखु । वया लिलाःगु हे मखु । वा पीगु । घाँय् प्वीगु । ब्वला वनेगु । वा लयेगु । छ्व पीगु । कःनि खायेगु । आदि इत्यादी । अने तने ज्या वया हे च्वन । ज्यां प्वंगु हे मखुत । सुथय् दंसाःनिसें बहनि द्यने मत्यःतले मां घौछि सुम्क मदु । थ्वहे ज्याया भीडय् मांयात सुख दु । आनन्द दु ।

थुथाय् । अपरझत मां मफयेकल । लः छघुतु, वासः छगू चम्चा त्वंकीपिंतक सुं दुगु मखुत । त्वाः बाः । जःला खःलां तारंतार फोन याना हल ।

मां हे मफुसेंलि......दक्व ज्या जि अथें वाना व ब्वाँय् वन । सिकिस्तम्ह मांयात सुसाःकुसाः यायां झिन्हु फुत । अन हे च्वं च्वने वयात थाकुया वल । थुखे ज्यां तिवांतिवां सःताहये धुंकल । मन छखे तयाः म्ह छखे च्वंच्वने अःपुगु खँ मखुत ।

माम्हंला धयाच्वंगु खः “म्वाःल बाबु, छ हुँ । जितः जिइ धुंकल । थन जितः ग्वाहालि याइम्ह लाता बौचा दहे दु । छं छुं धन्दा कायेम्वाः । हुँ छ ।”

तर धयां छु याये । मफुम्ह मांयात अथें वाना गथे वयेफइ व । उकेसनं जःला खःला, समाजयात वं गुबलें ख्वाः क्यने म्वाःलला ? ।

वयात तःधंगु संकट वल । आः मांयात भतीचा जिल धकाः त्वता थके थः येँय् थ्यने मलाःनि हानं तच्वयेकल धाःसा ....छेँ नि वनेगु कि लिफःतुलाः मांयाथाय् नि ब्वाँय् वयेगु जुइ ।

वं स्यू । अन थ्यने मलाःनि ज्यां त्वपू वयेधुंकी । छ्यं हे ल्ह्वनेलाइमखु । थन नं आःतक मांया ल्वय् छु खः बांलाक सी मदुनि । हेल्थ असिस्टेनं वासः याःगु भरय् शरीर भतीचा धस्वाःगु जक खः । थन न डाक्टर दु न अस्पताल हे दु । शहरय् जूसा धाक्व डाक्टर दु । धया धयाथें जाःगु अस्पताल दु । ध्यबा जक व्हले फयेकेमाः १ नम्वरया डाक्टरत बिरामिया जःखः फन फन चाःहुका च्वने ज्यू । गामय् दच्छि म्वाइम्ह मनू शहरय् च्वंसा झिदँ उप्वः म्वाइ । उकें मामं म्हाः म्हाः धाःसां छ न्यल आः छं न्हापा थें ज्या याये फइमखुत । शरीरं हे मबी धुंकल । आःला भजन कीर्तन यानाः आराम यायेगु ई खः । अनसा बाउचिया मामं नं सुसाःकुसाः याइ । आदि इत्यादी । अनेक कथं हेकाःहेकाः म्हाःम्हाः धायेक धायेक नं गांया दक्व छेँ बुँ मियाः मांयात थः नापं ब्वनाहल ।

वयेसाथं मांयात तःधंगु अस्पतालय् च्वनीम्ह तःधंम्ह डाक्टर क्यने यंकल । डाक्टरं अने तने जाँच याकल । तः ल्वय् मखु खनी । अस्पताल भर्ना यायेम्वायेक हे मांयात याउँल । जिल ।

गामय् । न्हि न्हिं बँुइ वन । बँुइ स्वयेमाःगु, यायेमाःगु ज्या यात । जःला खःला मुन । गां भ्वछिया समाचार काल बिल यात । वालय् निकः हात बजार जुइ,अन वन । थःत माःगु सामान काल । थःके उप्वःगु सामान मिल । गबलें सुया छु पुजा धाइ,गबलें सुया छु पुजा याइ । सःतः वइ । वन । थम्हं नं इलय् ब्यलय् छगू निगू पुजायात । सकसितं सःतल । बाखं न्यन । आः यहत्र ला ठिक हे जू, परहत्र नं ला भिंकेमाल । उकें धर्म कर्म याना जुल ।
मनयात आनन्द दु । सन्तोष दु । व सिबय् नं उप्वः थ्व छेँ बुँ सकतां सकतां वय्कलं यक्व दुःखसियाः जोरजाम यानादीगु खः । वय्कःया हि चःति थुके दु । उकें थौं वय्कः मदुसां क्वथा, च्वत, बैगः, छेलि,बुँइ दक्व सक्व थासय् वय्कःलिसे च्वनाया लुमुगु आभास आः नं वैच्वंगु दु । उकें हे मांया थनं उखे थुखे गनं वनेमास्ते मवःगु खः । थन खनेमदयेक सुलाच्वंगु आत्मियताय् मांयात सुख दु । थुके हे मामं लुधनाया संसार लुइका काःगु दु । थ्वहे संसारय् चाःहिला च्वनेबलय् मांयात सन्तोष दु ।

आनन्द, सुख मनयात माःगु खः । व मामं कयाच्वंगु दु । मांयात थन गुगुकथं नं दुःख मदु ।

तर, थुथाय् शरीरं साथ मबिल । बुरि नं ला जुल । “आः काय् भौ नं सेवा याका च्वनेगुका । गुलि दुःख सीगु । गात दुःख सी ।” त्वाः बाः, पासाभाइपिसं तःकः तःकः हे वैत न्वाये धुंकल । अथेला व शहरय् वंहेमवंम्ह नं ला मखु । तःकः तःकः हे वंगु दु । वने बलय् वहे काय् भौया डेराय् वना च्वनीगु खः । मेथाय् गनं च्वनेथाय् दुगु नं मखु । यःगु नं मखु । वया काय् च्वंगु थाय् नं बांमलाःगु थाय् मखु । तःधंगु चुक दु । चुक न्ह्याबलें गुलजार । न्हिनय् जुलकि जःला खःला सकलें थःथःगु ज्या ज्वना चुकय् वइ ।

–मचा बूपिनि चिकं पाकाच्वनी .....

–वसः ही माःपिनि वसःहियाच्वनी ...

–वा पाय् माःपिनि वा पाय् है ....

–जाकि ल्ययेमाःपिनि जाकि ल्ययाच्वनी ...

–मस्त उखें थुखें घःचा म्हिताच्वनी ...

–ज्याथः जिथिपिं थ्वचा थ्वचा मुनाः गफ यानाच्वनी ...

गामय् थें हे न्ह्यैपुसे च्वं । सकस्यां वैत गांया अजि धाइगु । अपिंलिसे हे वनाः वं थनया गुलिखे बहाः बही सीकेनंगु दु । गुलिखे तिर्थ चाःहिले धुंगु दु । उकें थुपालय् शहरय् सदांया निंति च्वनेकथं वःसां मांया मयः थ्यंक मजू । गामय् स्वानाच्वंगु भावनात्मक मतिनां यानाः भतिचा त्वःते थाकूगु जक खः ।

ट्याक्सिं कुहां वयेवं....

भराय्खागु छेँ । झिलिमिलि मत । बांलाःगु क्यब । इल्ल दिकातःगु मोतर,मोतर साइकल । गयेहे म्वायेक सुल्ल थहांवनीगु स्वाहानें सुल्ल थहां वं बलय् गां त्वःतेमालाः भतिचा गरखेसे जुयाच्वंगु मन नं चकना वल । गुबलें मन्यनागु, मखनागु न्हूगु संसारय् पलाः तया थें जुल । झन छगू हे थासय् ज्याछिंक दयेकातःगु बैठक । क्वथा । भुतू । चःबि आदि इत्यादि खं बलय् मांया ख्वालय् थाःगाः मदयेक लय्ताः पिदन । मन मुसु काल । थःगु जुगंनिसेंया म्हगस पू वंगु भापिल । काय् भौयात दुनुगलं निसें सुवाः बिल । अमिगु पौरखय् थम्हं गर्व यात । थम्हं यक्व दुःख सियाः मचायात ब्वंकागु सार्थक जूगु तायेकल । भगवानयात यक्व यक्व सुभाय् देछात ।

व खुन्हु मां तसकं याउंक द्यन । चच्छिं छन्ह्यः जुइक ।

तर, मांया ख्वालय् पिलूगु थ्व लसता ताउत ल्यनाच्वने मफुत । मांयात थःथम्हं सिखलं चिनाथें जुया वल । म्हुतुइ सुकां सुयाः मिखाय् पत्तिं चिकातःम्ह थें जुल । मां वाथावाथा कन । न्यवः हे न्ह्याकाः जेलय् च्वंच्वंगु खःसां खुँ,लुच्चा, डाँका,ज्यानमारा सकलें सकलें छथाय् च्वनी । सकलें छथाय्् मुनी । छुं मखुसां थवंथवय् म्होतिं नं दुःख सुख ला ब्याका च्वनी ।

तर, थन ला.......................

भराय्धंक राक्षस थें ज्याःगु छेँ दु । छेँय् इल्ल मनूत नं दु । तर, राक्षसं खनीभनं सकलें गुपचुप । थःथःगु क्वथाय् । थःगु क्वथाय् दुहां वन कि सुयां पिहां वये म्वाः । लब न्ह्याबलें सुनसान । झिजांमिजां । मस्त तकं लबय् म्हितू मदु ।

खँ ल्हाःसां थःथवय् जक । न्ववाःसां थःथवय् जक । न्ह्यूसां थःथवय् जक । ख्वःसां थःथव् जक । मेपिं सुं सुयांलिसे न्ववाय् म्वाः । खँ ल्हाये म्वाः । न्हिले म्वाः ।

न ज्वज्वलपा दु । न ज्यःना धुन, ब्यलि सिधल हे दु ।

थुखे । उखे । उखे । थुखे । थःथःगु प्mलैट दु । दक्व थासय् परिवार परिवार हे च्वंच्वंगु दु । सकस्यां मू लुखा उखें थुखे । थुखें उखे । चुलिं चू दु । तर अजूचायापुक्क जःलाखःला गनं मदु । सुं सुयां जःलाखःला मखु । सुं सुं मखु ।

मां त्वलय् त्वलय् चाल । शहरय् ब्वलना वःगु थ्व अजिवगु संस्कृति खनाः । न्हापा ला थथे मखु । आः गथे जुयावःगु ?

झिंन्यात जाःगु छेँया च्यातँय् च्वंगु छब्व अमिगु प्mलैट । क्वथा स्वकू, बैठक, भुतू सकतां सकतां परिवारयात ल्वय्क छिंक दु । च्वनेया आनन्द दु । खुइखाइया भय् मदु । पिनेया मू गेटय् सिपाइ पाः दु । दुने पिने यायेत हे न्यनाः न्यनाःयायेमाः । म्हमस्यूपिं, म्वाः मदुपिं वइ वनी धयागु भय् मदु ।

दक्षिण मोहडा लाःगुलिं निभाः न्हिच्छिं हे दु ।

च्यातय् जक झिगू परिवार च्वंच्वंगु दु । सकलें एक से एकयापिं । गुम्हं डाक्टर । गुम्हं इन्जिनियर । गुम्हं वकिल । गुम्हं ब्यापारी । गुम्हं कमिसन एजेन्ट । गुम्हं सचिव । गुम्हं सिपाहिया ततःधंपिं हाकिम । गुम्हं छु .... गुम्हं छु .... ।

मामं म्हिगः खंगु येँ शहर आः महानगर जुइधुंकल । येँय् यमित सिवें पिनें वःपिं उप्वय् धुंकल । न्हापा असं वंगलय् जक मनूत म्वः म्वः दैगु खःसा आः न्ह्याथाय् स्वःसां मनू हे मनू जुइधुंकल । वा पीगु बुँ दक्वं छें जायेधुंकल । गनं जक वःपिं मनूत खः थुपिं । न्ह्याथाय् स्वःसां मनू हे मनू । कोलाहल । न्यनां न्यने मजीक ।

शहर गुलि कोलाहल जुजुं वन । थनया मनूत उलि उलि हे याकःचा जुजुं वनाच्वन । व्यक्ति व्यक्तिइ केन्द्रित जुजुं वन शहर । मामं थ्व खँ थुइगु ख हे मखुत ।

गामय् लापचा थें ब्वयाजूम्ह मां !

थन । याकःचा । न्हिच्छि क्वथाय् कुंकाच्वनेमाःबलय् मांयात उकुस मुकुस हे जुल । टि.भि. स्वयेगु बानि मदु । स्वसां द्यःया प्याखं छकः निकः जक खः । मेमेगु बांलाक्क थूगु नं मखु । मांयात छन्हु न्हि छ्यायेगु हे दच्छि बिकेगु थें जुल । जिन्दगी थन हे बिकेमानी । ओहो ! वाथावाथा कन मां !

काय्म्हं नं सोसाइतिइ मल्वः । झीत असभ्य धाइ । मज्यू मज्यू ” धाःसां मामं थःत प्वःची फुगु खहे मखुत । सुथय् आठ बजे । बहनि पाँच बजे लिपा । मां मेचचा छगू ज्वनाः लँबया वरण्डाय् फ्यतू वल ।

च्यातँय् झिगू फ्लेटय् च्वंपिं मनूत । सुथय् हथापथासं लिमलाः फमलाः पिहां वनी । सन्ध्याकाः जुइवं त्यानुक्क धिकिहिं दुहां वइ । दुहां वःसां पिहां वःसां मनूत खुरुखरु वइ । सुरुसुरु वनी । थुखे नं मिखा ब्वइमखु । उखे नं मिखा ब्वइमखु । मानौं छगू ग्याःचिकु दु सकसिकें । सुं लिसे नं मिखा ल्वातकि वया गोप्यता छ्यातां जुइ ।

मनूत आदम्बरया खोलं भुनाः इरुथिरु जुयाच्वन । कमसेकम मांया मनय् नि थथे वन । लँबय् च्वँच्वं हे मां नं म्हसीकल । ५ नं क्वथाय् डाक्टर जोशीया परिवार च्वनीगु खः । ८ नम्वरया क्वथाय् मय्जु शाक्य व वया मस्त जक । ६ नम्वर अमि थःगु हे जुल । ४ नम्वरय् च्वनीपिं इन्जिनियर तुलाधर खः । ७ नम्वरय् सिपाहिया हाकिम च्वनीगु खः । वया विरामिम्ह अबु नं दु क्वथाय् । गुबलें गुबलें लुखा चालिइबलय् मुसु थुसु थुसु तःगु तायेदु । जःलाखःला हे खत । म्ह नं सी । छता निता खँ नं ज्वी । उकें मांयात स्वः वनेला वनेला धयाथें जुइगु । तर मज्यू हँ । मेपिनिगु क्वथा क्वथाय् दुस्वः पिस्वः यायेगु थनया चलन मदु हँ । असभ्य जुइ हँ । अथे वन कि व्यक्तिया निजी जिन्दगी दखल ब्यूगु तायेकी हँ ।

छु छु खँ छु छु । मां लाति हे जुइ ।

तःन्हु लिपा तिनि । छम्ह निम्हसें मांयात स्वयाः मुसुक्क न्हिल । गुम्ह गुम्हसें छ्यं ल्हुकुक्क संकल । भला लँबय् च्वं वःगुलिं छम्ह निम्हलिसे हाइ हलो ला जुल । क्वथाय् च्वंच्वंगु खःसा उलि नं मजुइगु । उलि नं मसीगु ।

जमाना यक्व हे पाय्धुंकल । न्हापाया शहर मखय्धुंकल । न्हापाया मनूत नं मखय्धुंकल । गामय् च्वंगु छँे मियामथकूगु जूसा मां थन च्वनीम्ह मखुत । आः वनां गन वनेगु । च्वनां गन च्वं वनेगु । म्ह्याय्पिन्थाय् च्वं वनेधाःसा छम्ह बिराटनगरय् । मेम्ह नेपालगंजय् । अमि नं अथे हे खः । लाःगु सुयां मखु ।

थन । काय् भौ सुथय् पिब्वाइ । बहनी लिबाक्क दुहां वइ । पशुपतिइ छकः मत च्याके, स्वयम्भुइ भगवान द्यःया दर्शन छकः याये धकाः मनंतुंगु हे लांलां दयेधुंकल । धाःसा जिउजिउ धाइगु । फुर्सद गुबलें पिकाये पूmगु मखु । थः याकःचा वने । वने सःगु मखु । पासा थ्वय् जःलाखःला धकाः छम्ह दुगु मखु ।

हरे ! सुख ला सुख थजाःगु सुखया निंतिं हे ला वं जिन्दगीभर म्हगस म्हंकाच्वंगु ?

मचातय्त नं धायेगु छु । न्हिच्छि ज्या सनाः,न्यत्तुन्यलाः बहनी थपीचापागु ख्वाः ज्यानाः दुहां वइ । लाकां मोजा त्वत्वं ताःहाकःगु झसुकाःलिसें फ्यतुइ ।

मांया मन हे मखा । मायां अथें झू चाइ । थःके ब्वलना वःगु बःचा बःचाधंगु इच्छायात मामं अथें नुना छ्वइ । मचातय्गु सुखय् वं थःगु सुख नं लुइका काइ ।

जिन्दगी धयागु नं अजूचायापु । इलं मनूतय्त गनं गन थ्यंका बी । मां नुगलय् खँ वायेका च्वनी । मनय् लू थें धाक्वमाक्व यानाः, गांया छपातं सर्गः थःगु यानाच्वनागु उगु ई नं ई हे खः । थौं झिंन्यातजाःगु छेँया च्यातँय् च्वंगु छगू फ्लैट दुने कुंकाः सुखया संसार खंका च्वनेमाःगु थ्व ई नं ई हे खः । मां गुबलें गुबलें ईया थ्व चक्रयात लुमंकाः थःथम्हं मुसुकाइ ।

मामं थःगु मनयातला प्वःची — मचातय्गु ख्वाः स्वयाः । तर, शरीर थम्हं धयाथें गन दु धकाः । ज्यायानाच्वंगु ल्हाः प्वःचीवं । जुयाच्वंगु तुतियात लासाय् झ्वःलंकेवं मन्यात ला संतोष दत खइ । थुखे ल्हाः स्याना वल । तुतिं चुइ मजिल । स्याना वल ।

“जुइ माल ।” डाक्टरं सल्लाह बिल । छगू निगू एक्सरसाइज नं स्यना बिल । शहरीया जिन्दगी डाक्टरया सल्लाह कथं जक न्ह्याइगु खः । सनिलया इलय् । छय्चां ल्हाः ज्वंकाः मां कुने क्यबय् इरुथिरु याः जुल । अहो ! न्हापा घौपलखं हे गनं गन थ्यनीम्ह मांया पलाः हे मन्ह्याय् धुंकल । क्यबचा छगू चाःहुलेत हे थाकुया वल । सेंसें मिन । दिपाः काकां न्ह्याय् माल । क्यवय् चाःहुला च्वँच्वं सुं छम्ह लिसे अय्क्क न्ववाये बलय् न्वहे वाये मसया वन ।

थःथम्हं लाति जुयावंगु खनाः मां अजू चाल । तुतिं पलाः हे छी मसःगु खनाः मां त्वले चाल ।

सुखया मू चाचू मखु खनी मामं थःथम्हं ल्याः चाः पिकाल ।

म्हुतुयात सुम्क तयाः । ल्हाः प्वःचिनाः । तुति लासाय् झ्व:लंकाः । आरामं च्वँच्वं । मांयात आराम खनाः हे वाक्क वल ला छु थें । थौं जूबलेला मामं सासःहे ल्हायेगु त्वःता बिल ।
   

मचा बलय् । व तसकं हे बदमास ।

वया स्कूल हे वने म्हाः । छताला स्कूल छेँ तसकं हे तापाः । वनेत हे छघौ बिइ । वयेत छघौ । उकेसनं माष्टरं न्हकु सँ ब्वब्व स्याइगु वयात तसकं हे स्याः । मेता स्कूलय् पाठ कण्ठ यायेमाःगु । वं ब्यूगु पाठ गथे खः अथे कण्ठ याये फुगु हे मखु । उकें स्कूल वनेगु धाधां व बिसिबिसि जक जुइगु । स्कूल वने वया म्हाः । म्हा हे म्हाः ।

छन्हु । अबुया कोटय् च्वंगु नोट पानाः चौताराय् तास म्हिताच्वंगु । स्कूल हे मवंसे । लिखतं अबुं त्याप्प हे ज्वन । पासापिं ला बिस्यु वन । वयात लँ धुच्छि भ्वसुक्क दादां कक्कु ज्वनाः छेँय् हल । ल्हाःतुति चिनाः छेली दुने कुन । पिनं चुकू तयाबिल ।

बाःयात तसकं तं पिहां वःगु जुयाच्वन । — “थ्व तसकं हे बदमास जुल । थ्वयात थौं नकेगु नं मखु । त्वंकेगु नं मखु । थथेहे कुना ति । खापाखिपा चायेकेगु मखु ।”

बाः नं मांयात उजं बिल । नाप नापं छं थ्वयात यक्व हे पुलपुलेयात धकाः मांयात नं ब्वःबिल । व ख्युं क्वथाय् हुं हुं ख्वयाच्वन । ल्हाःतुति चिनातःगु दु । इकिधिकी सने ज्यूगु मखु । वं अथें अन हे च्व वयेकल ।

बहनी । ख्युंकाः । वया बाः द्यं वनेधुंकाः तिनि मामं तीजक खापा चायेकः वल । व ला ख्व ख्वं अथें अन हे न्ह्यः वयेके धुंकल खनी । मामं चिना तःगु ल्हाः तुति फ्यना बिल । पित्तुपियाः तीजक थन । मांयात खनेवं हानं वया ख्वये वल । व हुं हुं ख्वल ।

“म्वाःल बाबु म्वाःल । आः ज्ञानि जु न्हि । स्कूल वनेमखु छता धायेमते । खं ला छं बाः तसकं हे तं चाल । छंला बाःया ध्यबा नं खुयाकाल खनी । अथे याये मज्यू । लिपा व ध्यबा छंत हे ला खःनि ।”
“वा । पुता वा । छंत तसकं नयेपित्यात ।” धाधां मामं जाप्यय् वया म्हुतुइ ल्वसुकल ।

“ ज्ञानि जु न्है बाबु । झी थन गामय् गुलि दुःख खंला । छंत स्कूल वनेत हे गुलि थाकु । गुलि तापाः । कन्हे कंस छ शहरय् वनाः यक्व आखः ब्वं वने मानि । अन हे छं छखा छेँ दनेमानि । छं मां बाः गुलि गामय् च्वनेगु । थ्व पुतां शहरे छेँ छखा दनाः मां बाःयात नं सुखं तै तिनि खला ?

“खः।” धकाः वं छ्यं संकल ।

“ खः ।” तीजक आः नं वया म्हुतु सन । छ्यं ल्हुकुक्क सन । मिखां स्वःस्वः ख्ववि बाः वल । नुगः हील । पम्हुइ थें जुयावल ।

मां ..........

वया नुगः जक चिल्लाय् मिल्लाय् दंक हाल । ख्वल । वया म्हुतु धाःसा गुगुं अदृष्य ल्हातं त्याप्प तिना तल । कलाःम्ह नं गाच्वः म्हुतुइ दुछ्वयाः मिखां जक ख्वबि स्वःस्वः वयेकु वयेकुं हिक्क हिक्क मिंकाच्वन ।

तःधंगु बिडम्बना धयागु थ्व हे जुल । मां थें ज्याःम्ह मदुबलय् .....

मां...................मां......................मां....................

नुगः हे तछ्याना चिल्लाय् मिल्लाय् दना छाति दादां वया ख्वये मास्ते वैच्वन । तर वं अथे ख्वये मफै च्वन छाय्धाःसा, थन च्वंपिसं होस् यायेमाः नाप च्वंपिंत थःगु सलं डिस्टर्ब ला जुयाच्वंगु मदु ? मेगु क्वथाय् च्वंपिन्त डिस्टर्ब यायेगु धयागु हे छिं थःगु असभ्यपन पित ब्वयेगु खः । छिगु स्टाटस छिगु ब्यवहारं क्यनाच्वनी । थ्वहे थौंया सभ्यता खः । संस्कृति खः । उकें दुनुगलं निसें वयाच्वंगु ख्वयेयात नं वं बलं पनाच्वन । म्हुतुप्वाः तिना हिक्क हिक्क यानाच्वन । सः पिहां वनी धकाः हे खः वया कलाःम्हं नं गाच्वः म्हुतुइ दुछ्वया तःगु ।

व पुतिं फ्यतुनाः ख्वालय् स्वःस्वः ख्ववि बाः वयेकाच्वन । कलाःम्ह लिक्क वयाः वया ल्हाः ज्वँज्वं छ्यं जक संकाः भाय्याना ख्वयेमते ख्वयेमते धयाच्वन । धायेतला भाःतम्हेसित वं भाय्याना ख्वयेमतले ख्वयेमते धयाच्वन, तर व स्वयं नं मिखां ख्वबि धाः हायेका हे च्वन ।

टक...टक.... थुबलय् पिने लुखाय् सुनां नक यात । अमिसं बलं हे थःत संयम यात । ल्हातं स्वःस्वः वयाच्वंगु ख्वबियात हुल । खापा चायेकः वन । पिने मूलुखाया हेड पाले लिसें शव बाहनया मनूत खनी । वं लँ चिला बिल । अपिं दुहां वल । अमिसं हे सीम्हयात स्टेचरय् तल । तुयू कापतं भुन ।

यंकूसां जिल ला धया थें अमिसं वया ख्वाः छकः पुलुक्क स्वल । वं छ्यं भतीचा धे चुकल । प्यम्हेस्यां प्यखे कुने ल्हातं ज्वनाः सीम्हयात क्वथां पित यन । अपिं नं ल्यू ल्यू वन ।

लबय् डाक्टर जोशीया निम्हतिपुं ध्वदुल अमिसं लँ चिला बिल । मय्जु शाक्य मस्तय्त स्कूलय् तः वनेत पिहां वःगु अपिं नं छखेलित । ७ नं क्वथाय् च्वनीम्ह सिपाहिया हाकिम नं क्वथां पिहां जक वयेत्यंगु व लुखाय् सं तक्क दित । ४ नंया इन्जिनियर तुलाधर लिफ्टं पिहां जक वःम्ह व अनसं लिचिलाः दित ।

सीम्ह लिफ्टं यंके मछिन । स्वहानं हे क्वत यंके माल । अपिं नं ल्यू ल्यू स्वहानें हे कुहां वन । न्ह्याबलें लिफ्तं हे जक थहां कुहां यानाच्वंगु, बल्लं थौंतिनि अपिं थम्हं हे नं थ्व च्यापु स्वहानय् पलाः तयाच्वन ।

कुने । सुचं बोर्डय् वया मां मदुगु सुचं तिकातयेधुंकल खनी तर सुचं बोर्डय् स्वयेगु फुर्सद सुया दु । सकलें लिफ्टं कुहां ववं हुर्र थःथःगु गाडिइ च्वना ब्वानाच्वन ।

शव बाहन लुखा न्ह्यःनेसं दिकातःगुलिं ल्यूनं शव बाहन चायेकेत सीम्ह छकः वँय् दिकेमाल । लुखाय् सने स्वये मछिन । उकें तलं कुहां वःपिं व कुनं तले वनेमाःपिं मनूत अन थिंग दनेमाल । पलखया निंतिं अन हुल्ल मनूत मुं थें खनेदत । ध्वदूपिं, ख्वाः चूलाःपिं सकस्यां वैत स्वयाः छ्यं छक अय्क्क धे चुकल । छु याये धयाथें । बस् ।

न्ह्यदँ ति न्ह्यः वया बा मदुगु खः । उबलय् व गामय् हे । मां बना वंक वंक छाति दायाः दायाः ख्वयाच्वन । वया ख्वः सः गां न्यंक न्यन । वहे नं व्हाँय् व्हाँय् ततःसलं ख्वःगु खः । पासाभाइपिसं ज्वनेमायेक । अबलय् । वया बाः मदुबलय् । गां भ्वछिसिनं नुगः मछिंकल । सकस्यां थः छम्ह स्याःन्याःम्ह मदुगु तायेकल । मसां थ्यंक गां हे छस्वा जुइक सनाः वल । अमिगु छेँ लिसें स्वाःगु जःखःया परिवारं ला व कुन्हु दुखं हे च्वन । बहनी सुनानं थःगु भुतुलिइ मि तकं मच्याकू । बिचाः वैपिं छेँय् गुबलें मप्वं । अमिसं हे गुलिखे यायेमाःगु बिधि व्यवहारय् हारगुहार याना बिल । अमित बाः मदयाः याकःचा जूगु आभास जुइके हे मबिल ।

ध्याम्म...................

ड्राइभरं शव बाहनया लुखा तित । अतितय् दुबिनाच्वंम्ह व, छक्वलं वर्तमानय् लिथ्यन । अय्क्क मिखा ब्वल । ओहो । अपिं स्वम्हं शव बाहन दुने सीम्ह नापं कात्तुकाकाः च्वंच्वने धुंकल खनी । हेड गार्ड खने मदये धुंकल । अपार्टमेन्टया जःखः न्हापा थें हे सुनसान जुइ धुंकल । गाडि स्टार्ट यायां ड्इभरं गन यंकेगु धकाः न्यन । वं न्हाचः हे तता केहें,थःथिति स्याःन्याःपिं छम्ह निम्ह पासाभाइपिन्त पशुपति हे वा धायेधुंकूगुलिं, वं वहे प्यंगः आखः

नवात—पशुपति............. ।

शव बाहन न्ह्यात । हेड गार्ड गेटय् च्वंवने धुंकल खनी । वंहे गेट चायेकल ।

मामं न्हापा छु कर्म यानावःगु खः थें मस्यू ..............।

सी बाजं नं म्वाःल । ख्वया वनेमाः धयागु नं मन्त । सनाः वःपिं नं दुगु मखुत । बस् । महानगरया व्यस्त सतकय् छगः शव बाहन कात्तुमतु काकां ब्वानाच्वन .............। (क्वचाल)