nepal investment baink

बाखं च्वमि परशु प्रधान मन्त

नेवा: अनलाइन न्युज – ललेन्द्र शाक्य | ने.सं. ११४४ सिल्लागा दसमी (२०८० चैत्र ६ गते) मंगलवाः

नेपाली साहित्य क्षेत्रया छम्ह शिखर स्रष्टा बाखं च्वमि परशु प्रधान मन्त । सोमवाः बहनी येँया न्हू बानेश्वरय् च्वंगु निवासय् ८० दँया उमेरय् बाखंच्वमि प्रधान मदुगु खः ।

मदुम्ह प्रधानया अन्तिम संस्कार थौं मंगलवाः पशुपति दीपय् जूगु दु ।

मदुम्ह बाखं च्वमि प्रधानया निम्ह काय् व निम्ह म्ह्याय् दी ।

साहित्य क्षेत्रया विधाया ल्याखं प्रधान आपालं विधाय् दु । बाखं, मचाबाखं, निबन्ध, समीक्षा, समालोचनापाखें प्रधानयात यक्वसिनं म्हस्यू ।

सरकारी जागिर नयेत पूर्व तयारी याःपिन्सं प्रधानयात सामान्य ज्ञान च्वइम्ह लेखकया रुपं म्हस्यू । वय्कःया सामान्य ज्ञान डाइजेष्ट २९ संस्करणतक पिदंगु दु । अथेहे, सफू विमोचनया संस्कृति नेपालय् दुतहःगु श्रेय नं परशु प्रधानयात हे वनी ।

बि.सं. २००० सालय्भोजपुरय्जन्म जुयादीम्ह परशु प्रधान नेवाःया काय् जूसां नं ब्रम्हुया म्ह्याय् जानुकादेवी रेग्मी (साहित्यय् कल्पना प्रधान) यात बिसिके यंकाः क्रान्तिकारी जीवनया सुरुवात यानादीगु खः ।

जात मिलेमजूम्ह अन्तरजातीय ब्याहा याःगुलिं प्रधानयात उगु ईया कानून कथं १२ दँ जेल व वया जहानयात ६ दँ तक जेल सजायँ जुइफूगु खः, उकिं थःम्हं ययेकूम्ह जानुकादेवीयात ज्वनाः प्रधान भोजपुरं बिस्युं वयाः मोरङ जुयाः भारतया बनारसतक थ्यंकाः सुलाच्वंगु खः । २०२० साल भाद्र १ गते नयाँ मुलुकी ऐन वयेधुंकाः जक प्रधान थःगु देसय् सार्वजनिक रुपं पिहाँ वःगुखः ।

परशु प्रधानलिसे संगत याःम्ह साहित्यकार व च्वमि गोविन्द गिरी प्रेरणाया कथं प्रधानयात येँय्तक हयेगु ज्या कवि केदारमान व्यथितं याःगु खः । प्रधानं व्यथितयात अबु हे नालातःगु खः । गड फादर धाःगु दु । व्यथितं नं परशु प्रधानयात काय् कथं ब्यवहार व स्नेह बिइगु खः । व्यथितया जीवनकाल ज्वःछि थ्व स्वापू दयातुं च्वन ।

भोजपुरपाखें येँय् तक हःम्ह केदारमान व्यथित जूसां नं येँय् स्थापित यायेत व आर्थिक मेरुदण्डयात कःघायेगु ज्या धाःसा रत्न पुस्तक भण्डारं याःगु खः । परशु प्रधान गाइड बुक च्वइम्ह खः । गुकिया दँय् दसं परिमार्जित संस्करण पिहाँ वइगु खः । प्रधानं च्वःगु सामान्य ज्ञान डाइजेष्ट २९ संस्करणतक पिदन ।

विमोचनया संस्कृति नेपालय् दुतहःगु श्रेय परशु प्रधानयात वनी । प्रधानं भारतय् सफू विमोचन जुइगु हिन्दी अखबारय् बुखँत ब्वंगु खः । उकियात हे प्रधानं नेपाः दुतहःगु खः ।

२०३४ सालय् पिदंगु ऋषिराज बरालया न्हापांगु उपन्यास “भावना” बागबजाःया राम दाईया भट्टीइ विमोचन जुइधुंकाः विमोचन खँग्वःया व्यापक छ्यलाबुला व विमोचन संस्कृतिया आरम्भ जूगु खः । थुकिया सूत्रधार परशु प्रधान हे खः ।

उगु ज्याझ्वलय् हरि अधिकारी, ध्रुव सापकोटा लिसेंया तत्कालीन ईया साहित्यकारपिनिगु मिलेजूगु जमात दूगु खः । थथे राम दाईया भट्टीपाखें सुरु जूगु विमोचन संस्कृतिया चरमोत्कर्ष पाँचतारे होटलतक थ्यन ।

परशु प्रधान राष्ट्रिय समाचार समितिया जागिरे नं खः । लिपा प्रधान साझा प्रकाशनया जागिरे जुल । २०२६ सालनिसें प्रधान प्रशासन सेवाय् च्वन । २०४६ साललिपा प्रधानया जागिरे जीवन सुखद् मजुल । उकिं प्रधानं जागिरे जीवनपाखें २०५१ साय् अवकाश काल । वधुंकाः प्रधान अझ स्वतन्त्र रुपं साहित्य क्षेत्रय् सक्रिय जुल ।

प्रधानं पंचायतकालय् जुइगु भ्रष्टाचारया सुन्दर बाखं “डल्ले खोला”य् च्वःगु दु । सरकारी पदय् हे च्वनाः प्रधानं च्वःगु उगु बाखं गरिमाय् छापेजूगु खः । उकिं हलचल मच्चेयाःगु खः ।

प्रधानया रचना अंग्रेजी, जापानी, बंगाली लिसेंया भाषाय् नं छापेजूगु दु । स्नातक तहया अनिवार्य अंग्रेजी विषयया पाठ्य सफुतिइ प्रधानं च्वःगु बाखं “टेलिग्राम अन द टेबल” चर्चित जू । “टोकियामा लिटिल बुद्ध” पाखें लाकूगु लिच्वःयात प्रधानया लेखकीय जीवनया शिलालेख सहर कयातःगु दु ।

साहित्य क्षेत्रय् पी.आर. प्रधान नामं तकं म्हस्यूम्ह परशु प्रधानया न्हापांगु रचना २०१६ सालय् विराटनगरपाखें पिदंगु छहारीइ “हाँसेकी ती चन्द्रमा” शीर्षकय् पिदंगु खः । प्रधानं विराटनगरय् च्वंगु वाणी प्रकाशनया छगू दशकतक नेतृत्व याःगु खः ।

सुरुइ प्रधानं चिनाखँ च्वइगु जूसां नं न्हापांगु चिनाखँ मुना “जीवनपथ” पिदनेधुंकाः धाःसा चिनाखँयात चतक्क हे त्वःताः बाखँयात मू विधाया रुपं कःघाःगु खः ।

प्रधानया १३ गू बाखं मुना सफू पिदंगु दु । प्रधानया बक्ररेखा, फेरि आक्रमण, यौटा अर्को दन्त्यकथा, असम्बद्ध, समुद्रमा अस्ताउने सूर्य, प्रतिनिधि कथाहरु, यौटा क्रान्ति पुरुषको जन्म, कथा र रचनागर्भ, उत्तरार्ध, द लिटिल बुद्ध इन टोकियो, परशु प्रधानको उत्कृष्ट कथा, नेपलिज लभ स्टोरी र धनिया बाखं मुना सफू पिदंगु दु ।

आकाश विभाजित छ व विसर्ग उपन्यास नं पिदंगु दु प्रधानया ।

परशु प्रधानं मचा साहित्यय् नं च्वसा न्ह्याकूगु दु । प्रधानया नानीको कथा, सुनको छाती, रीताको स्कूल लिसेंया मचा बाखं मुना सफू पिदंगु दु ।

Categorized in कला